روايه حافة المنتصف
الفصل الحادي عشر 11
بقلم ايه
ليلى >> اطلعي عشان مش حنقدر نمسك اعصابي حنفش غل غلي فيه ، لو حد جا نبهيني
طلعت مرام وصكرت عليها باب الدار ماحبتش تمنعها من انها ترد عليه ، كانت شايفه انها ترد وتواجه احسن ماتدس في قلبها
مسكت ليلى تلفونها ومسكت معاهن دموعها الي ماتبيش تخلي ادم يسمعهن و ردت
ادم >> الو
ليلى >> عارف انه الصحه سمحه لكن لما تجي كلها فالوجه ح تقعد كارررثه ما لهش حل
ادم>> ليلى خليني نحكي
ليلى >>شن بتحكي يا ادم ؟قصدك ران عشان تبرر خيانتك بيش تصدمني فيك اخرى! الكلام واضح انا مسكت تلفون لجين شفت رقمك ورسالتك بعيوني! كيف دازهن بالغلط حتقولي هكي صح لاني حافظه كل تبريراتك؟ من امتى عندك رقم لجين باهي ؟ الموضوع مافيش شن تحكي ولا تبرر
ادم>> مش حنقولك مش غلطان ولا نبررلك غلطان وعارف والله مانبيش حد غيرك و غلطت لما كلمتها ، قبل ست شهور كنت جاي عشانك لجامعه ووقتها لقيتها هيه وانتي ما جيتيش يومها شفتها مشيت عندها نسأل عليك قالت لي مانعرفش كنها ماجتش عطيتها رقمي قتلها لو جت رني عليا يومها كان عيد ميلادك وجاي بنفاجئك
قبل ما يكمل كلامه قاطعاته ليلى >> ومنها اطور الموضوع قعدت ترن عليها وتهدرز معاها! كنت تقدر تمسك تلفونك تدزلي وينك و حنرد نجاوبك، ست شهور وانا مغفله! ست شهور تطعنو فيا في ظهري… ياريت متعرف عليا من سنين نقولو مليت مع انه الخيانه مش مبرر، بس وقت عطيتها رقمك يدوبك تعرفني خمس ست شهور بس شن السهوله لي انت فيها ! لا وهيه ماصدقت وعشان تعرف انه الموضوع حقير ليش ماحد فيكم حكالي ليش ماجت هيه قالت لي را ادم ج يسأل عليك نيتكم مش نظيفه انت وياها
ادم >>ليلى اهدددددي و اسمعيني انا غلطت و اعترفت بغلطي، ضعفت وحكيت معاها وهي كانت وقت مانلقاكش انتي نلقاها خلتني ندورها و نرن عليها
ليلى قطعاته بصوت عالي >> مانبيش نسمع قررررررفففففف اسكت و صكر و امسح رقمي وقت تتعلم كيف تقعد راجل رن عليا
وهنا ادم معش تحمل كلامها علا صوته >> راجل غصبا عنك وعنها كنت نحاول نهديك بس انتي ما ينفعش معاك شي ! ماتنسيش انه صورك عندي ماتكثريش عليا خير ما نوصلهن المحمد ،اعقلي وحطي عقلك في راسك
وفوق صدمة ليلى زادت صدمتها ، صكرت الخط في وجه و حتى دموعها م نزلنش المره هذي … كيف كانت مش فاطنه الحقارته معقوله يهدد فيها بصورها يلي دزتهن له ببراءه وغباء وهي تحساب انه هضا الي بتكمل معاه حياتها!
خشت مرام بعد معش سمعت صوت ليلى لي كان عالي وجت لعندها
//
//
عند بدر الدين ، دوش ولبس وطلع لعند حوش عمه
دز مسج "برا انا"
دقيقتين وفتحت الباب ومدت راسها
سديم>> كنك ما رنيت
بدر>> بنعيشك شعور انك دايره موعد غرامي "وغمزلها"
فنصت فيه>> ولما بنعيشه اكيد مش ح يكون معاك يعني
دفلها راسها بيده وخش رد الباب>> بيش نقصلك رقبتك و رقبته اصلا
سديم>> حلال عليك بس
كر منها الكبايه لي كانت فيدها>> لا ناويه بدال ماتقولي لا معاك لا مع غيرك
سديم >> اطمن لا معاك لا مع غيرك عشان انا مش هكي ولا عندي راس ، بس بيش تسقم اسلوبك الشوارعي لي تحكي بيه معايا
ضحك و هو يشرب >> مكثره سكر حاطه فيه صبعك ولا كيف
رفعت حاجبها وتنهدت>> شي يوم ح نقطع الكلام معاك بكل بيش تشعف
برمت وهي تقول>> الكبايه اه تردها
خشت وهوا يضحك بعد م نرفزها و برم وصكر الباب وراه وطلع
//
//
كان في القسم يبرم علي مكاتب الافنديه
نبراس >> قسم التوقيف من فيه
الشرطي>> قاعدين فيه ماتشغلش بالك
نبراس>> متاعين العركه شن صار فيهم
الشرطي>> ترحلو اليوم عالمحكمه
طلع ومشى شور الصالحين ، لقى الباب مفتوح خبّط وقعد مصبي برا
صالحين>> تي خش تحسابني دلوع كيفك لازم ندقو عالباب
نبراس>> احمد ربك اني دقيت وماكسرتش الباب على راسك بعد لي درته امس
صالحين >> كان لازم تعرف اني انا عارف بحالتها
نبراس>> و اطلعني عيّل قدامها وتقوللها اني حكيتلك
صالحين>> نبراس فاهمين بعضنا نحن ما حكيتش الا وانا عارف انها لازم تفهم اني عارف ، وبعدين انت فاهم اني يوم طلعتها من المستشفى لو انت ما حكيتليش كنت بنحطك ونلف نرد عالمستشفى ونفهم كنها
نبراس >> الزبده ، مازالت على نفس كلامها
صالحين >> معناها الخطه ب ح تبدا " واتكى عالكرسي"
وقبل ما يحكي نبراس رن تلفونه طلعه من جيبه ويحكي مع الصالحين >> فكني من الخطط احكيلي فقش ما تحطنيش في موقف سامط
"رفع التلفون بحت فيه شاف اسمها يرن ! الاسم اللي يصارع في روحه من شهرين انه ما يرنش عليه "
صالحين بحت فيه >> نبراس فيه حاجه!
هز راسه بلا ، وبرم شور مكتبه
رد وهوا يصكر فالباب
//
//
قبل ساعه ، عند مرام
بعد ما خشت على ليلى بيش تفهم منها شن صار ، حكتلها ليلى و هي تبكي
مرام >> بلا بكااااا عشان نفهم
ليلى>> يهدد فيا بصوري تخيلي !
مرام >> شن هنا الصور
ليلى>> صور عاديات وبحجابي، ينقعهن ويشرب اميتهن خليه يدزهن المحمد بيش يكسرني ويكسره بالمره
مرام >> اللي يهدد خواف ، ادم حقير وهذي الورقه الوحيده بيش يلوي ذراعك ! زي م كان سليمان لاوي ذراعي بهلي اللي جبرتهم عليه ، كان كل ما نتعارك معاه يقولي ماعندك وين تمشي ، كنت محسسته ب اني خايفه وهضا اكبر غلط الوحده اديره انه تبين انها ما لهش حد
ليلى>> ماخليتش يكمل كلامه صكرت في وجه اكيده مشى يرن عليها التعبانه لخرا
مرام >> انسيهم طلعيهم من حياتك وانا ح نصرف في موضوع ادم مش ديما ح يجو علينا و يبهدلونا في جرتهم
على دقت الباب متاع الدار خشت اسيل ودغري بحتت في ليلى
بحتت فيها مرام >> اسوله ماما نزلت ؟
اسيل>> اه يا حبي قالت نديرو قهوه مع بعضنا ، محمد طلع بقيس للدكان قتله جيبلنا معاك حاجه حلوه "وميلت راسها شور ليلى"
مرام>> اسمعي ، خليك مع ماما لاهيها ، انا حنخش للمطبخ ندير قهوه وبنحكي مكالمه وقولي الماما ليلى راقده
اسيل >> باهي فهموني شن فيه كنها ليلى وجهها هكي
مرام >> ح نهدرزلك
ليلى>> انا من امس مش راقده بدن عيوني يفقدن ف بنرقد بجد ، مرام على من بترني
مرام >> تريحي انتي وارقدي ما تفكريش في شي
طلعن اسيل ومرام وصكرن الباب
اسيل >> ادم ولا شنو؟
مرام >> طلع احقر شخص ممكن اتخيليه
اسيل انصدمت >> انا جنب عميمه كملي وتعالي طيحتن قلبي
مشت للدار ، ومرام خشت للمطبخ حطت على رقمه اللي طول الشهرين وهي تبحت فيه بدون ما ترن بس المره هذي رنت
نبراس >> الو
مرام >> ايوا ، انا مرام
نبراس >> نعرف
مرام ابتسمت>> كيف حالك؟
نبراس >> الحمدلله ، انتي شن دايره وصحتك كويسه ؟
مرام تنهدت >> بخير الحمدلله على نفس الحال
نبراس >> باهي تمام " وتنحنح"
مرام >> لما كنت نرن عليك من قبل كنت تقولي معش اترددي لما ترني ، ف المره هذي بدون ما حتى نفكر رنيت عليك
ابتسم بدون ما يبان عليه >> ومازلت عند كلامي
مرام >> رانه بنطلب طلب ، ولو ما تبيش تدخل عادي بس مش ح نقدر نحكي الغيرك ومانعرفش حد ح يحله الا انت
انتفض قلبه لما تقوله ما نقدرش نحكي الغيرك >> اطلبي ومش ح نقصر
خذت مرام نفس وحكتله قصة ليلى و ادم ، بدون تفاصيل … قالت له انها تعرفه من سنه وعلى اساس ح يجي رسمي وصارت مشكله بينهم ويهدد فيها بصورها انه يدزهن المحمد
مرام >> الصور ما فيهنش حاجه راه وليلى قالت لي خليه يدير يلي بيديره بس انا عارفه لو عرف محمد ح يق..تله ويعدي فيها في جرة واحد حقير و ح تكبر القصة ، لو تقدر بس تخوفه عشان معش يحكي مع ليلى ولا حتى يفكر يحكي معاها
نبراس اللي كان يسمع فيها بهدوء وهي تحكي >> تم الموضوع عندي ، اعتبريه انتهى
مرام >> ليلى من البكاء لها يومين ما رقدتش ، هي مصدومه فيه اكثر من انها مصدومه فالتهديد لي هدده لها
نبراس >> طمنيها واطمني حتى انتي، الموضوع وصل عندي ماتخافيش .. ذكريني بس شن اسمه ادم من
قالت له مرام الاسم وكتبه وهوا مذكر انه سامعه من قبل
نبراس >> راجي مني تلفون
مرام >> مانبيش الموضوع يكبر نبيه يحل عنها بس يطلع من حياتها
نبراس >> زي ما طلع من حياتك اللي كان فيها ح نطلعه الاخر
مرام >> مازلت فالعده
نبراس >> استغفر الله ياريت عده على حد يستاهل
ضحكت و هو قلبه وقف لثواني مع ضحكتها
>> مانعطلش عليك ، طمني لما توصله
نبراس >> تمام
//
//
صكر الخط منها و قعد يبحت فالاسم زين ، مره واثنين وثلاثه مسك تلفونه ورن على سهم
سهم >> ولد عمي
نبراس >> اسمع انت وين ؟
سهم >> مع بدر فالمعرض
نبراس >> امتى مروحين
سهم >> شن فيه ، عال ٨ نكملو نمشو شور القهوه ونروحو
نبراس >> بنسالك باهي ، عندك صاحبه اسمه ادم ال…صح
سهم >> اه ادم صاحبي كنه
نبراس >> خلاص فكني من سريب القهوه نبيك في موضوع ، كمل معرض و نتلاقو بعد ساعه فالحوش
سهم >> تم تم
//
//
حكت مرام الاسيل شن صار مع ليلى ، وليلى كانت في الدار تحاول ترقد كل ما تغمض عيونها عقلها ما يوقفش تفكير
اسيل >>مستحيل الحقاره معقوله هضا كله يطلع من ادم اللي كلنا نعرفوه ونحسابوه كويس
مرام >> اتخيلي انها قبل اسبوع جتني قالت لي نبي نحكي الماما على ادم لانه واعدني انه لما نبدا سنه ثالثه بيخطبني ، وقبل ماتحكي صار اللي صار
اسيل >> والله عرفتها لما خشيت عليها وجهها حبيبتي شاحب بكل
مرام >> تصدقي من امس لا كلت لا شربت كارسه في الدار وماما كل ما تخش تلقاها راقده نقوللها مريضه بطنها توجع فيها
اسيل >> ربي يقويها على وجع القلب هضا بس
خذت اسيل سفرة القهوه ومشت تغسل فيها فالمطبخ ، على خشت محمد برا خش لعندها
برمت وجهها وطفت الميه >> مش في حوشنا نحن
محمد ضحك>> تو شن درت انا عليك ظلم
برمت روحها وصبت مقابلته>> حافظتك
محمد >> ما يسير شي يعني
اسيل ضحكت >> حول خليني نمشي للبنات
مدلها خده >> هاه ما طلبتش حاجه اكبر
اسيل ابتسمت وقربت منه وطلعت من تحت يده لي كان حاطها عالحوض ومشت"
ضحك و طلع وراها
//
//
في حوش العيله ، البنات مع عمتهن
دوبه خش نبراس ، على تدريست سيارة سهم وبدر
خشو مع بعضهم خشه وحده ، وسديم وهديل مقعمزات برا
سديم بصوت واطي >> شن رايك تمشي تضبطيه؟
هديل >> بلا براده مابحتش حتى فيه
قرب منهم هو وبدر وسهم سلمو عليهم ، وبعدها خذا سهم ومشو بعيد يحكيله على ادم
نبراس >> كيف ما قتلك بعد ما عرفت الاسم اذكرت انه عندك صاحبك اسمه هكي من قبل حكيتو عليه انت وبدر قدامي ، قبل كنت واخذ دوريه وطالعله
سهم >> خلي الموضوع شوري بس
نبراس >> سهم الموضوع يهمني ، فرخ الحرام يهدد في بنت بصورها هذي نحبسه فيها كيف السلام عليكم
سهم >> نعرف نعرف ، بس خليني انا نصرف بس لو ما حليتهش تو نقولك
نبراس>> مافيش لو ما حليتهش ! ح تحلها الموضوع بينحل يعني ينحل
سهم >> قلنا تم عاد مش عرس هوا ! توا ح نطلع شوره
نبراس>>عندي شغل انا تم الموضوع وكلمني
..
..
في نفس المكان لي يهدرزو فيه كان بدر واقف عند سديم
سديم>> الكبايه وين ؟
بدر>> نسيتها فالسياره
سديم>> نزلها باه عليش فالسياره ادهور فيها ولا شن
بدر >> حد قالك انك حانطه
سديم>> قالولي اه
بدر >> كذابين
سديم >> مش شورك جيب الكبايه را نقولك معش فيه نسكافيه ، بعدين هذي كبايتي ونحب نشرب فيها
بدر >> حتى انا حبيتها ح نخليها عندي وامتى مانبي نسكافيه ح نجيبها لكي اديريلي فيها
سديم >> تحلم نديرلك مره ثانيه
بدر >> مافيش كبايه
رفعت حاجبها >> مافيش نسكافيه
برمت مجد عليهم >> اهدو انت وياها
رن تلفون بدر بحت فيه>> هديت
سديم >> سخيف
فنص فيها وبرم يرد على تلفونه
//
//
في الليل متأخر بكل
رن تلفون مرام اللي كانت دوبها مكمله قيام الليل ، شافت للرقم قلبها دق … حولت محرمتها و ردت جاها صوته اللي في كل مره تحسه بخوف لما تسمعه
نبراس >> الو
مرام>> الو صار حاجه؟؟
نبراس >> ماحصلتش فرصه نرن غير توا كان عندي شغل
مرام>> عادي كنت نصلي اصلا واعيه، بس قولي شن صار ليلى رقدت من كثر ما بكت معش فطنت الروحها
نبراس>> قوليلها ماتخافش، معش اصلا ح يرن عليها والصور امتسحن
مرام >> باهي كيف ! شفته انت حكيت معاه
نبراس>> يابنت الناس شن لكي فالكلام هضا انتي المهم مشكلة اختك انحلت " وقال بعفويه" اعرفن تختارن صح انتي واختك
فهمت كلمته اللي حستها في قلبها ما بتش ترد عليها >> نعرف انه نحلت بس بنعرف كيف مشيني على قصاد عقلي لو مش ح نزعجك يا سيادة الرائد
تنهد بملل من اصرارها و قال يحكيلها >> بعد قلتيلي اسم ادم الكامل شبهت عالاسم، لانه عندي ولد عمي عنده صاحبه مار عليا بالاسم هضا قلبجت من هنا وهنا وسألت سهم وطلع فعلا ادم صاحبه هو نفسه لي يعرف اختك
قاطعاته قبل ما يكمل كلامه>> لحظة لحظة سهم صاحب ادم يكون ولد عمك ؟
نبراس >> كيف تعرفيه ؟
مرام>> لا بس من كلام ليلى ديما كان ادم يقوللها ماشي السهم و جاي من عند سهم ماكانش في عنده صاحب غيره وانا ليلى لما تحكيلي علي ادم لما يتعاركو ولا في هدرزه ف كنت نسمع ف اسم سهم عشان نادر يعلق في الراس "وقالت بعفويه" زي اسمك هكي
نبراس ابتسم بدون ما يبينلها >> انا اسمي يعلق فالراس ؟
مرام فطنت الروحها غيرت الموضوع بارتباك>> المهم يعني سهم حل الموضوع ؟
نبراس >> انا لما سألته وربطت الموضوع وعرفت انه ادم نفسه صاحب سهم ، كنت عابي نفتح محضر و ناخذه هوه وتلفونه نعزقه بين اربع حيطان بيش يتربى ، بس لما سألت سهم وعرف اني ندور على ادم وقتله شن داير … قالي خلي الموضوع شوري ، ومبدري كلمني قالي الصور امتسحن و كون هاني بس توا كيف فضيت اني نقولك
مرام تنهدت براحه >> شكرا لكي ولسهم ماقصرتش، وسامحني عشان كلمتك و حطيتك في موقف زي هكي
نبراس>> شغلي ما درتش شي
مرام>> مش ح نعطلك بالكلام الوقت متأخر ومرات خطيبتك تتصل بيك "وسكتت شويه"
نبراس قاطعها >> مافيش حد ح يتصل بيا
مرام >> تمام بس ما نبيش نشغلك
نبراس>> متريحه انتي ؟
مرام >> مش حنتريح الا لما يكملن ال ٢٨ يوم متاع العده او ٢٧ بما انه كمل اليوم
نبراس >> تحسبي فيهن حيطولن هكي خليهن يمرن
مرام >> ثقال على قلبي بكل
نبراس >> انتي تطلقتي منه عشان القضية ؟ هلك غصبوك تطلقي وانتي تبيه ؟ ولا قرارك
مرام غمضت عيونها ومش عارفه كيف قررت تحكي وتقول ممكن عشان كانت تحساب نبراس شخص عابر يعني تحكيله و مش ح تعقب وجها عنده ح تصكر من هنا و مش ح يحكو بعدها
خذت نفس وبصوت مخنوق من نفس القصة لي تحاول تنساها وبرضو تطلعلها وتظطر تحكي فيها>> سليمان كان اول شخص في حياتي، بدون تفاصيل يعني بعد الزواج تغير قعد شخص ثاني بكل اول شهر مشى كويس الثاني هه حاجه واثنين يمشن الثالث خلاص بدا الاسلوب حقير معش يحبني معش يصرف عالحوش ولما نسأله يقولي انا اسرعت بقرار الزواج وانا مش قد المسؤوليه، لحد ما خش فاللبز يلي خش فيه لنا عشر شهور بس كنا متجوزين ما عندش اي مبرر غير انه هو انسان ضعيف ايمان و ينجر للغلط بسهوله
نبراس بهدوء>> وليش تحملتي العشر شهور هذينا ؟ او ياستي خلينا نقولو تسعه بما انك قلتي اول شهر كان ماشي
مرام مسحت على وجها >> لا هضا موضوع ثاني وطويل و الساعه خاشه على الثلاثة
نبراس ابتسم عشان محسش بالوقت وهو يحكي ابدا لاول مره في حياته يطول عالتلفون لدرجة لقى روحه عالق السماعات ومربع يديه فالسياره ويسمع وهو مش فاطن الروحه
نبراس >> لا عادي مش موضوع
مرام >> صدعتك انا بس اللي نحكي وانا مازلت مانعرفش غير انك سيادة الرائد و "سكتت شويه" وخاطب
نبراس >> بنت عمي
مرام >> يبقى خليني نمشى نقرا قران لحد ما يأذن الفجر ونصكر الخط عشان بنت عمك ما تلقش تلفونك مشغول ويقعدلك يوم نزيك
ضحك نبراس >> ربي يقبل
مرام >> راجيه را مازال شويه ويأذن
نبراس غمض عيونه ومسح على لحيته>> ان شاء الله
..
..
صكر الخط و بحت يساره لقى بدر نازل لوطا وكان يبحت فيه
نزل من السياره
بدر >> مستحيل تكون هديل !
نبراس >>كيف
بدر>> اللي تحكي معاها مش هديل صح
نبراس رفع حاجبه وصكر باب السياره>> مكالمة شغل
بدر >> احاااا على بدر الدين مكالمة شغل والابتسامة لي فالاخير هذي من ضمن الشغل؟
نبراس >> راسي بيطربق ابلط وخليني نركب ندوش ونلحق الفجر ونرقد
بدر>> نلحق الفجر 🤔 لا خبر متقاوي وديني كان ماعرفتها من اللي حتى الفجر خلاتك تصليه حاضر
نبراس خبطه على راسه>> را تحكي الكلام هضا قدام حد يصدقك مش ناقصني وجيج ابلط قتلك وبعدين امتى عمري فوتت صلاة
بدر حط يده على راسه>> لم يدك واركب اركب خبرك مش صافي
برم نبراس وهوا يتجنب في كلام بدر و سماطته
وبدر يبحت فيه وهو يفكر بينه وبين روحه>> انا حافظ البدايات هذينا كويس تبدا بدروحه مافيش منه الكلام هضا وتكمل بتكبيد للرُكب بس انقنها بطله لي خلاتك تركب سماعات و تبتسم "ضحك بدر" و خش الداره
اما هوا لما ركب فوق ، مسك تلفونه حط على المسجات عشان كالعاده ضميره ما يأنبش ودز الهديل مسج
" اكيده راقده صح ؟"
وصل المسج وما جش رد عرف انها راقده ، خش يدوش وطلع على اذان الفجر … طرح صلايته وصبا يصلي
//
//
صكرت من نبراس و كملت صلاتها وخشت للدار بشويه لقت ليلى تسلم من صلاة الفجر
مرام>> من كثر ما بكيتي ماقدرتش نواعيك للفجر مانحسابكش نضتي
ليلى>>يدوبك غفيت و عقلي ما يبيش يوقف تفكير نضت
مرام ابتسمت>> عندي لكي اخبار ح يبردن قلبك شويه
ليلى طبقت الصلايه وجت جنبها>> احكي
قابلتها عالسرير وبدت تحكيلها على مكالمة نبراس وليلى كل شوية يتغيرن ملامحها
ليلى>>قصدك سهم هو الي حل الموضوع
مرام>> هكي الرائد قال
ليلى>> باهي كيف
مرام>> والله ما قالي كيف بضبط وحسيت روحي كثرت عليه
ليلى مسكت تلفونها>> تعرفي انه الحقير الي ينقاله ادم دزلي مسج من رقم سهم عالواتساب من قبل ، كنت متعاركه معاه ودرتله حظر من كل مكان دزلي من رقمه وقالي ردي ضروري وهكي المهم بعد تصالحنا يومها قالي لي دزيتلك منه رقم سهم
مرام بحتت فيها>> في شن تفكري
ليلى>> نتصل بسهم " وسكتت تشوف المرام لي قرنت حواجبها " يعني يا مرام انتي عارفه لو ما عرفتش كيف انحل الموضوع مش ح نتريح
مرام>> هما اصحاب واجد؟
ليلى >> تعرفو على بعضهم يعني مؤخرا في شغل ما شغل مش أصحاب قرايه ولا جيره
مرام>> خايفه يكون زيه
ليلى >> حتى كان زيه ماعندش عليش بيهددني لا عنده صوري ولا يعرفني
مرام>> عارفتك مش ح تريحي " ونزلتلها يدها لي ماسكه التلفون و تقلبج في مسجات الواتس ادور في رقم سهم" رني بكرا فجر توا عيب
ليلى>> ماركزتش بكل
مرام >> ماتبيش تمشي للجامعه؟
ليلى>>بنرقددددد راسي وعيوني يوجعن فيا
مرام>> تريحي ارقدي بكرا ماعندنش ما نديرو
رقدت ليلى يومها وهي تصارع في ذكرياتها مع ادم
كيف ماحستش انه يلعب كيف الخيانه جتها من اقرب اثنين 💔
//
//
ثاني يوم ، بدر نازل من حوشهم والبنات يهدرزن في دار مجد وكان صوته عالي يحكي بالتلفون ، صكر الخط لما وصل فيهن
مجد>> كنا صوتك يسمّع
وقبل ما يحكي رن تلفونه>> يارا خرفي بكل
سديم >> كنك
بدر حط التلفون قدامها >> بالله عليك احكي معاها قوليلها انك مراتي و لا بدر مات ولا مرض
مجد تضحك>> بعيد السو ياسامط
قبل ما تقوله سديم لا ، فتح الخط و حطه على وذنها
البنت >> الو
سديم >> تفضلي
البنت>> مش هضا تلفون بدر
سديم >> تلفون بدر وانا بنت عمه فيه حاجه؟
البنت>> نبيه بنحكي معاه
سديم >> مايبيش يحكي معاك عطاني التلفون قالي ردي عليها
بدر كان يبحت فيها ومرفع حاجبه عشان قالت الحقيقه
البنت >> تمام تمام
صكرت البنت في وجها ، وسديم مدتله التلفون
بدر >> مش قتلك قولي اي حاجه
سديم >> تعلم تقول الصدق بس تو كل امورك يقعدن تمام
بدر >> قتلها الصدق ما بتش تستوعب
سديم >> العشم لي تعشم فيه للبنات هضا ح يطلع من عيونك
بدر >> ما عشمتش حد من اول مكالمة نحكي فيها مع اي حد نكون واضح انه مافيش حاجه ح تصير بعدين ، اللي غبيه عاد انا مش مشكلتي
سديم >> حل امورك بعيد مش ناقصني
بدر >> ما طلبتش منك مليون
هديل >> خلاصصصصص خلاصصص لو قعدتو هكي كلمه بكلمه معش ح تفض
بدر >> طالع خليها تبربر بروحها
سديم >> معش تقول تبربر يا بايخ
طلع لسانه و طلع وسيبها
سديم >> ح يجيبلي الضغط شي يوم
هديل >> مستفز بكل😂
مجد ضحكت >> والله عسل
سديم >> خلوكم طبلوله لعند يحساب روحه اخر راجل فالعالم 😒
//
//
كان سهم فالسيارة مروح الحوشهم ، على رنت تلفونه طفى السياره و درس ورد قبل ما ينزل
جاه صوتها وهي تقول >> الو
استغرب عشان ماكانش فيه عنده وجيج بنات توقع حد غالط >> ايواه
ليلى>> سهم صح
سهم >> هوا بذاته، من معايا !
خذت نفس >> ليلى معاك