روايه حافة المنتصف
الفصل السادس عشر
بقلم ايه
ردت وهيه قلبها يدق ، خوف ! او رياف ؟ ولا عشان عارفه انه اللي صاير غلط … مجرد ما سمعت الالو منه هدت و ما حستش بروحها الا وهيه مكمله معاه فالكلام وبدون ما يكون فيه شن تبي ولا عليش ران ! وهوا نفسسس الشي ، زي ما قاللها انه خلي المكالمة بيناتنا مفتوحه مش ضروري نتصل عشان سبب
نبراس >> وبس يا ستي قاعد فالسياره مروح شور الحوش
مرام >> خطرها ، ليلى تحكي مع سهم بس قتلها ما تقولش اني نحكي معاك
"نبراس سكت و هوا يغمض في عيونه و يمسح على وجه"
مرام >> مهما كان هوا ولد عمك ، وخطيبتك بنت عمه بما انك قتلي ما عندهش خوت
نبراس >> ان شاء الله خير ان شاء الله خير
خذت نفس ، على نوضت لين ضبحتلها ليلى تجيب الرضاعه
مرام >> لحظة بس
صبت وهوا معاها عالخط ، يبتسم وهوا يذكر في كلام بدر وهوا يقوله "عارف يا نبراس كلامك هضا كله ح اديره وادير اشر منه " وخبط ع قلب نبراس " بس لما هضا يتحرك"
لما نبراس قاله انا مش مراهق عشان ندير حركات ونكلم حد ونحكي معاها ونرقد عالخط ، تنهد وهوا يسمع فيها تقول الو
نبراس >> ايوا
مرام >> هذي بنت محمد خويا
نبراس >> قتيلي عندك محمد بس خوت!
مرام >> محمد خويا الكبير ، متجوز تقريبا من خمس سنين مراته لي شفتها معايا يوم المستشفي
نبراس >> فطنتلك انتي ما فطنتلهش
قلبها دق و كملت كلامها >> و عنده وليد وبنيه منها
نبراس >> مشاءالله
مرام >> وليلى اختي الصغيره "وضحكت وهيه تقول " و انت شاهد على قصتها الفاشله
نبراس >> تحكي مع سهم قتيلي ؟
مرام >> اه بالتقطيع يعني بس يحكو ، وبعد ما انت طمنتني من ناحيته خليتها تحكي معاه
نبراس >> صدقيني، شهر اخرى و ح يجي يخطبها انا حافظ سهم حفظ لو حس انه هذي هيه ، واكيد هوا حاس عشان هكي مكمل يكلم فيها
مرام ابتسمت >> ان شاء الله والله ، وبس يا سيدي هضوما حدنا
نبراس >> نحن اقل منكم ، ماعنديش غير بدر الدين خويا الصغير ، بس عندي مجد عمتي اصغر مني و كيف اختي بالضبط ، كانت يومها فالمستشفى يوم اللي شفتك
مرام >> مش عارف ما ركزتش يومها كانت فيه وحده بس معانا ما نعرفش لو هيه او لا
وقعدو اليوم هضا يحكو ، على هلهم و بدت شوي مرام تفهم نبراس وغموضه و شخصيته ، على قد ما هيه كانت واضحه وضوح الشمس من اول يوم .. هوا كان العكس
صكرت الخط وهيه زي كل مره تقول ، ما تعلقيش يا مرام .. مش لكي مش لكي مش لكي ! مش ح يكون معاك المكالمات هذينا مش ح يستمرن ، ما توجعيش قلبك ما توجعيش قلبكككككك البنت اللي ما لهش ذنب في شي خطيبته ما تخربيش حياتها بوها متوفي وهضا ولد عمها اين كانت هيه شنو ما لكش الحق تحكي مع خطيبها ! مراااااااممم اعقلي اعقليييي
خبطت على قلبها و ما قدرتش توقف دموعها ! بكيت وجع وبكيت غباء و بكيت تعلق في وقت غبييييي
- كُنت أعتقد أن حَدسي ميزة إلى أن أصبحتُ أخوض البدايات بقلق، أشتم رائحة الخيبة، وأرفع راية إستسلامي وأنا في خضم المعركة.-
//
//
نفس وجع القلب لي عند مرام ، كان يحس بيه شخص ثاني ! كان مقعمز مع ولد عمه فالجنان … مش من عوايده يدخن بس كان ماسكه و ينفخ بحرقه
بدر >> كملت شوط الدراما ؟
سهم بحت فيه
بدر >> ماهو ما تطلعنيش في الصقع هضا وتقعد تبحت فيا ونبحت فيك
سهم >> زهرة روحت من طرابلس !
بعد حط يده على خده>> وانت شن عرفك ؟
سهم >> شفت حسن خوها فالقهوه مبدري و سلمت عليه ، قالي انهم ردو هنا
بدر >> وباهي ؟
سهم >> بس
بدر >> وهضا عليش تحرق في ام الدخان ؟ واساسا كيف مازال تحكي معاه حسن انت بعد ما رفضوك بدال المره اثنين " وبحت فيه ورفع يده وهوا يقول " اثنين يا سهم عمي فرج يمشي ويردو فيه كيف العيل الصغير ! و امك تكلم و امها تصكر في وجها ! وكله داروه عشان خاطرك … عشان انت تبيها وتحبها باتك تنازل ومشى للمره الثانيه
خبط سهم على صدره >> وانا هضا شن نديرله باه ؟
بدر >> عارف اني متاع كساد ، بس راه نفهم في حرقة القلب ووجعه ! نفهم فيه ونعرف الحب شنو ، بس اعرف وين تحطه الحب هضا واعرف المن تعطيه
" وغمزله وهوا يقول " وين اللي حكيتلي عليها يوم المعرض
سهم >> ليلى قصدك
بدر>> اسمها ليلى ؟ مش قتلي تحكي معاها
سهم هز براسه >> ومعش تقول اسمها
بدر ضحك >> مدام بدينا في مرحلة اسمها معناها مازلت بتفكرلي في حسن روحو ولا ما روحش هوا واخته وهله
سهم >> كلمتها مبدري ، و قالت لي صوتك كنه بس ما حبيتش نحكيلها
بدر >> وقعدنا نفهمو الصوت كنه ما كنه ؟ حلو حلو الكلام
سهم قرن حواجبه>> بدر الدين !
بدر >> وانتو اللي يقوللكم كلمة الحق تقولوله بدر الدين ، المهم حكيتلها باهي ؟
سهم >> ما حكيتش شي البنت دوبها مستوعبه لي صار فيها مافيش داعي تشقى بهمي
بدر صبا قدامه >> يا حنيّن انت
على صوت تبييب نبراس بشويه
بدر >> اهو جا مراد علم دار افتح افتح الباب معايا
ضحك سهم وهوا يفتح معاه فالباب ، درس سيارته جوا ونزل التفت عليهم وهما يصكرو فالباب
نبراس >> صقع كنكم قاعدين هنا
بدر >> مكسدين
نبراس >> في حاجه تتاكل باه جوا
بدر >> لحق على مجد قبل ما ترقد
نبراس >> قتلك خطرها "وبحت في سهم"
سهم >> ايوه
نبراس>> اشقالي بموضوع الحوش بالله عليك امي سكنت بكل ! وانا مش فاضي "وبحت في بدر" وهضا كان نصبيه على طاوله في شارع ما يهنيش عليها
بدر>> جربني بس "وضحك"
سهم ضربه على كتفه >> شوري شوري تهنا
نبراس >> خلاص شوف بدر نفس الجماعه لي كملولها شقته خليهم يبدولي
سهم >> تهنا ما ادورهش
نبراس بحت في بدر >> تعلم القدعنه
بدر >> تعلمو مني انت وياه القدعنه في حاجات اخرى
هز نبراس راسه بمعنى ما فيش فايده وخش
ضحك سهم وبحت فيه >> كنه خوك ؟
بدر>> مستحيل يحكي
سهم >> متعارك مع هديل ولا شنو
بدر >> هي المسكينه حكت معاه بيش يتعاركو
سهم >> وكنه مايبيش يصبي على حوشه بروحه
بدر >> نبراس وجيجه واجد ، بس فاطنله اخر فتره رايح انظر كيف
سهم >> بلكي وجيج شغل
هز بدر براسه و ماحبش يحكي انه مستحيل يكون وجيج شغل
//
//
عشية ثاني يوم ، كان الهادي يحكي مع مجد فاللي حكاه مع الصالحين
الهادي >> مابيتش نحكي حذا امي ولا فرج واي حد ، عشان ما حد يضغط عليكي
هزت براسها انه يكمل ، وهيه اتهرب بنظرات عيونها من التوتر
الهادي>> الصالحين قالي انه الاسبوع الجاي ح يدير خطبه رسمية ، و قالي انه هوا واتي من كل شي بس يبيك انتي على راحتك تحددي وقت
مجد بحتت فيه >> شهرين كويس بيش نوتي حاجتي
ابتسم الهادي وهوا يقول >> حتى هوا قالي بعد شهرين اكيد بتشري و توتي حاجتها ، بس انا قتله نسألها
ابتسمت مجامله >> لا تمام تمام
لف بيده عليها >> اللي تبيها اشريها ، ما ينقصك شي … و النسراف بدر الدين يشيلك ويجيبك لا شغل لا مشغله
ضحكت >> ما يقصروش كلهم
الهادي >> يبقى بعد يجو الاسبوع الجاي نقوللهم بعد شهرين تمام
مجد هزت براسها
طلع الهادي من جنبها وهي حطت يدها على قلبها اللي كان يدق بسرعه !
مجد >> قربت يا مجد قربت ، هضا زواج مش لعبه هضا زواج و مسؤوليه ! خليك قويه خليك قويه مش ح يسيرلك شي اكثر من اللي صار ، هو اختارك و هوا عارف شن صاير فيك !
برمت وهي تصب في كبايه اميه و عقلها مازال يفكر
//
//
خش بدر يدور في سديم يحسابها في حوش جدها
مجد >> شن تبي تعيط
بدر >> سيسي وينهي
مجد >> في حوشهم ما جتش اليوم
بدر >> خرفي
مجد >> خاطا البنت
بدر >> نبي نسكافيه
مجد >> سحنت كبدها المسكينه يوم يومين تبي نسكافيه
بدر >> اششش خليها ادير باهي لي طلعت تعرف ادير حاجه
مجد >> سامططط
طلع مشى شور سيارته ، طلع الكبايه لي خذاها منها يومها وما ردهش لها .. بحت لقى سيارة يحيى مدرسه قدام حوشهم
بدر >> خرفي
دق الباب فتحتله هديل
هديل >> بدوري
بدر>> اختك وين
هديل >> جوا
بدر >> مع يحيى " ورفع حاجبه"
هديل ضحكت>> فالمطبخ فالمطبخ خش
خش بدر وهو ماكانش ناوي يخش ، بس هك عشان يحيى قاعد خش … خطم للمطبخ لقى سديم بارمه تغسل في الكبايه نزل عيونه طول وخش عندها
سديم >> ياحيوان فجعتنييييي ! "وحطت الايشرب على راسها"
بدر قارن حواجبه>> كنت منزل عيوني ما تخافيش ، وبعدين مش يحيى فالحوش عندكم عليش محولتيه؟ ولا بلكي يحيى خوك فالرضاعه وانا ما نندريش
سديم >> تحق فيا حاطته على كتوفي صح ! يعني لما نخش للدار ح نلبسه اكيد
بدر >> وعليش خاشه للدار
رفعت حاجبها ب استفزاز >> يحيى يبي نسكافيه نبي نديرله
بدر >> ومن قاله انك تعرفي تديريه؟
سديم >> العيله كلها تعرف اني ندير فيه سمح
بدر >> باه امسكي الكبايه ديريلي ، و تديريله يا سديم والله معش في كلام بينه
سديم >> تي كيف هكي ؟
بدر >> برا انا تكمليه رني عليا نجي ناخذه
وطلع "بحتت فيها هديل و زرتها الضحكه"
سديم>> وانتي كنك ما تقولي انه خاش بيش نحط حاجه علي راسي
هديل >> ما ركزتش والله
سديم >> شن نديرله هضا ! وكنه ما خش سلم على ماما
هديل هزب بكتوفها >> مش عارف ، هاتي نكمل نسكافيه يحيى فكينا من حلفان بدر ، وديريله متاعه
سديم بعصبيه>> حلال نديرله سم يشريه ، طلعيه له انتي
هديل >> كملي بس
سديم>> لا واخرى جايبلي كبايتي عليك دلاله غبره والله ما شارب فيها "حطتها فالحوض " وطلعت كبايه اخرى وقعدت اديرله
كملت سديم و مدتها الهديل >> اطلعي شيليله السم يشربه
هديل تضحك>> بعيد السو 😂😂
طلعت فتحت الباب كان بدر فم الباب منزل عيونه على تلفونه
بدر >> الحقوده وينها
هديل >> تسب وتلعن 😂😂
بدر بحت في يدها >> خذت الكبايه الحيوانه هذي
هديل >> قالت والله ما شارب فيها
بدر رفع حواجبه
هديل ضحكت>> ما دارتش اليحيى درتله انا توكل توكل
خذا منها الكبايه وركب في سيارته وطلع
//
//
مقعمزه عالمرايا تمكيج توتي في روحها للعرس وتحكي مع سهم
ليلى >> سهم عطلتني وانا معش كملت
سهم ضحك >> تو لكي ساعه ما كملتيش
ليلى>> لالا ما كملتش
سهم >> خاطري نشوفك
ليلى بتوتر >> ارعى الحلال والحرام ماشيه عرس راه
ضحك سهم >> عارف عارف
ليلى>> يبقى اسكت
سهم عرفها توترت>> اهدي ما نبيش صور راه
ليلى حطت الفرشه من يدها >> مش هكي بس
قاطعها >> فاهم والله فاهم ، و حقك ماتوثقيش في حد اين كان فنهاية ما طقيتيش شهر تعرفيني ف حقك
ابتسمت ليلى براحه>> بنمشى نلبس
سهم >> تم بلكي تدزي حاجه بالغلط
ليلى >> سهممممم
سهم ضحك>> باي باي
على خشت مرام >> كملت الماما شعرها ، هييييي قصدك مازال ما لبستي بابا بيشيلكم راه ، محمد دوبه دوب اسيل اكيده تبي كوافير
ليلى>> خلاص سكريلي بس البطمه من لاوره
مرام >> طالعه خيال ح تطلعي بعريس اليوم
ليلى>> فكيني را تسمعك امك
مرام >> شايلتك معاها ناويه "وضحكت"
بحتت فيها بنص عين >> عارفتها ، اسمعي لين شنطتها هنا ورضاعتها فالشنطه
مرام >> تي باهي وانتي تقول امهم ، بعدين قيس ليش ما خليتوش معايا تو يتعب اسيل فالقاعه
ليلى>> ما بششش لصق في محمد قال تو نخليه معايا
سمعن صوت باتهن ينادي من برا
ليلى >> حولي نلبس عبايتي
لبسن ليلى وامها وطلعن
الصديق >> نوصلهن ونجي انا عالسريع
مرام >> تمام باهي
طلعو كلهم ، ومرام خذت لين وخشت للدار معاها
..
..
يدوبك خمس دقايق ، مرام كانت تلعب في لين ومولعتلها اغاني اطفال
مرام >> يناعليياااا الدار انقلبت عشان حضرتك تسكتي وتبطلي عياط
لين تضحك
مرام >> اضحكي بعد ما قلبنا الدنيا طبعا
حست مرام بصوت بس ما ركزتش ، ردت بحتت في لين وكملت تغني في الاغنيه بيش تسكت وتوقف بكا وسمعت صوت باب البراني اصكر استغربت عشان باتها دوبه طالع
مسكت تلفونها وقلبها يدقققققق بسرعه وعيونها دمعن وتبحت في لين اللي حست بخوفها ، رنت علي محمد خوها والغريب لقاته مقفللللل
حطت على رقمه بدون اي تفكير
مرام بصوت واطي وبخوف>> نبراس انا فالحوش بروحي ونسمع في صوت مش عارف شن ندير مافيش حد …. شن ندييييير "ومسكت لين وصبت "
نبراس الي مش فاهم>> اهدي بسسس من معاك فالحوش كيف بروحك
مرام كانت تحاول تقرب شويه بيش تسمع الصوت>> هلى فالعرس بابا طلع يوصل فيهم وانا بروحي مع بنت خويا الصغيره ورنيت على محمد مقفل
نبراس >> ماتخافيشش مش ح يسير شي خليك في مكانك اه ! خليك في مكانك ماتحركيش خلى الخط مفتوح قوليلي حوشكم وين احكي
وهوا يحكي معاها نزلت سماعة التلفون بشوية و سمعت صوت مفاتيح ، شافت قيس خش يجري ووراه محمد من الفجعه طاح منها التلفون ونبراس اللي عالخط مات وعاش من الخوف
محمد >> بسم الله بسم الله كنك
مرام >> فجعتونييييييييي ما كنتش نحسابك جاي
محمد>> حطيت اسيل بنركب ندوش من الصبح وانا فسياره ماتريحتش
مرام >> تمام تلفونك وين باهي رنيت عليك
محمد >> طفى شحن توا علقته فالسياره يشحن على ما دوشت
هزت براسها ورفعت تلفونها وحطت لين لوطا
محمد >> خلي قيس معاك وانا طالع تو ناخذه مش طالع لعند يجي باتي ما تقعديش بروحك
مرام هزت براسها ، ومحمد من الاستعجال ركب بسرعه… واللي كان يحرق عالخط بعد سمعها تحكي وفهم انه خوها هدن شويه نبضات قلبه
رفعت السماعه ويديها فاشلات من الفجعه >> طلع محمد ، محمد خويا
نبراس >> عارفه اني ركبت للسياره ! وكنت بنطلع
مرام حطت يدها على قلبها >> انفجعت والله انفجعت وما خطرش في بالي الا انت بس
نبراس >> اشربي اميه
مرام >> تو نشرب
نبراس >> كيف بس هلك يخلوك بروحك ! كيف
مرام>> بابا مسكين دوبه طلع يوصل فيهم, وانا ماحبيتش نمشى مش في وقت نمشي فيه لعرس بكل
نبراس >> مهما كان كنتي مشيتي معاهم فالسياره
مرام >> خلاص اهو محمد جا مش حيطلع لحد ما يجي بابا
نبراس >> خوفتيني عليك
صحصحت من خوفها و قلبها دق بس مش من الخوف المره هذي ، من كلامه
مرام بربكه>> خليني نصكر العيال بروحهم ومحمد شويه وينزل
نبراس >> تمام ، اي حاجه رني عليا ماتخليش خوك يطلع اه ماتقعديش بروحك
مرام >> تمام تمام
صكرت الخط وعزقت تلفونها ، من الفجعه ومن كلامه وكيف انها في كل مره حاجه تشيل فيها شوره ، ضغطت علي يدها و نفخت بزعل من روحها واللي ادير فيه
//
//
وقت ما رنت عليه مرام كان فالمكتب ، طلع يجري للسياره و هوا حركها وبعدها فهم انه اللي جا خوها
وهضا كله على عيون من ؟ على عيون الصالحين اللي شافه طالع بسرعه من المكتب انفجع ولحقه ، شافه وقف السياره ويحكي بالتلفون ، قعد مصبي مقابله ويدخن لحد ما يكمل
نزل نبراس من السياره وفي يده التلفون وكان قارن حواجبه
صالحين >> شن فيه ؟
نبراس >> الله يلعن الوقت الغلط الله يلعن قلبي و الله يلعن الشيطان وساعته
صالحين >> استغفر استغفر ربي معش تلعن
نبراس >> استغفر الله العلي العظيم "وقعمز على حاشية الدروج لي قدام المركز ومسح على وجه و رد يستغفر "
صالحين لي كان مصبي جنبه >> لو سألتك من اليوم لعند بكرا شنو فيه مش ح تقولي ، مش فاهم شن صاير بالزبط ، بس عيونك يحكن مليون حاجه ! اساسا اول مره نشوف لمعة عيونك
هز نبراس براسه وحط يده على وذانه >> مش وقته
مش وقته مش وقته ولا هو صح ! مش وقته شعري بدا يطلع فيه شيب
صالحين>> وطي صوتك بس واهدا اهدا واطلع للحوش معش تكمل شغل انت لو تقعد هنا احتمال تق*تل حد
ونزل جنبه >> هات سلاحك
نبراس >> مش لدرجه هذي عاد
صالحين >> مش ضامنك لما تفصل وانت توا ما تحقش قدامك هات ام سلاحك " حوله يده من جنبه و فك السلاح حطه عنده" هي توا توكل توكل شغلك عندي تو نصكرلك مكتبك
صبا نبراس بدون ما يحكي ولا حرف وركب في سيارته ، وعيون الصالحين عليه اللي اول مره من وهما صغار يشوف ولد خالته هكي
//
//
روحت ليلى من العرس ، ومقعمزه تمسح في مكياجها وتحكي مع مرام الي ماسكه لين واطبطب عليها عشان ترقد
ليلى>> وخلاص ماما تقعد تبحت فيا وانا نبحت فيها لحد ما فهمت اني ما نبيش قالتلها لالا مازالت تقرا
بحتت فيها مرام>> منو هيه
ليلى >> هذي ثاني مره نحكي القصه ، مرات خال اسيل حكت الماما لو يخطبوني الولد اختها ولا انظر من
مرام >> و شن شكله تو بعد تروح اسيل نسألوها
ليلى >> لا انتي كنه عقلك اليوم
مرام >> ششش لين رقدت خليها حذاك ح تنوض ادور امها فالليل
ليلى>> خليها عالسرير بنصلي العشا و نجي نرقد حذاها بطلانه بكل ، قيس الدلوع على ما قتله هيا معايا مابش قعد مع امه
مرام >> اكيده لاقي هرجه عويله
ليلى>> دزتلك اسوله قرعتك من العشا فالمطبخ وحطت المحمد مسكينه تبيه يسكت عشان يخليها تبات بدون نكد
مرام >> هكي مرات الخو ولا بلاش سلمها دزازه
ليلى ضحكت>> طالعه قمر اليوم كان غير روحت مع محمد
مرام >> ناريته لعند توا محمد قاعد غادي
ليلى >> الساعه قريب تخش فال ١٢
مرام حطت لين و ضحكت >> هيا اسيل اصلا تهبل بكل … خليني نصبي ناكل
صبت وهي عقلها مشوش، وليلى حست بحاجه بس ما بتش تكثر عليها
مسكت ليلى تلفونها لقت سهم دازلها مسجات لو روحت ولا لا ، ابتسمت بدون ما تنتبه الروحها و ردت عليه وبعدها رن عليها وقعدت تهدرز معاه وتحكيله عالعرس وهوا يسمع ب اخر انسجام
//
//
محمد >> ماتبيش تروحي معايا يعني
اسيل ابتسمت >> بكرا مروحه خلاص
محمد >> نبات بروحي يعني
اسيل بحتت فيه وميلت راسها>> روح تعشا وتريح دزيتلك قرعتك مع ليلى من العشا انت ومرام
قرب منها خطوه>> مافيش حاجه باه
اسيل >> في كف ، والحوش مليان اطلع
محمد ضحك >> باهي نحبك
اسيل بسماطه >> وانا نحبك اطلع اطلع
محمد>> خشي ومعش تطلعي هكي
اسيل >> حاضر
بكرا تعال تغدا هنا جمعة وجيب معاك لين رايفة عليها خليها تلعب مع البنات
محمد>> وانا باهي
اسيل>> انت تجي اتغدا وتطلع تشوف لو عندك شغل و تروح بيا فالليل اه مش تجيني بدري بكرا بنردو الحوسه
شير على عيونه >> خلاص خشي
برمت خشت وهوا طلع وصكر وراه الباب
//
//
روح المحروس للحوش ، و قعد ساعه وهوا فالسياره يفكر ويفكر ويفكر ومش قادر ينزل ، مابش حتى يبيب ويخشش سيارته جوا
نزل بعد ساعه بهدوء وخش للحوش وصكر الباب ، وهوا فالجنان طلع تلفونه وحط على رقمها مابين يرن ولا ما يرنش !مش قادر يطيح اكثر من هكي بس مش قادر يوخر
خش وكتب مسج
"هلك روحو ؟ ، ردي بسرعه بالله "
ثواني وجاه الرد منها اللي كانت تحاول تاكل فالمطبخ و عقلها عنده، وكانت فاهمه انه دز مسج عشان مايرنش ويسمع صوتها
"روحو من مبدري اه "
طلع من المسجات ورفع راسه للسماء ، حط على رقم هديل ورن مرتين كان يبي يحكي معاها يبي يحاول ب اي طريقه يقرب منها ما يبيش يحس بالغلط
بس ما ردتش ، على غير عوايدها اليوم بالذات رقدت بدري كأنه كان فيه حاجه تمنع فيهم يحكو او يتقربو !
حط التلفون في جيبه ، وخش للحوش
وهضا كله كان على عيون بدر الدين لي كان عالروشن يشوف فيه
بدر >> اهو خش توا
صالحين>> طيحلي ام قلبي له ساعه طالع من المركز
بدر >> شنصاير معاه باه ؟
صالحين>> مانعرفش بزبط ، بس شكله لي نفكرو فيه انا وياك
بدر >> ان شاء الله خير وخلاص
صالحين>> هي ليلتك سعيده
بدر>> سلام سلام
صكر بدر وهوا يفكر في حال خوه الوحيد والي ما يحبش يشوفه هكي ، تعود يشوفه قوي و كل شي حازم عنده ما كانش حاب في يوم يشوفه مهزوز هكي
//
//
في العشية ،فالجنان كانن البنات مع مجد ويفكرن معاها على يوم الدفع
مجد >> مانبيش ندير سريب واجد
هديل >> انتي ما اديريش نحن بنديرو عاد
مجد >> مش على هكي ، بس قصدي كله شور الرجاله والصبايا ما فيش حد براني العيله بس
سديم >> باه هيا قوليلي شن اللي ناقص" وكانت ماسكه ورقه وتكتب فالنواقص "
مجد >> كتبتي مناديل ؟
سديم >> كتبت ، و الحلو حجزنا فيه من امس … و القهوه ح نجيبو من المطحن … و العشاء طبعا شور عميمه جميله قالت … و بوكسات الرداده ح نوتيهن انا وهديل يومها
مجد >> يبقى معش فيه وقت ، حنطلع اليومين هذينا نشري الناقص
على طلعت بدر لابس ومتشيّك كأنه عنده موعد مهم
بحتت فيه سديم من تحت التحت وما بتش ترفع راسها
مجد >> اهو النسراف
بدر >>مافيش احترام بكل
مجد >> انتو احترموني انا لا
بدر >> شن تبو فيه النسراف
مجد >> تشيلني بكرا ولا بعد بكرا بنجيب حاجات الدفع
بدر>> كبرتي و بيديرولك دفع " وضحك" عليك دنيا
مجد >> بتشيلني ولا نحرش باتك
بدر >> هو انا نقدر ما نشيلكش يا دلوعتنا كلنا انتي
ضحكت مجد >> ايوه هكي انعدل
و بحت في سديم لي منزله راسها وتخربش عالورقه لي فيدها ، ورد بنظره شور هديل
هزتله براسها وضحكت بدون صوت
قرب بدر يده وكر الورقه لي فيدها ، وهي نطت انفجعت عشان كانت سارحه
سديم >> بدرررر ! را مش خفة دم هكي شي مره ح يجيني السكر منك
بدر>> وين سرحانه
سديم >> نكتب فالنواقص جيب الورقه ما تصغرش عقلك
بدر >> تخربشي انتي ما تكتبيش فالنواقص " وبحت فالورقه"
سديم>> نقعها
بدر >> عليش قالبه وجك
سديم>> من معاملتك الزفته ، وبعدين ما تاخذش عليا واجد مش حنكبر عقلي ديما … مش انت لي تقولي ندير المن و مانديرش المن نسكافيه
بدر >> اديريلي انا فقط ! ونقص يدك لو درتي اليحيى
سديم >> نديرله فيه كل ما نتلاقو فحوش جدي "ورفعت حاجبها بتحدي" عاجبك ولا مش عاجبك
بدر اللي مش بساهل يتنرفز مش فاهم ليش تعصب قرب منها >> جربي ديريه ونسمعك دايره
سديم >> وشن ح ادير !
بدر >> جربي وح تشوفي وقتها
سديم>> انت متعود تحكم فالناس ولا شنو
مسك يدها فتحها وحطلها فيها الورقه ، انتفضت ووخرت
بدر ابتسم >> اه متعود
سديم >> اخرلك مره تلمسني
بدر >> ريت هالموناليزا لي مسكناها "وطلع وخذا الباب فيده "
في وقت المناقره هضا ، قربت هديل من مجد
هديل >> رن امس نبراس مرتين
مجد >> والله ! ليش ما رديتيش
هديل >> كنت راقده ، تخيلي الساعه١١ تقريبا رن
مجد >> ومن امتى ترقدي ١١
هديل>> مش عارفه ! امس من دون الايام نعسانه
مجد >> باهي ورنيتي عليه بعد فطنتي
هديل>> نضت على صلاة الفجر استغربت بعد شفت المكالمات ، رنيت ما ردش … وفالصبح بعد نضت برضو ما لقيتش معاود حتى .. رديت رنيت عليه قالي كان بيسأل عليا بس
مجد >> وهذي خطوه كويسه اللي ران فالليل ، معناها في مجال انكم تحكو
هديل هزت كتوفها>> مش عارفه
جت سديم جنبهم >> ولد خوك هضا انسان صايع وقليل ادب
مجد >> حرام عليك
سديم >> يبي يعامل الناس كلها كيف ما يعامل فالفرحات لي يعرفهن ، يتحكم فيهن و يفرض في شخصيته يحسابه صبح
هديل ضحكت>>بس انا ما يديرش معايا هكي انتي تعاندي فيه
مجد >> عشان سيسي جوها سمح بس يستفز فيها
سديم >> ح نكرها هكي ، معش يستفزني مره ثانيه ويتحكم فيا
مجد >> كيف خواته انتي وهديل خايف عليكن
سديم >> بيجلطني مش خوف هكي
مجد ضحكت >> انتي اهدي بس ، ومشيه على قصاد عقله معش تعانديه بدر لما تعانديه يقعد كيف العيل الصغير
سديم>> هوا عيل صغير اصلا " وقلبت وجها ومسكت الورقه" هيا قوليلي وين طقينا فالحاجات
وردن البنات يخططن الحاجة الدفع ، وسط تفكير مجد اللي معش حكت مع الصالحين ولا هوا رن كل اللي كان في بالها انه يبي الخطبه تقعد رسميه عشان يرن احتراما لنبراس وهكي
كان شعورها ملخبط ! ومحدش ح يفهم شعور مجد بالمللي الا اللي مجرب شعورها واحساسها … احساس انها انخذلت مره ، واحساس وحده تبي تعيش شعور كل بنت تتمناه ، وشعور انها مش عارفه شن لي ح تخش عليه هيه حرفيا خاشه على شي مجهول
//
//
قاعد قدام حوش هلها فالليل يراجي فيها تطلع بيش يروح بيها بعد ما كمل العرس
رنت عليه
اسيل >> كذا قرب فم الباب شويه ، خوذ لين مبدري تعيط و تمسك فيا وانا نلم في دبشي
محمد عزق الدخان مع الروشن >> هيا تمام
"فتح باب السياره ونزل" وكان باب حوش هل اسيل مردود ، وقف فم الباب وما بش يخش تحشم ، على طلعت اسيل ماسكه لين فيدها ومحمد مطبس راسه مش فاطنلها طلعت
رفع راسه على جري قيس شوره ، شاف اسيل طالعه و شاف وراها ولد خالتها اللي قاعد جوا يحكي فم الباب الجواني مع ام اسيل