روايه حافة المنتصف
الفصل الرابع عشر 14
بقلم ايه
مجد >> جاني ورفضته وحكى النبراس وقلت لا ، مشى جاب امه نظام امر واقع
سديم >> انقنه يفعل سيادة المقدم
هديل >> ما تعبريهش خليها تخرط ، المهم قوليلي باه ليش رافضه
سديم >> لانها غبيه ،"خبطت راسها" معلش نسيت انك عمتي
مجد ضحكت على سماطة سديم >> هو جاب امه عشان يبيكم تسألو السؤال هضا ليش رافضه ، يبيني نوافق عارف امي وخوتي يبو يتريحو عليا
هديل >> برضو ما جاوبتينيش عليش رافضه
سديم >> راك تطلعي تفكري في مروان بس ! بيش نمشي نحرش فيك نبراس
هديل >> سيسي ! ماتبيش تغمي فمك
حطت يدها على فمها >> هاه وانتو كل حاجه سيسي و سيسي
مجد >> ماعنديش نيه في شي
هديل >> بس الصالحين ما ينرفضش
سديم >> عادي نقول حاجه باهيو ؟
مجد ضحكت>> قولي يا سيسي
سديم >> مع احترامي لمكانتك في حياتي ، بس تقعدي حماره بكل كان رفضتيه ، تي انا لو انه مش كبر بابا الله يرحمه را قتله مجد ما تبيكش تو نوافق انا
هديل >> انتي خليتي فيها مع احترامي ، باهي يا مجد شن حتردي عليهم ؟ اكيده عميمه جميله ح ترد تحكيلك
مجد >> متحشمه منها بكل ، و امي ح تنجلط لو قلت ما نبيش انا عارفتها
هديل >> فكري بمنطق بلا هبال
رفعت راسها وهيه عارفه انه كلامهم صح ، بس اللي فيها هيه ما حدش عارفه ولو يعرفوه ح يرفضو صالحين قبل حتى ما هيه ترفض !
انفتح الباب بالمفتاح اللي كان عند بدر وخش في جرته سهم ولقمان
سديم حطت ايشربها لي على كتوفها بسرعه على راسها >> مش لابسه حجابي يا عديم الذوق
بدر >> ريت هالشعر السايح لي بنحقه
سديم >> سايح غصبا عنك
بدر >> ما كنت نحق فيه قبل ما تعرفي الحلال والحرام وتلبسيه علينا ، "و قدم يده وكره قدام" وياريت غير لابستيه كويس
سديم وخرت>> معش تمد يدك
بدر >> معناها سقميه
بحتت فيه و الشباب كانو يهدرزو مع مجد و هديل
سهم >> امي جوا ؟
مجد >> اه
سهم >> هاكي النبي بيش تخششيلها مفتاح الحوش ، باتي طلع هو وسيدي و انا طالع مع الشباب
هديل>> وين ماشيين ؟
سهم >> لنا زمان م طلعنش ، بنمشو للقهوه طلعت شباب
لقمان >> تبن حاجه من برا
هديل >> سلامتك
مجد >> كنكم ما قلتو النبراس يجي معاكم
بدر بسماطه>> شن رايك نكلمو حتى الصالحين
بحتت فيه وهزت براسها
بدر ضحك>> قالك طلعت شباب مش شياب " وبحت في هديل "
هديل ضحكت >> سامط ما تغلطش
لقمان >> هيا قلتو بتخشو تعطو المفتاح مش بتباتو
بدر >> هي هي
سديم >> سهم بكرا محاضرة ال ١١ اه
سهم >> تمسك يا بدر بكرا فالمعرض نطلع نزرق بيها
سديم ب استفزاز >> عادي لو بيرقد ح نكلم يحيى وانت حرام ما تسيبش المعرض
بحت فيها بدر بنص عين >> متسبله على تكليم يحيى ؟
سديم >>عندي محاضرات بنمشيلهن مانبيش نقعد انترمى بين شيلها يا فلان وعلان
بدر >> تو نشيلك انا تم خلاص
سديم >> بلكي بتريح نكلم يحيى
ضحكو كلهم
بحت بدر فيها >> عارفه تزيدي حرف نقولك مافيش مشي لا معايا لا مع غيري ، اهمدي
برمت وجهها و هي تضحك بعد ما استفزاته بدون ما تبان عليه ، وهوا فتح الباب وطلع سبقهم
لقمان بحت فيها >> صحه لكي 😂
//
//
بعد ساعه خش نبراس ، لقاهن على نفس القعده
طلق السلام و جا لعندهن
هديل >> كيف حالك
نبراس >> بخير وانتي
بحتت مجد في سديم وغمزتلها يصبن ، وانسحبن بشويه هنا الاثنين
هديل >> الحمدلله ، فاصل بكل ولا بترد اخرى
نبراس >> لا كملت بدري اليوم
هديل >> جيعان ؟
نبراس >> ميت جوع
هديل >> نديرلك حاجه تاكلها
ماحبش يردها >> حاجه سريعه
هديل ابتسمت >> سندوتشات سريع سريع
وصبت قدامه ومشت للمطبخ ، وهوا مش مشى شور دار حنه و امه
..
..
خشت للمطبخ وهي ادير في السندوتشات وسط تعليقات سديم و مجد عليها
هديل >> بطلن سماطه ريت هالرومنسيه كلها سندوتش
سديم >> ما قلنا شي
طلع نبراس من الدار ، مشت مجد لعنده
مجد >> نبيك شويه
نبراس >> تعالي داري
ركب وركبت وراه ، خش للدار
نبراس >> احكي
مجد >> نبي نحكي مع ولد خالتك
نبراس رفع حاجبه
مجد>> عارفنا نحن الاثنين كبار انا مش مراهقه ولا هوا ، يعني ما فيش منا خوف
نبراس >> ما نحكيش على هكي بس شن غير رايك ؟
مجد >> ما تغير شي نبي نحطله النقط عالحروف
نبراس >> مجد خلاص قتلك حطيها في وجي وانا بننهيها بمعرفتي
مجد >> نبراس لو سمحت ، مش ح نتريح لو ما حكيتش معاه و فهمت ليش دار هكي
نبراس >> نعطيك رقمه ؟
مجد هزت براسها>> وما تقولش اني بنرن
نبراس >> ما تكثريش معايا دلاله ، مكالمه و امسحي ام الرقم
مجد هزت براسها
نبراس >> وما تغلطيش معاه فالكلام
مجد >> حاضر والله انا بنفهم وبنقوله ردي بس
نبراس>> الله غالب عليا ، ومعش تحكو على بعضكم قدامي خذيتو عليا واجد انتي وياه
مجد بجديه>> عمتك راه
نبراس >> هشش هشش ، انتي بنتي اين عمتي
ضحكت مجد ، على دقت الباب
نبراس >> ايوا خش
خشت هديل بسفرة العشا و قربت من عنده ، صبا خذاها منها
هديل >> مانعرفش شن تحب وشن لا حطيت من كل شي
نبراس ابتسم >> شكرا
هديل >>عفوا
بحت في مجد >> تو ندزه لكي في مسج
هزت براسها وخذت هديل معاها و طلعن، حط سفرة العشا قدامه وقعد يبحت فيها مسك تلفونه دز المجد الرقم وخذا دبشه وخش يدوش
//
//
خشت الدارها بعد ما كملت كل شي ، ومسكت تلفونها وحطت عالرقم ، رفعت عينها شور الساعه ما بتش تكثر تفكير .. على طول رنت
جاها صوته وسط هرجة الافنديه عرفاته مازال فالشغل
مجد >> الو
صالحين بجديه>> ايوا ، من
مجد >> عارف يا الصالحين لو تحساب روحك هكي تبي تجيب التايهه و تلوي ذراعي يبقى مازال ما عرفتنيش
ضحك وهوا يقول >> مجد
مجد بعصبيه>> ما يضحكشش ما يضحكش ! مافيش شي يضحك انت شنو يا اخي ! الله يسامح نبراس اللي حكالك ، انت جايني بتشفق عليا ؟ جاي بدير عمل خيري را والله ما نبي انا مانبش شي بنقعد فحوش هلي مانبيش نجوز مانبيش حد انا
وخذت نفس و سكتت
صالحين >> كملتي ؟ من قالك جاي شفقه
مجد >> كنت قدامك طول عمري ما خطرتش فبالك الا يوم وصلتنا للمستشفى وشفتني نبكي وسألت نبراس وقالك حالتي و قصتي ! هنا بس كيف خطرلك تجي وتخطبني ؟ وهضا شن معناه يعني
صالحين>> معناه خشيتي راسي مثلا
مجد دموعها نزلن>> خشيت راسك عشان عندي صعوبه اني نجيب عيال ! خشيت راسك اني عندي عمليه بعد اربع خمس سنين ، خشيت راسك عشان ممكن بعد سنه اثنين لما تفطن الروحك و تصحى من دور البطوله لي دايره تمشى تجوز عشان من حقك تكون اب ! وانا لو شنو مش ح نقدر نمنعك
قاطعها صالحين وهوا يقول >> هوب هوب هوب اسسسس ! تعرفي تسكتي تعرفي تاخذي نفسسسس ، تحكي في حاجات مش وقتهن بكل انتي ضامنه انه انا ولا انتي ح نعيشو بكرا ؟ بيش تفكري في حاجات بعد سنه واثنين ، معش تبكي واسكتي معش تبكيييييي
كملت كلامها ببكا >> ماتوجعش قلبي يا صالحين بعد مني ، واحكي الامك قوللها معش نبي خليها تجي منك لانه مني انا محدش ح يستوعب رفضي لكي ! امي بالذات طايره من الفرحه عشان بتفرح بيا
صالحين ابتسم >> وفرحيها
مجد زادت في بكاها >> صالحين عاد ! انت تفهم ولا تستعبط قتلك انهي
صالحين >> مش قلت معش تبكي ؟ شن في الموضوع حاجه تبكي بس كني شايفه عليا حاجه لي رافضتيني هكي ؟
مجد مسحت دموعها>> اللهم طولك ياروح
صالحين >> اسمعيني ! انا خشيت من الباب ، و مش ح نتراجع تفكيرك المظلم هضا حوليه يا مجد حوليه تفكيرك هضا وفكري فيا انا بسسس فكري هل انا مناسب لكي ولا لا من دون القصة لي حاطتها فراسك ، ولو شفتي فيا عيب واحد مش ح يناسبك مستعد نوخر
ما عطاهش فرصة تكمل كلامها ، صكرت التلفون وعزقاته عالسرير و كملت بكاها و هي كانت من يوم الحادث اتفادى فالشي هضا ! كل يوم خايفه يجيها عريس ، طول السنة هذي كانت على اعصابها وبعد ما سيبها مروان صارتلها صدمه ..يعني مروان اللي كان خاطبها و تعرفه ويعرفها سيبها بعد سمع منها القصه ، كانت وقتها جايته تشكيله و تبكيله متوقعه منها يوقف معاها ويواسيه ! بس ما قدرش يكمل قاللها بالحرف " مش ح نقدر ننحرم من اني نكون اب"
فوق صدمة عزا خوها وصدمتها في العمليه لي ح اديرها صدمها بزياده …. السنة هذي مرت عليها بطلوع الروح و الصالحين جاي توا يفتح في جروحها !
..
..
واللي كانت تفكر فيه عزق تلفونه ومش قادر يسمع بكاها ! كان عارف لو ما دارش هكي مش ح توافق عليه
وهوا كيف وليش محدش يسأل بس خشت راسه ! مش مفكر في بعدين مش مفكر في كلامها … يفكر بس في توا وانها توافق عليه
//
//
الساعه ١٠ ونص لابسه وتراجي فيه
سديم >> حرقت التلفون وهوا اكيد راقد
هديل ضحكت >> مستحيل يتغير
سديم >> حلال نكلم يحيى و خليه ينوض بعدها ويقلب الدنيا
هديل >> فكينا من المشاكل ، وطفي الضي بنرقد
سديم >> تي نوضي سادك
غطت وجها >> ما عنديش ما ندير
سديم >> حي على بكرا بعد بكرا بتمسك حوش
خذت مذكراتها وطلعت من جنبها
سديم >> ماما ماشيه بنشوف بدر فحوش امي طولت عالمحاضره
هناء >> معاك فلوس يا ماما
سديم تلبس في كندرتها >> معايا
هناء >> ردي بالك سلم بنيتي
سديم >> حاضر يا عيوني ، قتلك بالله اديريلنا بشاميل عالغدا
هناء ابتسمت >> راك تشبعي منه يوم يومين نديرو فيه
سديم >> نوضي الباير لي جوا تساعدك
هناء ضحكت علي مناقرتهن >> اطلعي الجامعتك
طلعت سديم خذت الباب في يدها ومشت لحوش جدها ، لقت نبراس فم الباب يسخن فالسياره ماشي شور الشغل
سديم>> صباح الخير يا سيادة الرائد
ابتسم>> صباح النور ، شن قايلك عالطلعه بروحك فشارع
سديم >> ياربي خطوتين الحوش
نبراس >> كلمي اي حد يصبيلك معش تعاوديها
سديم >> حاضر ، خوك المرزي وين
نبراس ضحك>> سيارته قاعده راقد شكله
سديم >> الصبر يا ربي " وخشت "
مشت شور داره دقت عالباب ما حدش رد
على طلعت مجد من دارها دوبها واعيه >> صباح الخير
سديم >> صباح النور ، كنه وجك عالصبح ؟
مجد لي كانن عيونها حمر من بكا امس >> شي شكلي بنمرض
سديم >> تحسابيني فرخه 😒 "ومستمره ادق على دار بدر بالقوه"
مجد >> ان شاء الله ماناضش
سديم >> محاضرتي بعد اقل من نص ساعه ! كذا النبي افتحي الباب وخشي مرات يقعد مش لابس من فوق ولا حاجه مانبيش نخش
ابتسمت مجد وفتحت الباب وخشت ، قدمت لجنب السرير
مجد >> بدر بدر
سديم >> انخش ؟
مجد >> تعالي
خشت سديم لقاته راقد وحاط المخدتين على وجه ، حولتهن وهزاته
نط بدر >> شن فيه ؟ كنكم
مجد >> انا باييييي
طلعت مجد وسديم بحتت فيه
سديم >> نوض صبي مش قتلك عندي محاضره! معقوله هكي
بدر مسك تلفونه >> شكلي طفيت المنبه
بحتت في منظره ، وهوا اتكى عالسرير ويمسح على وجه ومازال فيه النوم
سديم>> بتصبي ولا نكلم يحيى؟
بدر >> شن رايك نقول ما فيش مشي
سديم >> صبي يا بدر الدين هذي قرايه مش لعبه !
بدر>> اطلعي اطلعي بنغير دبشي
سديم>> مافيش داعي للانتكه كر اي حاجه واطلع
بدر >> سديم ابلطي
طلعت وخبطت الباب وقعدت تراجي فيه ، فتح باب داره وحاط الدبش على كتفه بحت فيها بنص عين وخش للحمام
خمس دقايق وطلع لابس !
سديم >> ١١ الا ربع راه
بدر ما ردش عليها خش لداره وخذا ساعته
سديم >> اخر مره تشيلني اخرررر مره " وطلعت تراجي فيه فالجنان "
وهوا يضحك عشان نرفزها
شويه وطلع مشى قدامها وركب فالسياره ركبت جنبه
بدر >> مافيش نسكافيه ؟
سديم >> في كف ! اطلع طولنا
بدر >> تؤتؤتؤ عليك جلاطه
بحتت فيه وبرمت وجها للقزاز وهي تقول >> معش تضرب على صدرك وتقول نوصلها مدامك بتنخمد
يطقطق عالدومان ب استفزاز >> شششش
حطت يدها و فتحت الراديو علاته وردت شور القزاز وهوا مبتسم يسوق
//
//
ومن هاليوم مر أسبوع
الوضع متوتر ، عند ليلى اللي مش قادره تنسى تمشي لمحاضراتها واتفادى في لجين … سهم ما يحكيش معاها بكثره شوية مسجات كيف حالك على شن دايره و خلاص
الباقي على نفسسس حالهم كلهم
نبراس ومرام لا هماا االي قادرين يحكو ولا هما اللي قادرين معش يحكو
الاثنين عارفين اللي صاير غلط ، حتى هوا اللي ماعندش قلب فاهم انه اللي يسير غلط … كل ما يشوف هديل يحس بحاجه تحرق فيه … يدزلها في مسجات يشريلها فاللي ناقصها يحاول يحكي معاها بس محد فاهم !
//
//
على نفس الحال كل يوم ، ماسكه التلفون تبحت فالتاريخ
ليلى >> عليك حاله
مرام >> باقي ١٨ يوم
ليلى اللي كانت دوبها خاشه من الجامعه عزقت شنطتها وقعمزت جنبها >> انا مش فاهمه شن اللي ح يسير يعني
مرام >> بنبدا حياة جديده ، مافيهش اي شي يربطني بيه … لا عده ولا اسمه ولا هله ولا شي نبي الايام يكملن ونتريح ووجع قلبي يخف
ليلى >> نسيتيه ؟
مرام >> هوا ما خذش معايا يوم ، عشان كنت كارهه حياتي معاه خلاني نلعن الحب وسنينه ! ونلعن البدايات والعلاقات وكل شي … اللي ما نسيتش اللي عشته معاه … الخوف الذل الاهانه كلهن ما نسيتهنش "دمعن عيونها " ربي كريم
قاطعهن صوت مسج في تلفون ليلى ، حطت عيونها عتلفون وبحتت في مرام
ميلت راسها بمعني شنو ؟
ليلى >> سهم
مرام ابتسمت >> وردي عليه
ليلى >> نحس في غلط اللي ندير فيه ، ماليش تقريبا عشر ايام طالعه من كابوس نجي نقعد نحكي مع سهم صاحب اللي كنت نحكي معاه ! مش تحسي الموضوع غريب شويه
مرام >> مافيش حاجه غريبه …. و هوا يسأل عليك عادي يعني
ليلى >> وشن نهاية الكلام هضا يا مرام ! شن الكلام لي يكون بين بنت وشاب ؟ شنو نهايته
مرام سكتت شويه وفكرت في روحها ، بعدين اذكرت كلام نبراس على سهم
بحتت فيها >> عطي روحك فرصه ، ما تفكريش انه لكي كم يوم ناهيه قصة ولا تحسبي الايام كيف ما انا ندير ، كل قصة بروحها ما تقارنيش روحك بحد .. ولو حسيتي انه فيه شي غلط وخري شن ح يسير اكثر من اللي صار
ليلى >> ان شاء الله خير ، خليني نخش نغير دبشي ونشوف ماما فالمطبخ … انتي راك تحسابي روحك جايه ضيفه تلحلحي
مرام >> انا لما كان عندي حوش بالغصب بيش نحط طنجره على نار
ليلى ضحكت وخشت دارها
ومرام ردت تبحت التلفونها وهي تفكر في كلامها الليلى اللي ما تقدرش ادير زيه ، حتى لو بتعطي لروحها فرصه بس مش معاه ! مش معاه هوا ، ماتقدرش
..
..
خشت للدار قرت مسج سهم
"روحتي من الجامعه "
ردت عليه
" كيف خشيت من الزحمه لي برا"
حطت التلفون تغير في دبشها ، برمت على رنت تلفونها
صكرت الدولاب و ردت
سهم >> شن الاخبار
ليلى >> الحمدلله ، نصارع في موال الجامعه
ابتسم سهم>> ربي يوفقك
ليلى >> يارب ، انت وين
سهم>> في المعرض
ابتسمت >> واكيد ولد عمك مسيبك بروحك
سهم ضحك >> حفظتي يعني
ليلى >> كل ماتحكي معايا تقولي مفروض بدر يجي بس ما جش
سهم >> بدر هضا حاله لو يلقى يفتحوله المعرض قدام الحوش بيش يتريح
ليلى ضحكت
سهم ابتسم >> نخليك اتريحي ، رنيت نسأل بس
ليلى >> تمام بنمشي لماما فالمطبخ ، مرام اختي مستحيل ترفع كبايه
ضحك>> ماشي سلام
صكرت الخط منه ، ممكن مكالمه صغيره مالهش معنى بس هي قلبها مش قادر يتقبل ! ماعندهش ثقه قلبها لي كان مليان حب قعد مليان خوف و قلة ثقه و شعور بعدم امان مع اي حد . ماتبيش تقعد هكي بس مش بيدها
أعتقد بأن الغفران قد يشمل كل شيء، إلا الشيء الذي أثار شفقتك على نفسك.✨
//
//
خش بدر للمعرض على تسكيرة سهم
بدر >> خير ان شاء الله الابتسامه
سهم >> غريبه جاي
بدر>> قلت نطمن عالحلال
سهم>> انت لو ينصبو عليك في مليار حرام ما تفطن اي حلال بس
ضحك>> قول بس كنك تخترف بروحك
سهم >> مش عارف
بدر >> تحكي مع البنت هذكي مازلت ؟
سهم >> ما قدرتش مانحكيش ، كل مره نقول اخر مره ونلقى روحي ران اخرى
بدر >> وشن اخرى؟ "وحط كراع على كراع"
سهم >> كذا بلا سخافه
بدر نزل كراعه وضحك ، وقدم شوره ويحكي بجديه >> مغير قول بس
سهم >> مش عارف شن نقول ، بس حاس انها ما تبيش
بدر>> وانت تبي ؟
سهم >> ما اظنيش في حاجه غلط
بدر>> والفرخ هضكي ؟ مش صاحبك
سهم >> لو كان صاحبي ما كنتش رفعت سماعة التلفون من اول مره وحكيت معاها اصلا وصكرت من هضك اليوم ونسيتها ، مش انا لي نطعن فالظهر ومع صاحبي فالغلط قبل الصح ! هو معرفة شغل بس
بدر >> معرفة شغل كيف وجك اسمحلي ، انسان خبيث السم في وجه مش فاهم كيف قادر اتعامل معاه
سهم >> مش هضا موضوعنا
بدر >> سير بس ما تفكرش
سهم >> نقولك نحس فيها م تبيش
بدر >> سهم ! الثقه لي راحت من البنت مش لعب عويله راه … البنت اللي صار فيها مش شويه
سهم >> وانا شن ندير
بدر غمزله >> ردلها الثقه ، حسسها بالامان ! وماتخذلهش ، ووقت تطمن خش البيت من بابه
بحت فيه و رفع حاجبه ، واتكى عالكرسي وهوا مربع يديه ويفكر
//
//
في القسم ، كان يمشي وفي جنبه ولد خالته
صالحين >> ماحكتلكش شي
نبراس ب استعباط >> من
صالحين بحت فيه بنص عين ورد عيونه قدام>> عمتك
نبراس >> ماحكتش شي ، من هضك اليوم لما جت قالت لي نبي الرقم معش حكتلي
صالحين هز براسه
نبراس >> ما قتليش شن حكتلك ؟
صالحين >> مش شورك
ووقفو فنص الدروج وهما نازلين قسم التوقيف
نبراس >> احكي كويس را نحطك مع اللي لوطا
صالحين >> اكيده ما قالتليش نحبك ازف ، هزبتني وصكرت
نبراس مسك يده وفصعها له >> انا عطيت الرقم لها مش راضي عليها بس عارفها بتفش غلها عطيته لها ، ما تقعدش ترنرن
صالحين فك يده وضحك >> تحكي مع شايب راه ! مش ليا حركات المراهقين
نبراس >> ما خايفه الا من الشايب انا تجيه مراهقه متأخره
خبطه على راسه >> انزل خلينا نشوفو شغلنا خلى الغراميات بعدين
سبقه نبراس ، وتنهد ونزل وراه وهوا يراجي في الرد ومن هضك اليوم اللي حصل فيه رقمها معش با يرن ويضغط عليها
//
//
واللي كانو يحكو عليها ، كانت في المطبخ
وخوتها الاثنين مقعمزين جنب امهم يهدرزو معاها
سالمين >> حكتلك جميله على صالحين يالهادي ؟
الهادي >> حكتلي يمي غير كان عندي شغل فتره لي فاتت معش فضيت نحكي مع مجد ونشوفها ، شن قالت هيه
فرج >> شن بتقول ، صالحين راجل ينشرى شرا
سالمين >> حكينا معاها سكتت ما قالت شي
الهادي >> نسمع منها الموافقه بوذني بعدها نرد عليهم
خشت مجد عليهم في يدها سفرة القهوه ، وقعمزت حذاهم
الهادي لي بطبعه كان راجل من الدقه القديمه يفهم فالاصول و يخاف ربي ، وكيفه فالطبع فرج بس الفرق بينهم الهادي اوسع بال من فرج لي كان حمّاق بس في نفس الوقت يقولو لي يعصب بسرعه يهدا بسرعه وهضا كان فرج
مسكت فنجان القهوه مدت الخوتها
الهادي >> مجد حكتلي جميله على صالحين ولد اختها ، وامي قالت سكتي ما عطيتيش رد
زمطت مجد ريقها ووجها انصفر و انحمر و اللي خايفه منه صار
فرج>> مجد !
مجد بحتت في الهادي>> باهي
الهادي >> شنو الباهي العرب طالبينك و يبو منه رد و اكثر من اسبوع تهيالي خلاص وصالحين ماهوش براني بيش نسألو عليه
مجد بتوتر >> مش عارفه ما نبيش توا
فرج >> وشن تبي ؟ تراجي فاللي سيبك يجي يرد عليك بعد ما سيبك وخوك ما زال ترابه ما نشفش و بدون اسباب قال ما فيش نصيب
مجد لي كانت عارفه الاسباب وهنا نفسهن لي مخلياتها ماتبيش تكرر التجربه مع صالحين
بحت الهادي في فرج بحده
الهادي >> اللي تبيه يسير يا مجد وانتي عارفه كلامي ، بس قوليلي شن سبب رفضك للصالحين
تقطعها سالمين >>صالحين مافيش عيب وكان هو راح منك مش ح يجيك احسن منه
بحتت مجد بعيونها في الهادي وبغصه قالت >> موافقه موافقه
//
//
متأخر كان قاعد في سيارة الشغل عنده دورية مراقبه ، السياره مظلمه و في سيارة قدامه فيها اثنين من الافنديه
متكي منزل شوي الكرسي ، ومغمض عيونه بتعب واعي بدري ومش راقد من الصبح والوقت متأخر والشغل لفوق راسه … بحت في تلفونه يدور في مسج من حد يطبطب عليه ! والحد هضا كان هيه اللي يحكي معاها يوم وعشره لا والاسباب واجد
بس برضو كان يقول خلي الامور كيف ما متعارف عليها عالاقل يجيه مسج من هديل باهي تسأل عليه عشان يرضى بالامر الواقع ويحس بيه … بس شي التلفون على حاله و قلبه هوا صايره فيه حاله ..
منع نفسه واجد بكل ، دز مسج
" شنو كم مازال يوم "
واللي وصلها المسج كانت تفكر فيه بس تمنع في روحها لحد ما جاها مسج منه ، واللي كان واضح انه بيفتح بس موضوع … ابتسمت بحرقه ! وتردد بينها وبين روحها
مش لكي يا مرام مش لكي يا مرام ، مش ح تعيشي عذاب مره ثانيه مش لكي ! صحصحي و نوضي الروحك ما تغلطيش مره ثانيه ، انتي مازلتي في عدتك شهر بين مرمطه ومحاكم وشهرين و شويه فالعده ، ما لحقتيش اتريحي عشان اتعذبي من جديد
دمعن عيونها وهي تردد فالكلام على روحها ، و قلبها يعصر فيها
ردت عليه " بما انه اليوم كمل ف مازال ١٧ "
..
..
ابتسم وهوا يشوف فالمسج منها لما طولت ما ردت عليه ، حس بترددها و فهم عليها
تنهد وحط تلفونه جنبه ، غمض عيونه من برا يبان هادي وغافي بس من جوا كانن فيه براكين يولعن فيه بشويه شويه
-تتزاحم الكلمات في حنجرتي فأبتلعها تحفظًا ليس قلقًا انما لا جدوى من لفظها-
//
//
نفس التردد لي كانو هما الاثنين فيه
كان فيه حد ثالث حاس بنفس الشعور ، خوف تردد توتر ! زعل و حزن