روايه حافة المنتصف
الفصل الرابع 4
بقلم ايه
كان في مكتبه حاط الملفات قدامه ويشوف فيهن ، دق الباب و فتح بسرعه وخش
بحت فيه >> شن قايلك على ام امها الحركه هذي ؟
الصالحين>> مش وقت ندق عالباب ونقعد نرجى فيك عند تقولي خش " وصكر الباب وجا حذاه"
نبراس >> تعتل امه وتخش عادي
صالحين>> اكبر منك احترمني
نبراس صكر الملف وضحك>> انقنك على اعتاب الاربعين خلاص
صالحين >> ثلاث اربع سنين وجايهن الاربعين راك تحساب روحك مراهق، "ومدله الملف"
نبراس>> شنو ؟
صالحين>> ملف الموقوف سليمان بكرا يترحل عالحبس ويقعد موضوعه عند القاضي
نبراس >> امتى المحكمه؟
صالحين>> نهاية الاسبوع هضا ، ومبدئيا هكي هوا حياخد عشر سنين عشان مش شوره قضية السرقة متاع السيارة شور الاثنين لي معاه وتحليله طلع نظيف يعني هوا حيازة وتجاره و لا والكارثه انه اللي يتاجر فيه نوع جديد ، مش تذكر لما حشاك لقيتو بقايا بودره في ارضية الحمام شلناها للمختبر طلع نوع جديد ، بس اللي فالسياره هضا المتداول لي ديما نمسكو فيه
نبراس >> ايوووااااه ، مدام فيها نوعيه جديده معناها سلملي على تشديد العقوبه
صالحين >> هي هذي "وصبا من حذاه"
نبراس >> مروح يا افندي ؟
صالحين >> طالع اه ، امك شن دايره غدا
نبراس بحت فيه >> نفس اللي دايرته امك
ضحك >> خالتك راه وامك خالتي يا شورّخ😂
نبراس >> باه اطلع اطلع
//
//
عند بابا اللي كان في حوش هل سليمان عشان يحكيلهم على قصة الطلاق
بابا >> انا ياصالح لما جاني باتك الله يرحمه وخطب مني مرام قتله مانبيش منك شي غير يصونها ويحافظ عليها بس ، ارادة ربي انه يتوفي بعد الخطبة بشويه بس مش معنى هكي انه سليمان ما يحسابش انه فيه كبير عليه اللي داره مش ساهل واعتقد عندك اخت متجوزه لو راجلها دار فيها هكي مش ح ترضى ف زي ما بديناها بالطيب ننهوها بالطيب تسريح باحسان خير من البهدله هذي
صالح>> والله ياحاج مش عارف وين نحط وجي منك انا خوه الكبير ومش عارف كيف سليمان دار هكي، انا مشيتله وحكيت معاه وقالي انه مرام جاته وحكت معاه في الموضوع هضا وانها بتطلق
بابا >> وشن قال لك؟؟
صالح مسح على وجه>> قالي مايبيش يطلق و انه مش اول حد ينحبس ويخلي مراته
بابا مسك اعصابه >> وانا مش مستغنى على بنتي ، اسمحلي ياصالح انتو ك عيله ما شفنش منكم الا كل خير بس الله غالب بيناتنا المحاكم
صبا بيطلع
صالح >> غير ياحاج خليك بس تغدا معانا
بابا >> يقعد الخير
وطلع من عندهم
//
//
كنت فالحوش وانا على اعصابي ، وليلى ماكانش عندها جامعة اليوم
ليلى>> مرام وترتيني بكل تبرمي من مبدري
مرام >> بابا طول بكل عند عيت سليمان !
ليلى >> فكينا منه معش تقولي اسمه يجيبلي في ضيق تنفس
بحتت فيها>> امالا انا شنو
على نزلت اسيل من فوق ماسكه لين >> شن صار
مرام>> مازال ما روح
حطت لين جنب ليلى >> تو عليش متوتره انتي
مرام>> مانبيش مشاكل يا اسيل بابا عنده الضغط والسكر ومحمد خويا ماعندش تفاهم خايفه يسيرن مشاكل بس كلا سليمان والله ما مدورته و كارهه اليوم الي عرفته فيه
اسيل>> ماتخافيش ان شاء الله ح تمشي على خير
مرام >> عارفات يا بنات على قد ما تحملت سليمان فترة الزواج وعلي قد ما حبيته قبلها يعني السنه وال١٠ شهور هذينا نحس فيهن اختفن توا في الاسبوع هضا من يوم جت الشرطه كل مشاعري انقلبن حرفيا كرهته ! معقوله كرهته بسرعه هكي!
ليلى >> الي داره فيك مش شويا معامله بارده و قلة قيمه و انعدام مسؤوليه و لله اعلم شن دارلك اخرى ماتبيش تحكيه
اسيل >> ساد غير القضيه اللي تحشم لي ممسوك فيها تلقائيا بتكرهيه
ليلى>> كلا انا ما نقبلش من زمان
سمعت صوت بابا خش ويحكي مع محمد خويا في وسط الحوش، بحتت فالبنات وطلعت
محمد>> كيف يعني ما يبيش يطلق!؟ بجوه هوا
قعد باتها يحكي فاللي صار، وكلهم يسمعو
خشت ليلى جابت البابا طاسة اميه ومدتها له وخلاته يقعمز، قعدت نشوف المحمد لي يهزب وماما اللي تحسبن و اسيل وهي اتبحتلي بحسافه و ليلى اللي تجري بين باتي وامي تجيبلهم في اميه وتهدي فيهم عشان ما يرقش عليهم الضغط
بحتت في محمد وجيت عنده >> انا صبيت في وجك لما جا سليمان وطلبني كم مره وعاندتكم ، انا راضيه ب اي شي عادي لو تبوني نقعد على ذمته اهم شي ما يسيرلكمش مشاكل بسببي انا مش مهم بس ما نبيش تشيلو همي و يقعدن مشاكل بسبب اختياري "ومسكت دموعي عشان ما نبكيش قدامهم"
محمد بحت فيها وعلا صوته>> مرام صكري فمك ، ما نشاورش فيك انا
الصديق بجديه بدون ما يبحت فيه>> صوتك وطيه مازلت عايش انا
سكت محمد اللي كانت اسيل تبحت فيه وتغمض في عيونها تبيه يهدا
الصديق>> مرام عطيتك له ب رضايا محدش جبرني وهضا نصيبك يابنتي ، بس لعند هنا ويفتحله ربي ما اناسبش واحد عليه قضية اتشيب الراس عارفك ما تبيش مشاكل بس انتن راس بنتين مش من كثرتكن عشان نعزقكن العزقه هذي ولا نفرط فيكن ، انهي الكلام سلم بنتي خوك يهزب عشان خايف عليك بس
سكتت مابيتش نزيد على كلامه ، كنت حاسه اني جيت وجبتلهم المشاكل كان الحوش هادي وكل حد لاهي في حياته ، جيت قلبته الهم عاصفه بشي انا ماليش ذنب فيه ! ليش الواحد ينخدع فالناس هكي ، معقوله انا مضحكه وما حسيتش بكل ب سليمان كيف انه هوا حقير ! كل يوم نلعن فاليوم لي شفته فيه فالجامعه لي عرفتني عليه في كل محاضره وكل يوم قعمزنا فيه مع بعضنا في كل مكالمة كلمته فيها في كل كلمة نحبك قلتها له
خشيت للدار لحقتني ماما
مرام >> امي الكلام كله سمعته الله يربحك ما تزيديش شي
حليمه صكرت الدار >> بنسألك بس ، مرام راك تطلعي حامل بس !
بحتت مرام في امها اللي كان تفكيرها زي اغلب الامهات وسكتت
حليمه>> احكي ما تحسيش بشي ما درتيش اختبار ماعرفتيش شي
مرام >> ماما اطمني مش حامل اكيده
حليمه>> متأكده
هزت مرام براسها عشان اطمن امها كذبت وقالت لها >> شكيت فروحي قبل ما ينمسك سليمان بيوم و درت اختبار وطلع ما في شي ثاني يوم هو انمسك
طلعت حليمه وهي مصدقه كلام مرام اللي كان كله كذب ، ما بتش تشغل امها عليها وتقوللها انه من اول شهر وكل حد فيهم يرقد في مكان، الهل مهما كبرو عيالهم يشوفو فيهم صغار ويخممو فيهم و يحرقو عليهم، كانت مرام حاسه بالثقل اللي حطاته على هلها ما بتش تزيد تحكي شي
خشت ليلى>> كنها ماما ؟
مرام >> اتأكد لو كنت حامل ولا لا
ليلى ضحكت على تفكير امها >> وشن قلتيلها
مرام تنهدت >> كذبت ربي يسامحني بس كله عشانها ، اكيد مش ح نقوللها اني انا وسليمان كيف الخوت اصلا !
ليلى سكتت وبحتت فيها >> عارفه انقنه ماهو راجل اصلا ١٠ شهور كيف قعدتيهن معاه وجه البنت هضا ؟
مرام >> قلة وعي ، كنت ديما نسمع اول سنة فالزواج صعبه وانا مش فاهمه صعبه كيف يعني ماحدش واعاني عالحياه هذي ولا انا سألت حد، كنت نتحمل ونجي على حساب روحي واجد برضو عشان محمد كنت خايفه نرد يقولي ما تجينيش وردي منين ما جيتي بعد عنادي على سليمان يعني تخيلي بعد العناد والمشاكل و عصبية محمد بعد فهم اني انا وسليمان نعرفو بعضنا قبل الخطبه وكيف حس اني حطيتهم تحت امر واقع ، نجي ونردلهم من ثاني شهر ! تي واعره بكل عليا قبل ما تكون واعره عليهم ، بابا مايستاهلش يسير فيه هكي بسببي اصلا وانتي عارفه انه من ابسط شي يرقى عليه الضغط والسكر و يتعب مانبيش نكون انا السبب انا حتى معاملته ليا اصلا زمطتها وسكتت
ليلى>> لو كان باته عايش را ماكانش وصلنا الهنا
مرام >> عمي الله يرحمه كان راجل مسقم ، سليمان كان يحسبله ف ميت حساب بعد توفى قعد يحساب روحه معش عنده كبير … الله يرحمه لو كان عايش وعلم بيلي داره ولده راه بدون ما حتى بابا يطلب طلقني من ولده
ليلى >> نصيب نصيب، صبي خلينا نسايرو ماما فالمطبخ خير ما تسمعنا اسطوانة بناتي بايرات " وبحتت فيا" ولا كان بتريحي خليكي تريحي ماتفكريش ف شي
مرام >> خليني نجي معاك نسمعو قصص ماما وهدرزتها
مديتلها يدي صبتني ومشينا لماما وانا عقلي مش معايا ، ومن التعب النفسي والتفكير و التوتر كنت نحس فروحي جسمي هزيل و راسي ما يوقفش صداع
//
//
ركبت اسيل مع محمد الشقتهم ، وحطت لين لي رقدت على طول و غسلت القيس وحطتله الايباد جنبه
اسيل>> قيس ساعه يا ماما بس راه مسموحلك ، ارقد ما اطولش عليه بعد ساعه ح نجي ونطفي يا حبيبي
هز قيس براسه ورد للايباد، ولعت الوناسه وردت باب الدار وجت لعند محمد اللي كان حاط يده على عيونه ومغمضهن
اسيل >> وين عقلك
محمد >> قاعد "وحول يده"
اسيل جت جنبه >> حمادي عيب يا حبيبي العصبيه والله تعبتني وراك وانا نقولك اهدا فكر قبل ما تحكي ماتخليكش عصبي ، تو مرام و عمي كانو يحكو بهدوء انت ليش ديما منفعل وتعيط
محمد اتكى عالسرير ومسك يدها >> قاهرتني مرام و نحس فروحي انا السبب كان مفروض نصكر راسي ومانخليهش تاخذه
اسيل بحتت فيه >> نصيبها هكي نصيبها تعيش معاه الفتره هذي ما تقعدش تفكر هكي حرام تفكيرك هضا
محمد حضنها >> عارفه اني انا مانهدش الا هكي
اسيل >> تعبتني وراك وانا نقولك اهدا
محمد >> سامحيني انتي الوحيده لي قادره تخليني نهدا وانتي الوحيده يلي متحمله طبعي
رفعت راسها وبحتت في عيونه>> ومش ح نخليك لحد ما تبطل عصبيه وقهوة ودخان
محمد >> وشن ح اديري لو ما وقفتهنش يا واعره
اسيل بعدت منه >> تحلم بيا طول عمرك
كر يدها وكرها عنده وهو يضحك >> نموت بدونك انا
ضرباته على يده>> شاطر فاللسان
//
//
عند ليلى اللي كانت تقرا ومش فاطنه التلفونها قالبته و حاطته صامت ، خذت بريك من القرايا وبحتت فيه لقت ادم ران مرتين ، ابتسمت وحطت على رقمه و رنت عليه
ادم >> قعدت نغار من القرايا راه لي واخذه وقتك كله
ليلى >> شن القرايا قدامك بس ، انت حياتي كلها
ضحك>> نحبك يا بكاشه
ليلى >> مرايفه عليك موت ، اخر فتره حست في قصة مرام والامتحانات قربن معش قعدت نحكي معاك كويس
ادم >> مش مشكله يا حبيبي ، شن صار مع مرام؟
ليلى >> مش عارف يا ادم خايفه عليها بكل والله ، لما جت مرام وحكتلنا اول مره انا واسيل كيف يعامل فيها سليمان كانت تحكي عشان بتعرف من اسيل بما انها متجوزه وهكي من اول مره قلبي انقبض منه بس كانت مش فاهمه وخايفه وصغيره و لما حكتلنا اول مره كانت لها ثلاث شهور بس متجوزه ما بتش تسرع بس توا نحس فيها طفت بكل
ادم>> تو بعد تطلق منه و تبدا حياه جديده ح اتريح ، هوا شن صار فيه باه ؟
ليلى >> ما نندروش عليه بكل بس تقريبا خلاص ترحل عالحبس عشان يبدا يتحاكم ، ومرام بتبدا في اجراءات الطلاق
ادم>> ان شاء الله خير، شن دايره انتي في قرايتك
ليلى >> ماشيه خلاص الاسبوع الجاي امتحانات و تكمل اطول سنة تعبت فيها
ادم >> عارفك قدها
ليلى >> ان شاء الله ياروحي ، انت وين ؟ مع سهم
ادم >> لالا مع جماعة اصحابي فالقهوة لما رنيتي طلعت للسيارة نرد عليك
ليلى >> خلاص يبقى خليني نكمل وبعد تروح كلمني
ادم >> مش نرن ماترديش
ليلى>> لالا بنحكي معاك واحشني بكل
ابتسم >> من عيوني
صكرت الخط تنهدت براحه ، على خشت مرام
ليلى >> نحبه
مرام ابتسمت وجت جنبها >> كنتي تحكي مع ادم ؟
ليلى >> اها لنا فتره ما نحكوش كويس عشان القرايا وهكي
مرام >> وعشان انا جيت وداعكتك فالدار
ليلى>> بلا سماطه انتي يومك كله يكمل فالمربوعه اصلا
مرام >> شن دايره باهي مع ادم ؟ "وقعمزت جنبها"
ليلى >> مافيش جديد هو شغل وانا قرايه محوتك نحصلو فضوه فالليل عشان نحكي معاه
مرام حطت يدها على خدها >> ولعند امتى تكليم عاد ؟
ليلى >> لعند ما يكون روحه، انا ماعمريش حكيت الادم عالخطبه وهكي بس هوا ديما يلمح انه لما يلم حق فلوس الشقة على طول يبي الخطبه والفرح قريب من بعضهن هكي يقول
مرام >> ليلى مش تقولي هذي جايه تنظّر عليا ولا تخوف فيا، انا صح كنت نقولك ما تاخذيش قصتي انا وسليمان عبره قدامك ومازلت لعند توا نقولك كل حد وظروفه وقصته وقلبه وحبه ، بس ليلى سريب العلاقات لما يطول الموضوع مش كويس بكل خليه عالاقل يجي يحكي مع بابا ومحمد ويفهمهم ظروفه ويقعد كل شي رسمي ، انا حكيت مع سليمان ست شهور قبل ما يخطبني وحسيتهن واجد بكل وكنت نحس فروحي ندير في غلط
ليلى>> ممكن معش نجيبو سيرته؟ ومعش تخششيه في كل حوار! خلاص انسسسسسيه اعتبري روحك بنت شباب و مازال ما حد خش حياتك بكل ، مرام انتي صغيره ومازال قدامك الحياة و ح تحبي الحب الحقيقي مش اللي انتي كنتي تحسابيه حب مع الاجرب هضا ! لا انتي تستاهلي حد يحبك بقلب نظيف زي ما انتي لما تحبي تعطي قلبك كله
مرام >> مازلت بنحب ؟
ليلى >> ح تحبي يا مرام وقولي ما قالتها ليلى و اطيحي بوجك اخرى وتنحبي و تجوزي وبنقعد خاله مش بجوك هيه
ضحكت مرام >> بسرعه م الفتي قصة
ليلى قرصتها فخدها >> مش تأليف يا نكد كله ح يصير ، وبعدين كنك انتي هزيله هكي ؟
مرام >> شكلي بنمرض
ليلى رفعت حاجبها
مرام>> تي اقسم بالله ما حامل نحلف عالمصحف عاد تي كنت عايشه مع رجل آلي مش كل مره ح نشرح الموضوع
ليلى>> تي مش قصدي هكي انا ، قصدي انك من يوم جيتي وانتي ما تاكليش وتخممي وحارقه دمك … كويس لعند توا اصلا ما طحتيش
مرام >> والله ما عندي نيه في حاجه نزر في روحي زر عشان ما نزعلش ماما بس
ليلى >> نديرو قهوه تشربي ؟ عندي قرايه بنسهر عليها على ما رن ادم
مرام >> ديري على ما صليت ركعتين وتعالي بيها للمربوعه
ليلى >> هي
//
//
نزل نبراس على صوت تبييب فتح الباب وطلع
نبراس>> كنك تقول جاي زفه تبيب من خشتك للشارع
صالحين >> ان شاء الله نزفك قريب " وغمزله ونزل من السياره "
نبراس>> خش امي عرفاتك جاي قالت لي كلمه نسلم عليه
صالحين>> تي ناعليا منها
نبراس خبطه على كتفه>> خش وانت ساكت
خش صالحين ووراه نبراس ، لقى بدر وجميله يحكو
بدر>> افندينا
صالحين>> تي وينك يالنسراف "ومشى شور جميله خالته يسلم عليها"
بدر >> قاعد ماد وجي فالمعرض
صالحين>> جموله كل ما تكبري تزيدي سماحه
جميله >> وين مختفي انت معش تجي ولا تسأل على خالتك
صالحين بحت في نبراس>> ولدك يخلي واحد يطلع من الشغل اصلا "وبحت في بدر الدين" وانت معرض ما معرض من امتى هالخبر
بدر غمزله>> اس نكذب قدامهم بس 😂
نبراس>> طنجره ولقت غطاها ، اظهر قدامي خالنمشو للقسم عندي ملفات
صالحين>> مشحورني ومدرس سيارتك عليش
نبراس>> ما عنديش مزاج نسوق
بدر >> ناعليا وخلاص
نبراس بحت فيه
جميله>> خلو وليدي في حاله
بدر >> هضا حالهم تحكي كلمه عالرائد ياكلوك وكال
على طلعت مجد ، فطنت لصالحين مصبي ردت تجيب في ايشربها من جوا وهوا شافها عشان كان مقابل الباب ونزل عيونه على طول سريع سريع ما لحقش
جميلة >> صلوحه ماتبيش تفرحنا بيك
بدر>> هضا يحساب روحه ولد العشرين قاعد على مهله حركلنا روحك الحق الرائد
نبراس رفع يده وراهم الدبله>> البسها عشان يخاطوك
صالحين>> مش قايل لا تحاسبني كيفك سحنتهم بيش خطبت ، بس مازال ما لقيت بنت الحلال
جميلة>> خليني نختارلك انا وامك
صالحين>> انتي وامي بذات ياجموله اطلعن منها بس 😂
طلعت مجد جت عندهم>> صلوحه كيف حالك
صالحين>> الله يسلمك شن اخبارك وشن دايره
مجد>> الحمدلله بخير
بدر >> صلوحه ما صلوحه ، مش كان عمتي وولد خالتي خلاص نلمعوهن ، احكيلك كلمة يا سيادة الرائد
نبراس >> مافيها ما ينحكى مش متحشمين قدامنا
مجد>> كيف خويا يا بايخين نسيتو انه كبر معانا هنا
صالحين>> احكي لعند الصبح
جميلة ضحكت>> خلوني نشوف عمتي سيبتها بروحها ، صلوحه خطم مره مره
صالحين>> حاضر ياخالتي ماتوصي شي
جميله >> سلامتك
خشت جميله و بحتت مجد في بدر >> تعال بنوصيك على حاجات من الدكان
بدر >> على حساب من
مجد>> على حسابي يا بخيل
بدر >> يبقى تمام
نبراس>> تاخذ قرش ندفن*ك بلا قلة ادب
بدر>> تي مش واخذ غير فكني من ندفن*ك و نقت*لك بس
مشى بدر مع مجد عشان توصيه عالحاجات لي تبيهن
نبراس بحت فالصالحين>> هيا نحن
صالحين >> اه هي هي
//
//
مرن اليومين هذينا واكثر حد كانن ثقال عليه هي مرام… اللي جسمها معش تحمل تفكير و توتر اكثر من هكي و تعبت
كانت حرارتها عاليه وخذت دوا و رقدت ، و اليوم محاكمة سليمان وما تندريش على شي او كانت ماتبيش تندري على شي بكل و لا محمد ولا باتها حكو قدامها اي حاجه عالموضوع … وكان باتها بكرا ماشي عشان يقدم اوراقها للمحامي بس لما سأل قالوله لازم يصدر الحكم في سليمان قبل عشان ياخذو ورقة الحكم ويرفعو بيها طلاق لضرر
.
.
يومها مرام كانت تحت البطانيه رغم انه حرارتها ٣٩، بس حاسه روحها بتموت من الصقع صوتها رايح راسها ما يوقفش صداع ومن قلة الاكل كل شويه تخش تستفرغ
كرت تلفونها من جنبها بتعب يدوبك فتحت عيونها المدمعات من الصداع ، حطت على رقمه و رنت وغطت روحها بالبطانيه
جاها صوته اللي فكل مره تسمعه تحس بجديته
>> الو
بصوت هالكه التعب من يومين ماحكتش حرف طلعت اول كلمه بحروف متقطعه وببحه >> الرائد نبراس
كان مش مخزن رقمها ورغم انه صوتها كان منتهي ورايح بس كيف عرفه ماتسألوش>> مرام ؟
مرام بنفس التعب>> قبل ما تقول اي حاجه انا اسفه وعارفه روحي ثقلت عليك واكيد تلعن فاليوم يلي عطيتني فيه كرتك لي فيه الرقم ، بس ما عنديش غيرك
كل الكلام مشى في وذنه عادي بس لما قالت ماعنديش غيرك ما فهمش شن صار فيه ، نفض روحه ورد عقله
وبجديه كعادته >> اول شي لاباس صوتك تعبان بكل ، ثاني شي انا هضا شغلي متعود تلفوني ديما يرن ورقمي عند نص بنغازي ف احكي بدون خوف ومقدمات
مرام بعدت السماعه وكحت ، ردتها وقالت >> ماتشوف باس ، اليوم كانت محاكمه الهم الي كان فحياتي ، وانا ليا يومين ما طلعتش من داري ولا سألت حد ومانبيش نحكي مع بابا ومحمد خويا بس بنعرف شن صار فيه ، لو تعرف
نبراس >> نعرف اها ، ملف القضية معايا اي شي فيه يجد يجيني
ردت مرام بعدت السماعه من جديد وعلقت تكح لحد ما نفسها راح على خشت ليلى عليها
ليلى >> مرام اقسم بالله لو ما تصبي معايا للمستشفى نحرش محمد يخش ياخذك بالغصب "حطت يدها على راسها " تي نار انتي و متغطيه بالبطنيه والدوا من امس وا دارش مفعول صبي
مرام ردت البطانيه غطت وجها>> ليلى خليني نرقد وطفي الضي عيوني
ليلى >> تي يغمى عليك وانتي راقده لا واكله ولا شاربه و بطنك فاضيه تي شن الانتحار هضا ! صبي خساره مانك تصلي و تقيمي فالليل وتعرفي ربي وعارفه انه اللي ديري فيه فروحك حرام
بحتت مرام في ليلى وحطت التلفون على وذنها ، شيرتلها مرام انه اسكتي نبراس عالخط
مرام >> سامحني ، كمل شن كنت تحكي
نبراس>> اسمعي كلامها وصبى
مرام >> هذي ليلى اختي ، وانا كويسه مافيا شي احكيلي بس
عاود كلمته بنفس الجديه>> نفس ما قتلك اسمعي كلام اختك وصبي للمستشفى ، وبعد تروحي كلميني ونقولك شن صار فالقضية
مرام >> ذل يعني ؟
بحزم >> اعتبريها اللي تبي تعتبريه ، بعد تروحي قوليلي
مرام >> نقدر نقولك مشيت وانا ما مشيتش
نبراس>> معاك رائد شويه ويخش علاربعين ، يعني نسمع صوتك نعرفك تكذبي ولا لا
جاه صوت ليلى لي كانت تسمع عشان صوت التلفون عالي وهي تقول >> لو كذبت حنقولك
وطت مرام صوت التلفون و فنصت فيها وردت تكح بالقوه
سحبت ليلى التلفون من مرام وردت >> حنشيلها للمستشفى
نبراس >> تمام تمام
صبت ليلى مرام بالقوة ، لبستها و ركبت كلمت محمد عشان يشيلها للمستشفي و طلعو
//
//
صكرت الخط وانا حاس روحي متخدر! او مستغرب ممكن من روحي ! كيف ميزت صوتها نقولو رائد ويميز كل شي م علينا ، كيف خذيت وعطيت معاها فالكلام نقولو يا سيدي شغلك و تلفونك ديما يرن بكوم قضايا ومشاكل وشكاوي كل يوم ، نقوللها لاباس عشانها مريضه نقولو موقف انساني يعني هذي مرضه وشي طبيعي تقول لاباس !
بس نجبرها تمشي للمستشفى عليش ؟ كلامها كله مر عادي بس لما قالت "اسفه عشان ثقلت عليك بس ماعنديش غيرك" حسيت بالمسؤوليه ممكن انه انسان متأمل فيا وماعندش طوق نجاه غيري
رفعت يدي حطيتها قدامي و قعدت نشوف للدبله اللي كانت هدية من هديل محفور فيها تاريخ خطبتنا ، بحتت فالتاريخ عليش بينحفر يعني هل هو مهم عشان نذكره ، مهم عندها ممكن … نزلت يدي و خشيت للحوش
وقفني صوت جاي من الصالة