الفصل الثاني وثلاثون 32
بقلم ايه
رن عليها بعد ما كان حاس باللي ح تحكيه
نبراس >> الو
مرام >> عادي تخليني نحكي بدون ما تقاطعني وبعدها قول يلي ح تقوله
نبراس ولع دخانه >> نسمع فيك
مرام>> نبراس من اول يوم حكيت فيه معاك وانا عارفه انه كل شي بينا غلط ، و عشان كل شي ينبنى على باطل هو باطل .. قررت نسافر مع محمد وسيبت كل شي ورايا عشان معش نحس بشعور الذنب واني نزيد فالغلط اكثر من هكي وناخذ في ذنب بنت كيفي كيفها، ماننكرش انه اللي صار بينا غلط بس تريحت لما فسخت خطبتك على الاقل بالي تريح شويه ب انه مافيش حد ثالث معلق معانا وقعد الموضوع انا وانت بس " سكتت شويه "
نبراس بهداوه>> كملي نسمع فيك
مرام خذت نفس >> بس الموضوع مش انا وانت بس الموضوع يا نبراس فيه هلك وفيه حياتك وفيه هلي وفيه كل شي ، نبراس انا مطلقه … و اكيد هلك مش ح يرضو انك تسيب بنت عمك عشان تجيبلهم وحده مطلقه ! الورقه لي عندك هذي ما تعنيش شي راه هضا عليش ما وريتهش الحد عشان احكي من هنا لعند بكرا هضا المجتمع لي نحن فيه مطلقه يعني مطلقه لا ينفع اني بنت ولا ينفع ورقه ولا اي حاجه
نبراس >> يعني يا مرام ؟ لشن تبي توصلي من الكلام هضا
مرام>> نبراس عشان انت تعرف انا شن نحس اتجاهك ف صدقني مش متمنيه اني نشوفك تعاني في حاجه انت ما لكش ذنب فيها ، مش ح نقولك رد البنت عمك بس انا وياك مش البعضنا " ومسكت دموعها "
نبراس >> بس انا نحبك انتي ! انا نبيك انتي … انا نبي نكملو مع بعضنا … مش ح نكذب عليك ونقولك هلي ح يوافقو ولا ح نقولك انهم ح يتقبلوك لاني نعرفهم ونعرف تفكيرهم بس انا متقبلك والورقه متاع المستشفى لي عطيتيها ليا على قد ما زعلت انك دسيتي عليا الفتره هذي كلها .. على قد ما فرحت وانتي فاهمه ليش …
مرام >> نعرف وعشان هكي وريتها لكي حقك تعرف وحقك تطمن ، ومش حاجه غلط هضا مجتمعنا وهضا حد تفكيرنا الله غالب … وعشان انا عارفه الوضع لي نحن فيه عشان هكي قتلك انه وضعنا صعب والله صعب
مسح نبراس على وجه >> مرام ما نبيش منك شي غير انك تعطيني شوية وقت …. مانبيش نعلقك معايا بس برضو ما نبيش نخششك فالعيله بمشاكل نبيك تجي وانتي متريحه عالاقل خلي عرس مجد يمشي بس بعدها ح نعرف وضعي وصدقيني في جميع الاحوال واخذك لو ما بوهش بالطيب نجيبوها بالمشاكل شن ورانا
مرام ابتسمت بضيق >> خوذ الوقت كله بدون مشاكل ، بس طلب ممكن لعند بعد عرس مجد معش نحكو
نبراس >> ح تريحي هكي ؟
مرام >> مش قصة راحة … بس عشان انت تفكر وانا نفكر كويس
نبراس بضيق >> بس طمنيني عليك ولو بمسج كل يوم
ابتسمت >> حاضر
صكرو الخط وهما الاثنين تايهين ، وبالاخص مرام اللي كل يوم تكتشف شن معنى كلمة مطلقه !
نعم، جاءت الأيام التي لا أريد فيها أي شيء أكثر من أن يتوقف كل شيء عن الحدوث، أن ينقضي كل يوم بثمن أقل، بضجيج أقل، بكوارث أقل، بطريقة هادئة فحسب.
//
//
وهكي الايام يمرن ، اللي فرحان يمرن عليه بسرعه و الزعلان يمرن عليه بطلوع الروح… بس الاكيد انهن ح يمرن عشان الوقت عمره ما يوقف على حد
كانو كلهم على نفس الوضع ، اللي مر ممكن خمس ايام بس و حاليا نحن فالليله يلي قبل زفة مجد والصالحين
نبراس كان يطمن علي مرام بمسجات ، و كان مسج فيه كلمتين و كل حد يفكر مع نفسه و قرر انه بعد العرس بيفتح مع هله الموضوع بشكل جدي ويشوف رايهم
//
//
في الليله لي قبل الزفه … في حوش العرس
بايتين كلهم مع مجد في حوش جدتهم سالمين … هديل و سديم و خلود وولدها فرج مفرشين كلهم في دار مجد … وفي الدار الثانيه بايتين سالمين و نجوى وهناء و جميله … و الشباب اللي كل حد خش الداره عشان بكرا وراهم يووووم طوييييل و شيل وجيب
خلود >> تو كل وحده ماسكه تلفونها عليش بايتين مع بعضنا ، ساد ما اني مسيبه راجلي
سديم >> ياربيييي بتذلنا عاد عشان سيبت معتز
خلود ضحكت>> امالا شنو
مجد >> نحس في روحي خايفه بكل
سديم هزت بكتوفها >> طبيعي خناق عرايس
مجد اللي كان تفكيرها في حالتها واللي هيه فيه >> مش هكي بس بجد خايفه والله … يعني ح يطلع الصالحين كويس ديما زي ما مبين توا قبل الزواج؟ ح يجوز عليا باهي ح يسيبني فنص الزواج
البنات لي يبحتن فيها ومستغربات من تفكيرها محدش فاهم هيه عليش تحكي هكي
هديل >> مجد كنك ؟ معش اتفاولي على روحك قولي كلمة كويسه ولا اسكتي شنو الكلام الي تقولي فيه هضا
سديم >> مجوده صايره حاجه ؟
مسحت مجد دموعها وابتسمت >> ما صارش شي بس تفكير
خلود >> صدقوني والله خناق ، انا الليله لي قبل زفتي كملتها نبكي بدون اي سبب
هديل >> صبي صلي ركعتين بيش اتريحي
قاطع كلامهن دقت الباب
هديل>> بسم الله … مش على اساس كلهم راقدين
جاها صوت بدر الدين من ورا الباب>> رقدتو يا اوي
سديم بحتت فيهن >> هضا لا يرقد لا يخلي الشعب يرقد ، يبرم في هل حوش و يعد في نجوم الليل
بدر من ورا الباب>> فرخه سديم نسمع فيك … صبي ديريلنا سندوتشات انا وسهم جيعانين
ضحكت مجد >> صبي النبي
سديم كرت اشربها >> اوفففففف كل حاجه سديم سديم شنو هضا
فتحت باب الدار وطلعت ووراها مجد وردت باب الدار
بدر >> شن حسك اتمتمي
سديم >> الساعه 1 ونص نبراس راقد ولقمان و حتى معتز لز مراته ورقد انت وولد سيدك عليش واعيين
بدر >> نحن نادرين من نوعنا … بتخشي توكلينا ولانخش نقلب المطبخ
مجد بحتت فيها >> بالله عليك بكرا ورانا يوم طويل مش وقت انوضو نضمو مطبخ
سديم>> على اساس بتضمي حاجه من صبح ربي ماشيه للكوافير
مجد ضحكت>> بنعدي نتوضا ونصلي مالي ومالكم
مشت مجد وبدر بحت في سديم
سديم >> باهي قلنا تو نديرلكم ، بدون شروط سندوتشات تاكلو وانتو ساكتين
ضحك بدر >> قاعدين في داري
هزت براسها وخشت للمطبخ
.
.
حاست عشر دقايق فالمطبخ دارتلهم سندوتشات سريع ومشت لعندهم دقت باب الدار
بدر >> خشي
سديم >> ياريت تاكلو وترقدو معش فيه طلبات اخرى شطبنا
سهم >> عليك ذل خساره ما بكرا وحده ماشيه في كوافير شرق ولخرا غرب
سديم >> هديل ماشيه مع مجد ، و خلود بتمشي كوافير بروحها وانا كوافير بروحي
بدر بحت فيه >> هي خوذلك
سديم >> كولو وارقدو
بدر >> خلاص يا امي فهمنا
سديم >> غريبه عهدي بيك استيعابك سنوي
"قالت كلمتها و صكرت باب الدار بسرعه وطلعت"
بدر >> بليده
ضحك سهم >> كول كول
//
//
صباح ثاني يوم 🖤
عند عيت مرام
ليلى >> مرمر ماتبيش تقولي كنك
مرام >> ولا حاجه
ليلى>> يعني لكي كم يوم تغسلي فالمواعين وهذي حاجه غريبه جدا ماعمركش درتيها تلهي في روحك على شنو بالزبط
ضحكت مرام >> انتي يا حره قطعتينا بالضم والغسل
ليلى >> واضحه ما تضمي وتغسلي الا عشان ماتبيش تفكري مش حراره يعني 😂
مرام طفت الشيشمه>> نفس الموضوع ونفس كل شي مافيش جديد والله
ليلى >> معش تفكري بس تو كل شي يمشي كيف ما ربي كاتب
مرام >> باذن الله … خطرها ماما ح تمشي اليوم صح ؟
ليلى >> عرس مجد ؟ اها ماشيه
مرام>> حل غايتك تمشي حتى انتي عاد
ليلى >> ما فهمتش عليش عيب عد الله راهي صاحبتي 😒 شعب يحب يكبر المواضيع
مرام >> امك بروحها متحشمه في مشيتها ومازال يعني ما درتوش دفع وهكي ، بس ماشيه على قولتها بنشوف عرب بنتي … هلك من بعد عطيتي شعفو
ليلى غمزتلها >> يلا تضرب عصفورين بحجر … بيش المره الجايه ما يسألوش يقعدو سائلين وشايفين العرب و يوافقو على طول
هزت مرام براسها >> اطلعي اطلعي نصلي العصر ونجي ندير الماما شعرها
//
//
في حوش العرس … كانو كلهم يستعدو لليوم
الي عنده شغل واخذ اجازه ، واللي عنده حاجه اجلها و اللي عنده قرايه زي سديم سيبها 😂
شال لقمان هديل ومجد للكوافير … والباقي كل حد مشى يوتي في روحه
والصالحين لي كان موقف المركز كله اليوم … كانو الافنديه كلهم معاه كل حد يبي يخدم ويفرح لسيادة المقدم ، ونبراس كان معاه فكل شي
وبدر كان ما بين حوش هله ومابين الصالحين ما يبيش يفوت لحظه 😂 ومايبيش يخلي حد يشيل سديم غيره 🤭
كانت سديم طالعه من الكوافير مغطيه وجها منعا للهزايب وبدر مدرس قدام الكوافير بزبط
فتحت الباب وركبت
بدر>> غطيه وجك غطييييبه
سديم>> بدر را اقسم بالله ننزل ونصبي في وسط الشارع ونكلم عمي يجي ياخذني
بدر >> باه غطي وجك
سديم>> مغطيته نبي نتنفسسسس المكياج تو يخرب
بحت فيها بالجنب >> عليش مكثره امه
سديم>> عشان عندنا عرس مثلا ؟
بدر >> تلبيزكن هضا والله بلاه احسن
سديم >> بدر بلكي خلاص اوامر من الصبح وانت هكي
بدر >> لعند اتربي
سديم >> متربيه سوق بس
ضحك عشان استفزها وقعد يبحت فيها بالسرقه عشان يشوف كيف طالعه
.
.
.
مرن الساعات وجا الوقت الموعود ، القاعه مليانه العروس على قد فرحتها على قد ما هيه متوتره وخايفه من اللي جاي ، الصالحين ح يكون كويس معاها ؟ السر لي ما شيتله بيه اللي م كانش يعرفه غير نبراس فالعيله كلها قعد الصالحين هو ثاني شخص يعرفه ح يقدر يتقبله ولا بس مجرد كلام
هزت براسها لما شافاته خاش للقاعه و جاي مبتسم ، وعرفت انه تفكيرها هضا كله ما لش اي داعي في اللحظه هذي لانه خلاص معش فيه تراجع
ما كان حُبًا من النظرة الأولى بقدر ما كانت طمأنينة من الدرجة الأولى , مثل أن ينظر المرء إلى شيء ويستريح به.
//
//
كمل العرس المنتظر واليوم لي كانو فيه كلهم فرحانين ب اغلى اثنين الصالحين و مجد
في حوش العرس ، كلهم كانو تعبانين
هديل >> مستحيل نتخيل الحوش بدون مجد
سديم >> بنجو ما نلقوهش ونشربو نسكافيه مع بعضنا
بدر >> تو نشربه انا
بحتت فيه وهيه تبكي >> لا احساس لا ضمير
ضحك >> تو تبكن تقول انظر وين ماشيه تو عطوها يومين تقعد كل يوم تجي
هديل >> في هذي معاك حق
سديم >> انا بنطيح على وجي بنرقدددددد
هديل >> بكرا بيش تنوضي معايا نضمو الحوش
بدر >> بايتات هنا
سديم >> عندك مانع ؟
بدر >> لا حول ولا قوة ، تو شن قلت نسأل
سديم >> بنرقد فدار مجد
ضحك >> سيطرتي عليها
سديم >> شكلي بننقل دبشي ونجي هنا نفتك من البومه هذي لعند ما تجوز و تفكني منها
هديل صبت>> مش ح نرد عليك بنخش نرقد 😒
ضحك بدر بحتت فيه سديم
بدر >> خير ان شاء الله
سديم >> عملك الاسود لي درته اليوم تو تشوف عليه.
بدر >> احا شن درت
سديم>> العبايه شعرك المحرمه المكياج الهم الاسود حرفيا ما سكتش بكل !
بدر >> بعد خطرها، تو عليش مش مغطيه وجك ؟ كنك ان شاء الله خير تبي الشباب يقيمولك مكياجك
سديم>> سقم سقم اسلوبك ، بعدين مافيش حد براني
بدر >> سديم 🙂
سديم >> اوووففف خلاص سكتنا
بدر >> قدامي امشي ارقدي
بحتت فيه وبرمت عيونها >> مشينا
وبرمت خشت قدامه ، هوا ضحك وخش داره
//
//
نفس الليله عند عيت مرام
كانن ليلى و مرام مقعمزات جنب امهن بيعرفن شن اجواء العرس 😂 وليلى ما بطلتش اسأله
حليمه>> ليلى سادك يا امي 😒
ضحكت مرام
ليلى >> ما بنعرف اخبار عربي عاد 😂
حليمه >> تقوليش عرب كويسين و فرحو بجيتي بكل بذات ام سهم عرفتني على العيله و حقيت خطرها مرات خوه راه قالت لي كانو في طرابلس جو عالعرس
ليلى >> اه خلود مرات معتز الكبير هضا
حليمه >> خلاص ايوه و حقيت جدتهم ، وشفت بنتين كويسات شبابات ما نزلنش من جنب العروس بس الحق ما سألتش من بس باين من العيله
بحتن ليلى ومرام في بعضهن و سكتن
كملت حليمه كلامها >> ايوه المهم عرب كويسين ان شاء الله ربي يكمل عليه
ابتسمت ليلى >> ان شاء الله
بحتت حليمه في مرام>> وعقبالك يجيك سعد كويس
ابتسمت مرام مجامله وما بتش ترد ، هدرزن شويه و بعدها طلعن ومشن دارهن
بحتت مرام في ليلى >> اكيده البنات لي تحكي عليهن ماما وحده منهن هديل
ليلى كانت ماسكه تلفونها>> اكيده تهيالي سديم وهديل لانه سهم قايلي انه هنا البنتين الوحيدات فالعيله
هزت براسها وسكتت
نزلت ليلى التلفون >> شن صار بينك وبين نبراس؟
مرام>> قتله انه خلينا معش نحكو الا بعد عرس مجد عشان كل واحد يفكر
ليلى >> وانتي فكرتي
هزت براسها >> ما عرفتش نفكر … لو سيبت نبراس مش ح نتريح ! ولو قعدت معاه عارفه اني مش ح نتريح …. بنت عمه لي كانت خطيبته حتكون ديما قدامي مانعرفش ردة فعلها و برضو العيله ح تقبلني ؟ المجتمع ؟ والاقارب كل شي … را الموضوع مش ساهل مهما سهلناه هوا شاب وانا مطلقه
سكتت ليلى لحظة وهيه مش عارفه ترد على اختها تبي تواسيها بس كلامها صح >> مش عارفه شن نقولك … بس افضل شي انك تخليها على ربي
مرام >> وهضا لي دايرته .. خليني نمشي نصلي
خذت ملاية الصلاة وطفت ضي الدار وطلعت تصل
على رنت سهم على ليلى ، مسكت التلفون وردت
ليلى >> توقعتك ترقد بعد تعب اليوم
سهم >> هو انا نقدر تغفى لي عين بدون ما نسمع صوتك
ابتسمت>> شن درت اليوم
سهم>> اقسمبالله من التسعه الصبح لعند توا كيف خشيت بنغفي شويه
ليلى >> حبيبي حرام تعبت
ابتسم >> عشان هكي كلمتك بنتريح
ليلى >> خلاص بطل كلام وارقد
سهم >> ليلى عرس مجد وفض وانتي السنه قريب تكمليها امتى ان شاء لله بنديرو دفع كيف الناس ؟
ليلى >> والله ما على قصة قراية ولا على حاجه بس الفكرة كلها نبي قصة مرام تنحل مع نبراس ، الفتره هذي توتر بكل هيه وياه ومعش عارفين شن يديرو
سهم>> شن قاللها نبراس
ليلى>> اخر شي قالت لي قال خليني بعد عرس مجد نعرف شن يسير معايا ونفهم
سهم>> معاناها عطيه يومين بالكثير وتو تلقى الدنيا شايله عندنا فالحوش
ليلى >> ان شاء الله خير ، خلاص حبيبي ارقد تريح
//
//
في نفس الليله برضو عند العرسان ✨
كان الصالحين يحكي ويهدرز مع مجد عشان ما تحسش بتوتر وتخاف ومجد كانت تاخذ وتعطي معاه فالكلام بس متوتره
مجد >> عارف اني بنموت جوع
صالحين خبط راسه >> عارفه انه الوكال فالمطبخ جا وانتي تغيري فدبشك ونسيت نقولك
مجد >> ولكي ساعه تهدرز و ناسيه 😂
ضحك >> تو نجيبه
مجد >> خليك تو نصبي
صبا >> قلنا تو نجيبه
ابتسمت وقعمزت ، جاب الاكل وكلو وهما يهدرزو علي اليوم من مشيتها للكوافير للصاله ، وهوا وين لبس ومن كان معاه و سيارات الزفه وكل شي
خشت بعد كملو لمت الحاجات ، ومشت للدار … خش الصالحين ماسك تفاحه في يده ياكل فيها و اتكي فم الباب
بحتت فيه ب استغراب
ابتسم وقرم من التفاحه>> تبي تفاح؟
هزت راسها>> لالا ماعنديش عليه
رفع حاجبه وابتسم >> كويس التفاح تبي قلنا
مجد >> عطيني نذوق
قرب منها وهوا يضحك
//
//
اليوم الثاني
في المكان لي كله ناس وزحمه وهرجة الافنديه ، كان في مكتبه يفكر في شن حا يدير في موضوعه من وين يبدا بيها هيه الي حاس بيها ولا بهله ولا بشنو
خبط الباب لي كان مفتوح اصلا و خشش خالد راسه
نبراس شيرله بحواجبه
خالد>> افندي وين سارح "وخش"
نبراس مسح على وجه>> والله تالف من تعب العرس ، دارها وماشي هوا منخمد ونحن من التسعه الصبح هنا
ضحك خالد >> عقبالك عقبالك
نبراس >> انا العزابي لي بينكم
خالد >> رغم انك معش حكيتلي وحتى فسخت الخطبه دواها ليا صالحين ، بس ربي يهدي بالك
نبراس >> صالحين هضا فمه ما يلمش فيه بكل
خالد ضحك>> هو عارف انك ح تحكيلي سرنا واحد
هز براسه >> راسي بيطربق
خالد >> تنزل تشرب قهوه
نبراس ولع دخانه>> هي لاحقك
طلع خالد ، صبا نبراس خذا تلفونه و نزل
//
//
في حوش الجد ، خش لقمان ينادي على هديل الي كانت حايسه هيه وسيسي وصبايا عمامها في حوسة لحوش بعد العرس و خلاص شبه كملن وقاعده هي وسديم يديرن في اخر تشطيبات
طلعت وهي تمسح في يديها بعد ما سمعت صوته
كان واقف على اول درجه وكراع الاخره عالوطا، و هيه قدامه مربعه يديها
هديل>> ايوه
لقمان >> تي وين شكلكم جوا اشغال شاقة
ضحكت>> الحوش حاايييس من جرينا امس
لقمان >> كملتو
هديل>> خلاص اه تبي نديرلك حاجه
لقمان>> لا بس بنقولك ع الشغل
هديل>> بكراا صحح
لقمان >> خلاص بكرا ٩ ونص تكوني واتيه نطلعو بيش نحطك ونمشي شور الشغل
هديل >> وبعدها من يروحني
لقمان >> ما تفكريش خلاص عندي
هديل >> انا نكمل 3 وانت تكمل شغلك اربعه يعني يا اما تطلع بدري بساعه يا اما انا نتأخر ساعه
لقمان >> ربع دماغ المعرض لنا يعني ما نشتغلش فيه ، نقدر نحل ونسكر امتى ما نبي غير هكي بدر قاعد و سهم نفس الشي وما فرقتش الساعه 3 من 4
شبكت يديها و بتوتر >> ماه ما نبيش نخرب عليك روتين شغلك عشان شغلي انا ماتعودتش نكون انانيه
لقمان >> ياستي تو انا شكيتلك بعد نشكيلك ساهل ؟ وبعدين معايا كوني انانيه راضي
بحتت فيه وبسرعه حولت عيونها من عليه
هديل >> بنخش نشوف سيسي بيش نروحو ماما مبدري روحت " وبرمت خشت بسرعه"
فرد طوله ومسح علي راسه بتوتر
خبطه بدر لي دوبه خش على كتفه >> ان شاء الله خير
لقمان >> تي فجعتني دير صوت
بدر بسماطه>> وكنك متوتر تقول خاش امتحان اهدا
لقمان >> بدر الدين
بدر>> انتو هضا جوكم الي يوحل يقول بدر الدين
وخش قدامه وهوا يغني انتظرينيي وعدّي نجوم الليل و لقمان برم وطلع
//
//
خش وهوا ينادي على ست سديم
بدر>> سيساااااااي سديم الهمممم
طلعت من المطبخ >> مافيش هم الا انت هاااا شن تبي
بدر>> يقولو نعم
عزقت الخرقه فيه>> تقولي هم وتبيني نقولك نعم
نفض روحه بقرف>> نعن شكل وجك مليانه تراب
سديم>> ياااااي سامحنا خربنا الاناقه
قلب وجه >> بتخشي اديري نسكافيه ولا بنقعدو طالقين لسانا علي بعضنا
بحتت فيه وبتجداي بعيونها>> بس بشرررط والنبي امس قبل ما نرقد شفت صورة كيكة في كافي وهنا مش بعيد خطوتينننن وجا خاطري فيهااااا بكل
مسك ضحكته>> والمطلوب؟؟
قرنت حواجبها>> تجيبلي 😒 عشان نديرلك نسكافيه
شير على عيونه>> نصلي ونجيبه دزيلي اسم الكافي
ابتسمت ومسكت تلفونها ادزله في اسم المكان>> احلى نسكافيه الاحلى بدوري ، دزيته
رفعت الخرقه وبرمت للمطبخ وهوا ابتسم ومشى الداره
//
//
مرن كم يوم و شبه انه الكل قاعد واقف في الحافه ، والي واقف على شفير الحافه نبراس اللي خلاص لازم يفتح الموضوع مع هله وخوفه كان من باته اللي سيب بنت خوه المتوفي في حادث ومسيب بنتين في رقبته هوا وكيل عليهن وشايل مسؤليتهن ، وخوفه من امه اللي عارف انه فكرة وحده مطلقه مش ح تمشي معاها بساهل الموضوع صعب عليه هوا بنفسه على رغم كل شي بس هضا الواقع لي نحن فيه
قطع افكاره دق الباب وخش الصالحين
نبراس >> تكذب انت ؟
صالحين ضحك >> تي والله ياراجل الزواج سمح لكن اللي يقعد متعود طول عمره عالحك ما يقدرش يقعد ثانيه بلا شغل
نبراس>> نعنجد راسك ما طقيتش اسبوع
صالحين >> تي مش جاي بنشتغل بنشوفكم ونطلع ، مجد لزتني
نبراس ضحك >> كنها
صالحين>> قالت لي خلاص كمل دور العريس والعروس اطلع خليني نضم الحوش 🙂
نبراس >> انقنها عمتي اللي ح تربيك
صالحين صبا وراه ومسك يده لواها >> تي انا لي نربيك
نبراس ضحك>> تي نعنشكل راسك يدي
خش خالد على صوتهم >> تي لللالا العريس هنا
فك يد نبراس و رد مكانه >> عريس عريس وخلاص لا حد فيكم عزمني على قهوه لا شاهي شي
نبراس >> فز فز انزل اشرب بروحك ناقص غير نعزموك
هز خالد بكتوفه >> انت اعلى رتبه فينا وانت لي راتبك واجد اعزمنا مش نعزموك🤭
صالحين >> بلاااااا عالحسسسد ، تي خلوني نطلع نشوف مراتي وحوشي مالي ومالكم " وبحت في نبراس"
نبراس بحت في خالد>> هضا ما يبيش يهمد الا لما نخربله وجه
ضحك الصالحين وطلع
خالد >> بتطلع حتى انت؟؟
نبراس>> اها خلاص شطبت اليوم
//
//
في حوش الجد ، كالعاده ملتمين .. هديل فالمطبخ ادير في قهوة
لقمان>> شنجو الشغل
ضحكت>> ليا تقريبا اربع ايام باديه وكل مشيه ومرواحه نفس السؤال
ضحك>> ماهو بنتأكد لو تمام ولا لا
هديل >> لا تمام التمام الشغل كويس و المكتب كله بنات والموقع كويس وقريب منك يعني شن نبي اكثر
ابتسم >> شن ح اديري ب اول مرتب
ضحكت >> مافيش حد يحمس فيا للشغل غيرك كلهم مش راضيين و يقولولي شن تبي فيه
لقمان>> بالعكس انا شايف انه خبره لكي و تستفيدي مش ضروري تشتغلي يعني ناقصك شي
حطت الفناجين فالسفره>> بزبطططط يعني عادي كان اضايقت ح نوقف على طول بس انا حاليا مليت من الحوش مافيش غير انتناقر انا وسديم و من مسلسل المسلسل
على خشت سديم >> سمعت اسمييييي؟؟
لقمان >> تشكيلي منك
هديل هزت براسها و تصب فالقهوه
سديم >> تي شن تشكي هذي من يقدر عليها بس
خش بدر من الباب الوراني >> تي انتي لي من يقدر عليك
سديم حطت يدها على قلبها >> ياربيييييييي ديما فاجعني ديما
بدر >> انتي المرعوشه
هزت براسها ولقمان يضحك
بدر >> هدوله اديري في نسكافيه
هديل مسكت السفره >> لااااا انا تخصصي قهوة بس سديم نسكافيه
بحت في سديم ، اللي ردت بحتت فيه ورفعت حاجبها >> مش انا مرعوشه
بدر>> خرفييييي
هديل طلعت >> لقمان جيب كباية الميه خلينا نهربو
ضحك >> وراااااك
سديم >> ديما مطفش الناس من حذانا
بدر >> عليك اوڤر ناس و حذانا تي اختك وولد عمك
سديم >> باه شن تبي ؟
بدر >> نبيك
سديم قرنت حواجبها >> بدر الدين ؟
بدر ضحك بسماطه>> ما كان قلتي باهي من الاول را ما طولنش الكلام
سديم>> اطلع تو ندير ونجي
ضحك عليها وهيه متعصبه من اسلوبه وطلع من حذاها، اما هيه خذت نفس وهزت براسها و طلعت الحليب من التلاجه
//
//
في نفس المكان بس برا كان معتز فالجنان يدخن ويفكر
على تبييبت سيارة نبراس … فتحله الباب درس وجا عنده
نبراس >> شنو صار معاك انت؟ مازلت تفكر في المصيبه لي بديرها
معتز ما بحتش فيه>> ما نعرفش يانبراس كيف بنحكيلها
نبراس >> ما تستغفلهش ! ما تديرش حاجه تجرحها راه الي بديره واعر بكل .. و اعرف اني ضدك مش معاك فيه نهائيا بس انا نعرف انك ح تصكر راسك واديره غلط ف مش ح نقدر نمنعك بالغصب لكن غلط يا معتز لو بتسمع كلامي مافيش داعي
معتز >> نبي نحكيلها وخايف من ردة فعلها كنت نستنى في العرس يكمل بيش نحكي واهو كمل وما قدرتش نقول شي مانبيش ندير حاجه حرام
نبراس بنفاذ صبر بعد عرف انه مُصر >> حتى انا عرفتها جيتك بنغازي مش بلاش
معتز تنهد >> والله ما هكي القصة "سكت شويه وكمل" مازال هلي ما يعرفوش
نبراس نفخ الدخان >> اهم شي احكيلها هيه قبل هلك هي اهم ولدك فكر فيه، وخليها تقرر رغم اني نعرف انها مش ح ترضى والحق تستاهل اللي ح اديره فيك وبعدين فكر كيف ح تحلها مع عمي بذات
معتز بضيق>> خلود ماعندهش وين تمشي هلها صعبين شويه ، يعني قرار اني نزوج ثانيه مش ح يخلي خلود تطلب الطلاق
وعلى كلامه هضا برم وراه شاف خلود اللي كانت طالعه ماسكه فرج اللي ماسك في صبع يدها ويمشو مع بعضهم ومن حماس الموضوع م حسوش بيهم
فلتت يدها من فرج و حطتها على قلبها، جرى فرج بعفويه وهوا يضحك عند نبراس اللي كان يتمنى الارض تنشق و تبلعه وما يشوفش صدمة خلود الواعره و ينحط في موقف محرج ، خلود مش مرات ولد عمه وبس خلود كيف اخته وغاليه عليه
معتز حك على عيونه وعرف انها سمعت ، طبس نبراس رفع فرج وبحت في معتز وشيرله بلوم
وقال بجديه>> تو نشيله جوا بعد تكمل تعال خوذه