روايه حافة المنتصف
الفصل الثالث عشر 13
بقلم ايه
كان المسج من سهم
مسحت يديها بطرف ماليتها و مسكت التلفون فتحت المسج كان مكتوب
" لو فاضية بنحكي معاك "
خذت دقايق وهي تفكر هضا شن يبي ! ماهو مش عرس هوا عشان رنيت عليه مره يقعد يحكي معايا كل شويه ، و خصوصا انه صاحب ادم
عقلها كان يشيل فيها ويجيب فيها شن يبي منها ، من كثر ما انه كان عندها ازمة ثقه فكرت للحظة انه ممكن سهم يكون متفق مع ادم اصلا و كله كذب ولا مسح صورها لا شي بس بعدين اذكرت نبراس و انه رائد يعني مش معقول يضحك عليهم ويخبط صدره وهوا مش ضامن ولد سيده
و شن في شعور اصعب من انه الواحد يقعد مش واثق في دبشه اللي عليه حتى ! بعد ما كنت شخص عفوي و لطيف مع الناس كلها واجتماعي و تاخذ وتعطي
-أصعب معركة في حياتك عندما يدفعك الناس إلي ان تكون شخصاً آخر-
مسكت تلفونها وحطت على رقمه و خشت للمربوعه و رنت عليه
سهم >> الو
ليلى >> شن فيه ؟
سهم اللي مستغرب من ردها >> نعم !
ليلى >> شن الحاجه لي بتحكيها معايا في وقت زي هضا
سهم >> وطي صوتك ! مش دازلك عشان بنهدرز
ليلى >> شن تبي
سهم >> اعرفي كيف تحكي
ليلى ضغطت على فمها عشان اتحكم في عصبيتها >> احكي نسمع فيك
سهم>> بالاسلوب هضا معش بنحكي بكل ، وانا ما رنيتش انا دزيت مسج ! كنت مشغول روحت و دزيت المسج بدون ما نفطن للساعه .. بس كنت بنحكيلك على ادم
صكر الخط في وجهها بدون ما يسمع جوابها حتى ، وهي لما سمعت اسم ادم جاها فضول تعرف شن اللي فيه
ليلى >> اوففففف ياربي اوففف اوف ح يقعد في حياتي و ح تقعد هيه في وجي فالجامعه مش ح نخلص مش ح نتريح " وقعدت تبكي "
لحظات وردت مسكت التلفون و رنت عليه
سهم >> نعم في حاجه
جاه صوتها لي دوبه باكي >> احكيلي كنه ادم
سهم تنهد >> تبكي قصدك؟
ليلى>> مش موضوع احكي
سهم >> ما فيش حاجه ما تشغليش بالك ، بس جاني فالمعرض وقالي نبي نوصل في ليلى بس خايف نوصلها ترد تحكي مع الرائد ، هو في باله لحد توا انك مقدمه بلاغ فيه
ليلى لما سمعت من سهم نزلن دموعها>> طول عمره ح يقعد خايف و جبان ، طول عمره ح يكون مش راجل
سهم توتر من بكاها >> ما رنيتش عشان نخليك تبكي، بس حسيت لازم تعرفي انه يحاول يوصل فيك
ليلى >> وانت شن قتله
سهم >> قتله ما توصللهش البنت معش تبيك ومصره على موقفها
ليلى >> درتله حظر من كل مكان ماعندش كيف بيوصلني
سهم >> امسحي دموعك بيش نفهم كلامك راه كلمه نفهمها وعشره لا
ليلى ضحكت >> مسحتهن
سهم >> ايوه اضحكي
ليلى >> سهم ، انا ماعنديش ثقه في حد حتى روحي اقسم بالله ! وخلوقي واصلات فوق … انت متأكد انك مش متفق مع ادم صح
سهم انصدم >> تدويلي انا؟
ليلى سكتت
سهم >> شكلك تحسابي الدنيا كلها سقّاط كيفه ! درتيني نرن فالليل عشان انابشك ! ودرتيني متفق مع ادم … متفق عليش ان شاء الله ؟ وعلى شنو مثلا تفكيرك هضا وين ماشيه بيه يا اوي
ليلى مكانش عندها رد
سهم >> غلطان من الاول اني ادخلت
صكر الخط في وجهها ، عزقت التلفون عالسرير وهي تحاول تمسك دموعها و اعصابها … طلعت من لدار وردت تكمل في المواعين فالمطبخ في محاوله منها تنسى اللي صار
//
//
ثاني يوم، كان الصالحين جايب هنيه "امه" لاختها جميله
حطها وطلع شور نبراس للمركز
صالحين >> ولد الخاله
نبراس >> تعال قرب
صالحين >> غريبه فاتح الباب
نبراس >> انضغطت
صالحين >> عندك شغل واجد
نبراس >> لا مهديه اليومين هذينا
صالحين >> باهي لي مهديه هنا عشان ح تعصف عليك فالحوش
نبراس رفع حاجبه وبحت فيه>> خير ان شاء الله
صالحين >> خير خير "وضحك"
على خشت الشرطي >> سيادة المقدم يبوك لوطا
صالحين بحت فيه >> جاي جاي
نبراس >>اطلع يا سيادة المقدم
صالحين >> امي عندكم راه تسأل عليك بيش اطق فيها
نبراس >> بعد تطلع قولي نطلعو مره وحده
صالحين >> تمام
//
//
هنيه >> وهضا اللي قاله ليا بس انا قبل ما نحكيلها قلت نقولك
جميله >> والله انتي تعرفي مجد اكثر مني بنت مافيش زيها
هنيه >> نعرفها .. بس شن رايها ؟
جميله >> مش عارف تو نقوللها
هنيه>> صالحين جايبني نخطب رسمي راه يبيني حتى نحكي للحاجه سالمين تدوي للهادي دغري بس انا قلت عيب خلينا ناخذو رأي البنت
جميله >> تو بعدين نحكي معاها
هنيه >> تمام
جميله >> تعالي نقعمزو حذا الحاجه والبنات
طلعن هنا الاثنين ومشت العشيه في التهدريز و هنيه حاطه عينها على مجد " حركات الامهات اللي ما يتغيرنش "
فالليل على خشت نبراس و الصالحين مع بعضهم
خش نبراس بعد ما لقى امه وجدته وخالته بس قاعدات وكلم الصالحين قاله يخش يسلم
جميله >> ربي يعطيكم الصحه ويفرحنا بيكم
صالحين >> الله يسلمك ياخالتي
نبراس >> كان بدر قاعد را زقب وقالك حتى انا
هنيه >> بدوري ما فيش كيفه الحناطه كلها
نبراس >> انتي الوحيده لي مكبرتها في خشمه
هنيه >> وليدي ما حد يغلط فيه
وهما يحكو صالحين بحت في امه و غمزلها ، هزت براسها بمعنى تمام
صالحين>> هيا نحن ،، تالف انا بنرقد
هنيه >> هيا
طلعو للجنان هنيه توصي في جميله عالي قالاته لها ونبراس يهدرز مع صالحين على الشغل ع خشت بدر من الباب وعلى لسانه " وانتظريني وعدي نجوم الليل"
رفع راسه وهوا يسكر فالباب لقاهم واقفين قدامه
بدر >> وانا نقول كنه اليوم من اوله سمح ! هنيوا هنا
ومشى لعندها اضبطها >> وليدي رايفة عليك
بدر >> وين معش جيتي
هنيه>> نراجي فيك معش جيتني ولا خطمت
صالحين>> غير راك تكذب تقول حاصل فالمعرض بس
بدر >> هنيوا نقوللها فاللي هناك
جميله >> ما مخربك غير هنيوا انت
بحت في نبراس ورقّص حواجبه >> لقيت اللي يدلعني وما يدلعكش
وهما يحكو طلع نبراس تلفونه بحت فيه و ابتسم
بحتو صالحين و بدر في بعضهم و نبراس ما فطنلهمش
طلعت هنيه ركبت فالسياره وخشت جميله جوا وهي متحمسه عشان تحكي المجد ، وخش نبراس
قبل ما يركب صالحين للسياره بحت في بدر>> فاطن معايا ؟
بدر>> فاطن ويستر الله
صالحين>> نحساب روحي نهوجس
بدر >> فاطنله بس هوا بروحه مايبيش يعترف
صالحين >> اول مره نشوفه متلخبط هكي
بدر >> انا خايفه يلخبط الدنيا كلها مش بس هوا يتلخبط
صالحين >> لحق عليه فيه جلطه جوا
بدر >> شن فيه ؟
صالحين غمزله وهز بكتوفه
//
//
جوا اول ما خشت جميله جت لقت مجد اللي كانت تسمع في صوت الصالحين وهوا يهدرز برا وكانت متمنيه يكون الوضع احسن من هكي
جميله >> هنيه جت اليوم مخصوصا عشان تحكيلي في موضوع
سالمين >> موضوع شنو ان شاء الله خير
جميله ابتسمت>> صالحين جاي بيخطب مجد بس قالت نبي الموضوع يكون بينا قبل نشوف راي البنت
وهنا مجد دوروها معش تلقوها ! امر واقع يعني ؟ لما قالت لا حطها في وجه امها عارفها وليه كبيره و ح تزن على راسها وحتقوللها ماعندكش عليش ترفضي ! يضيّق فالحبل عليها عشان توافق ويلوي ذراعها
على تخطيمت نبراس فم باب الدار سمع سالمين وهي تقول >> وهضا النهار المبروك صالحين مافيش كيفه
نبراس >> كنه الصالحين
جميله ابتسمت >> جاي يخطب في مجد
نبراس قرن حواجبه وقعد يسب فيه من جوا وبحت على طول في مجد
جميله >> مجد شن رايك
واللي يسألو فيها واقفه ومصدومه ! و مافيش في راسها الا كلام الدكتوره " الحمل عندك صعب جدا ومعاك خمس سنين تحملي وبعدها لل ٣٩ ح يكون فيه عملية ازالة رحم ، لو جبتي مره احتمال المره الثانيه ضعيف بكل "
نبراس هزها من كتوفها >> تو تحكيلي انا مجد "وكان حاب ينقذ الموقف "
خش بدر >> شن تحكيلك يا حبيب عمتك انت؟
وجميلة للمره المليون تقول>> صالحين جاي يخطب في مجد
ضحك بدر وهوا يذكر في كلام صالحين برا وفهم قصده
نبراس فنص فيه >> مايضحكش راه
طلع نبراس بمجد ومشى بيها شور الدار ، وبدر بكل برود خش الداره
جميله >> شكلها متحشمه
سالمين >> نبي نتهنى عليها و صالحين ما فيش كيفه
جميله >> تو يحكي معاها نبراس وهنيه قالت يجي راجلها يحكى مع الهادي بيش يقعد كل شي رسمي
..
..
صكر نبراس باب الدار وبحت في مجد
مجد >> ولد خالتك يلوي في ذراعي صح ؟ يحسابني هكي ح نجي ؟
نبراس>> اقسم بالله ما حكالي حاجه ولا نندري عليه الا توا سمعتها معاك عارفني اصلا لو يحكيلي ح نصكرها في وجه
مجد قعمزت عالسرير >> كيف بنواجه يا نبراس ؟ كيف بنقوللهم ما نبيش ! صالحين ما فيش عيب وانا مش صغيره لو قلت لا ح يكون الموضوع واضح بكل ! لا في حد في حياتي ولا ني معقله ولا نقرا ولا نشتغل
صالحين بالنسبة الامي الرجل المثالي! وفوقها لو رفضته بدون اسباب جميله ح تزعل مني
"وقعدت تبكي" حطني في موقف زفت ! يفتح في جروحي اللي نصكر فيهن من جديد ، يمسك فيا من يدي اللي توجعني يا نبراس ! انت عارف عليش رافضه ، غير شعور النقص لي فيا غير إني متأكده بعد سنه سنتين ثلاثه هنيه ح تقوله كيف ما عندكش عيال و لازم تجوز ! ح يجوز عليا يا نبراس ح نعيش طول عمري مكسوره… مانبيش نحبه مانبيش نتعلق بيه و ننخطب ونجوز ونعيش معاه بعدها وجع اخرى
نبراس كان واقف ويمسح على وجه مش عارف يواسيها ولا يطبطب عليها هو اللي جبل حس بقلبه وجعه من كلامها قرب قعمز جنبها ، و لف بيده عليها
نبراس >> معش تبكي ، انتي ما فيكش عيب الي من ربي خير يا مجد مش انا لي نقولك …لو ماتبيش الصالحين خلي الموضوع شوري وانا ح نوقف وعارفتيهم ماحدش يقدر يصبي قدامي لما نقول لا ! ولو اظطر الموضوع توصل للسما بيني وبين الصالحين ما يهمنيش ، اهم شي انتي دموعك ما ينزلنش
"مسحلها دموعها "
بعدين ليش تفكري في حاجات هكي ؟ وتحطي في سيناريوهات ممكن ما يصيرش منهن اصلا
مجد >> وممكن يصير 💔 كل شي فيه احتمال ٥٠٪ عشان هكي خايفه
نبراس >> شوفي الي تبيه وانا حاضر
مجد >> انت ربي يخليك ليا وما يحرمنيش منك
نبراس >> خلاص بكا غرقتينا
مجد مسحت دموعها وهزت براسها
طلع من عندها وركب الداره
..
..
طلع التلفون من جيبه و رد فتح المسج لي كان رد عالمسج لي دزه فالصبح
كان دازلها " شنجوك اليوم"
ردت عليه متأخر " اليوم كان عالمي ماما تضم فالحوش توا كيف مسكت التلفون و شفت المسج ،هضا جوي اليوم "
رد قرا المسج وابتسم ، صبا غير دبشه و حط على رقمها ورن عليها
عند محمد واسيل
طلعت من المطبخ وهيه ماسكه لين ، قعمزتها في كترها و توكل فيها
التفتت بحتت في محمد >> في شنو تفكر
بحت فيها >> العده متاع مرام قريب تكمل
اسيل ميلت راسها>> وشنو يعني
محمد >> يعني مش ح نحبسها بين اربع حيطان
اسيل تمسح في فم لين >> وهضا الصح
محمد >> نعرف بس الموضوع صعب
اسيل >> محمد ردبالك يكون تفكيرك هكي
محمد >> مش انا اللي نفكر يا اسيل البيئه لي نحن فيها هكي ! المجتمع لي نحن فيه هكي ! مطلقه و تطلع مطلقه وتشتغل مطلقه و مشت وجت … حتى على مستوى العيله معش ح نقدر نخليها تبات نفس ليلى
اسيل حطت التبسي من يدها و رفعت لين اطبطب عليها بيش ترقد >> محمد انت معانا في القرن الواحد وعشرين ولا ندزولك الرابط
محمد بحت فيها وقرن حواجبه >> اسيل انا راجل ونسمع ونعرف
اسيل بصوت واطي عشان لين ترقد >> نعرف بس تفكيرك هضا قدييييييم … توا المطلقه احسن حتى من البنت الشباب ! خصوصا انها شافت في حياتها واجد صدقني يا محمد ما فيش وليه تطلق وتخرب حوشها الا وهيه شافت الويلللللللل اللي خلاها توصل للمرحله هذي
سكت محمد وهوا مازال مش مقتنع
صبت اسيل حطت لين في سريرها ، وجت عند قيس غطاته وردت باب الدار .. وجت عند محمد
اسيل >> استوعبت ولا مازال
محمد >> مش عارف
قربت منه وجت قدامه >> لا ح تستوعب
ابتسم >> بالغصب
اسيل هزت براسها
محمد >> نحس فيك تحبي ليلى ومرام اكثر مني
اسيل >> انا لما جيتكم كنت صغيره يدوبك ٢٢ سنه عميمه كانت كيف ماما ، و البنات كيف خواتي وانا معنديش خوات
محمد >> يعني تحبيهن اكثر مني
اسيل>> عندي ثلاث بيبيهات انا ولا شنو ؟ "وقرصت خده" حبهن هنا حاجه وحبك انت حاجه
محمد >> انتي كيف قادره تكوني هكي ؟
اسيل>> هكي اللي هوا كيف
محمد >> اللي هوا راحتي كلها عندك ! عارفه لو سيبتيني في يوم انا ح ندير العار
اسيل ضحكت >> قول خير ، وبعدين بنسيبك وين بنمشي ما نقدرش
محمد >> ايوه كنت دايرلك اختبار
ضحكت>> تعلمت الاختبارات مني
هز راسه وضحك
//
//
كانت ماسكه تلفونها بعد اللي صار امس ، و حاطه على رقمه … الافكار لي فراسها لو يطلعن يملن الدنيا
تفكر تكتب مسج ولا ترن !
حطت على المسجات لو مش حاب يقبل منها كلام عالاقل مسج ساهل
بعد تردد وتمسح وتكتب ، دزت "اسفه ، مش طبعي اني نخوّن حد ولا نقلل منه ، انت ما قصرتش بس اللي انا فيه مخليني شخص ثاني غير االلي كنته"
صكرت تلفونها بعد دزت المسج بسرعه و عزقاته من جنبها وهي متوتره من الرد
..
..
اللي جاه المسج ، قاعد فم باب الحوش يهدرز هوا وولد سيده
بدر>> بكرا يفتحلك ربي مش جاي للمعرض
سهم >> وين الجديد؟
بدر >> الجديد اني نعطي فيك فالعلم
سهم ضحك >> فعلا مش عوايدك
وهما يحكو وصل سهم المسج ، فتحه يقرا فيه و ابتسم لا اراديا
بدر >> هوب هوب
سهم >> حسك قلت تبي ترقد صح ؟ هي انت اللي هوب هوب
بدر >> مصبي قدام حوشنا راك
سهم >> تصبح على خير "وبرم"
بدر >> نوعيتكم ترعشو معاهن ، تعلمو الثقل مني بس
سهم برم>> الثقل متاعك انت اللي مخلي نص ارقام البنات فتلفونك ما نبوش " ورد كمل طريقه"
عزق الدخان وهوا يضحك و خش ، و صل سهم في حوشهم ركب الداره وعلى طول رن "
قبل ما يرن ، كانت مرام جنبها وتبحت في ليلى اللي كل شويه تشوف للتلفون
مرام >> شن فيه ؟
ليلى تنهدت >> مانبيش نقعد هكي يا مرام ، مانبيش نقعد شكاكه و قليلة خير
مرام بحتت فيها ب استغراب>> حاستك لكي يومين مش على بعضك
ليلى >> سهم
مرام رفعت حاجبها
تنهدت ليلى و حكتلها شن صار من امس لحد ما دزت المسج
مرام >> انتي رد فعلك عادي بعد اللي صار فيكي بس هو شن ذنبه ، دار فيك معروف لو ما رديتيش عليه افضل من اللي رديتيه
ليلى >> انا همي كله في نفسيتي ، قعدت من يوم الي صار معش عندي ثقه في حد ! خايفه الموضوع ياثر عليا ومعش نقدر نخشش حد حياتي اصلا مستحيل نقدر والله "وحطت يدها على وجهها"
قربت مرام منها وحضنتها >> والله لو قعدتي تبكي ح نبص فيك ماما تربيك ، تي نزحتي من البكا … "ومسحت على ظهرها " انتي قويه اقوى حتى مني ، اللي صار مش ح يغير منك شي فتره وح تمر
ليلى >> نخاف نقعد هكي ، عدوانيه وتفكيري ديما جايبلي انه كلهم بيأذوني حسبي الله فاللي كانو السبب بس حسبي الله
مرام>> اهدي بس
على رنت تلفون ليلى وكان سهم ، وخرت مسكت تلفونها ورفعاته وراته لها
ابتسمت مرام بشويه>> ردي عليه ، عشان تعالجي روحك مش عشانه … عشان تحسي انك قويه وقادره اتقبلي الناس وتحطي فيهم ثقه
هزت ليلى براسها و مسحت دموعها بطرف كمها
مرام >> انا بنصلي ركعتين
طلعت وصكرت عليها الباب ، خطمت لقت امها راقده فالدار وباتها نعس حذا التلفزون ك عادته ما يرقدش الا على صوت هرجه
مرام >> بابا حبيبي صبي من هنا صقع خش دارك
فتح عيونه >> هي تو نصبي تو نصبي
مرام >> بابا صبي هيا
رد فتح عيونه وتنحنح ، وصبا خش لداره
طفت التلفزون و خذت الطفايه من حذاه حطتها فالمطبخ و مشت تصلي
ردت ليلى على سهم
سهم >> انتي فاتحه مناحة بكاء ؟
ليلى >> ماكنتش نبكي
سهم >> كنه صوتك مبحوح
ليلى سكتت
سهم >> تبكي يعني
ليلى >> عادي كنت مضايقه شويه
تنهد سهم >> وصلني المسج راه
ليلى >> وباهي
سهم >> مش ح انظّر عليك ولا نقولك ديري وما اديريش ، فاهم شعورك شويه ممكن في لقطة انك قعدتي شخص ثاني غير اللي انتي فيه لو عليا انا راه ما زعلتش منك .. عادي ، بس لو بتكملي حياتك حاولي تنسي ما تخليش الزعله تاخذ اكثر من وقتها
ليلى >> انت فاهم انه اكثر شخصين كانو معايا وحوليا انغدرت منهم ؟ وما حسيتش ولا نقطه يعني لو كنت ما شفتش المسج يومها في تلفونها را انا مغفله لحد صبح اليوم ..وفوقها بكل وقاحه هو جايك يقولك بنوصل فيها وهيه فجامعه جايه تقولي انتي فزتي .. قلبي يوجع فيا بكل
سهم >> محد يقدر يلومك .. بس ما تقدريش تقيسي لي عشتيه عالناس كلها . مش معنى شخصين طلعو مش قد الثقه معناها العالم كله هكي . لو بتفكري هكي مش ح تقدري تعيشي حياتك براحه
ليلى >> كيف نقدر ننسى ؟ نقدر نجاوز ونقدّم !
سهم ابتسم>> تقدري .. كل ما تحسي انه فيك زعل تعالي و فشي غلك فيا ! ح نكون فاهم
ليلى >> انا بكلامي امس قريب ودرت الدنيا وانا مانبيش نكون هكي والله انا مش هكي ، ممكن انت ماتعرفنيش من قبل بس كنت شخص يوثق فالكل و يحكي مع الكل و اجتماعيه
سهم >> فاهمك ، وفاهم ليش رقالك امس وحقك راه ، يعني شاب وران على بنت في لحظة ضعف وفي فتره انتي تبي من يطبطب عليك فيها ، اكيد فكرتي اني بنستغل ضعفك ، ولا فكرتي اني بنضحك عليك ولا اني نكون نفسه بما انه صاحبي … حقك وما تنلاميش بس الكلام هضا كله ما فيش منه و مش ح نقولك شي بس الايام ح يثبتن لك
ليلى >> يعني فاهم اني مش قصدي
سهم ابتسم >> فاهم ، اغسلي وجك و بلا دموع
ليلى ابتسمت >> تصبح على خير
سهم >> تلاقى الخير
واللي كانت تسلم من صلاتها ، ضوى تلفونها
طبقت الصلايه ومسكاته وقلبها دق ، خذت نفس و حست بنفس النغزه لي فقلبها بس ردت
مرام >> الو
نبراس >> كملتي ضم حوش
ابتسمت >> ماما كل فتره تزنلها تضم الحوش وهوا مضموم
نبراس ابتسم >> كيف حالك
مرام >> بخير وانت وين؟
نبراس >> روحت للحوش
مرام >> ساعات شغلك فالصبح بس
نبراس >> في كل وقت مافيش نفس ، نقعد فالمركز اكثر من الحوش
مرام >> العالم يبي انقاذ يا سيادة الرائد
ضحك >> ونحن فالخدمه
مرام >> خطرها عالخدمه ولد عمك كنه يرن على اختي
نبراس ما فهمش >> ولد عمي من ؟
مرام ضحكت>> سهم ! مش قتلي انه حل قصة ليلى مع ادم
نبراس >> تمام ؟
مرام >> خلاص ليلى اصرت تفهم القصة وبعد عرفت الموضوع فيه سهم كلماته قالت انه ادم كان ران عليها منه او دازلها مسج نسيت ، المهم حكت معاه
نبراس>> صار تسكير الراس وراثه عندكم ، مش قتلك حليت الموضوع
مرام >> مش انا هيه والله
نبراس >> وسهم شن يبي ران ؟
مرام >> شكله سهمه طب في اختي
نبراس >> كيف
مرام >> مانعرفش دز مسج ثاني يوم ، ردت هيه اليوم تعاركو امس عموما لخبطه
نبراس ابتسم >> توثقي فيا؟
مرام >> واجد
نبراس تنهد وغمض عيونه و رد كمل كلامه>> خليها مع سهم ، ح تنسى كل شي صار معاها … سهم قدع و اصله طيب بكل .. ولما يحب يدير اللي ما يندار رغم اني م نفهمش لا في حب لا في مشاعر بس لو بتحكي عليهن ح تلقيهن في سهم وصدقيني ما رد رن عليها ودز مسج الا وهوا فيه حاجه فباله ولد سيدي ونعرفه
مرام >> ليلى مازال مش مستوعبه لي صارلها
نبراس >> وسهم راه مش صاير فيه شويه ، خليهم يداوو جروح بعضهم لو طلبت نصيحتك ما تقوليلهش لا … وسهم لو حس انه قلبه تعطب ح يجي من الباب موال العلاقات ماعندش فيه نهائي
مرام >> كيف شنصاير معاه ؟
نبراس >> خلي بينها وبينه ، ماتدخليش اه
مرام >> والله ؟ اختي راه
نبراس >> مرام
ولما قال اسمها ، الدم جمد في عروقها توترت قلبها دق .. ورد قلبها نغزها … ح تسمع اسمها بصوته ديما ؟ ولا ح يختفي عليها الصوت هضا في يوم ؟
نبراس بهدوء >> احكيلي شن درتي اليوم
غمضت عيونها وردت فتحتهن ، وبدت تحكيله
//
//
ثاني يوم ، صوته قالب المركز
ياصباح الخير يلي معانا يلي معانا
الشرطي >> رايق يا افندي
صالحين شير على باب نبراس >> اللي جوا شنو ؟
الشرطي >> قارن حواجبه تحكيله يركب فيك
صالحين >> وين عمره طلقهن حواجبه
خبط عالباب ثلاث تخبيطات وخش
نبراس بصوت عالي >> اطلع من قدامي عالصبح و كمل عدي صباح الخير يلي معانا وابلطططططط وبلطني
صالحين >> ياستار استرنا "وكر الكرسي و قعمز"
نبراس >> تو يا عيل العويله ، ماشي تحكي في مجد عليش ؟ شن الحركات هذينا كنك انت تبيني نخبط وجك ولا شن نديرلك بزبط ! البنت امس ما سكتتش من البكاء
صالحين قرن حواجبه >> عليش تبكي
نبراس>> بلا حنيه زايده تبكي عشان حساتك تلوي في ذراعها
صالحين>>ما فهمتهش اني شاريها يعني ؟
نبراس >> كنك ما حكيلتي باه عليش تخلي فيا عيل
صالحين >> عارفك ح تعطيني محاضره ولا ومش عارف شنو اختصرت الموضوع عارفني لي فراسي نديرها
نبراس رفع عيونه ورد نزل راسه في الملف وهوا يهز فراسه >> انا مش ح نحكي شي و اللي ما سكني عليك اني عارف نيتك وانا مش ح نتريح على مجد الا معاك انت بس معش ادير شي الا بعد تقولي تعبتني ياراجل
صالحين ضحك>> فهمنا عاد
سكت نبراس
بحت فيه الصالحين >> انت شن فيه ؟
وخر واتكى عالكرسي وطلع دخانه
صالحين >> شاطحه عندك ؟
نبراس >> ما نبيش نأذي حد !
صالحين >> اسمع ، دوت الافنديه هذي فكني منها لما بتحكي فقش تعال عندي ما تحكيليش الغاز
سكت ونفخ دخانه
صالحين>> شن ح ادير مع عمتك
نبراس >> على اقل من راحتها
صالحين >> توافق بس ونربيك من جديد
طلع وهوا يغني ونبراس مسح على وجه وطفى الدخان
//
//
في حوش العيله ، بلمتهن المعتاده مجد فالجنان و جنبها هديل وسديم
سديم >> ماه انا مش صغيره ، تي صايره حاجه قولي
هديل >> وجك ما يتفسرش من اول ما خشينا
مجد >> عارفات من جا خطبني ؟
سديم >> ماتقوليش مروان رد اخرى
ضربتها هديل على يدها >> انتي اسكتي حتى الناس لي تذكري فيهن يضايقو العلم
مجد هزت راسها >> ولد خالة العيال الصالحين
هديل رفعت حواجبها ، وسديم ضحكت
سديم >> ايوا ايوا حرم سيادة المقدم
هديل >> تي اسكتي انتي شويه "وبحتت في مجد " وانتي شن ردك ؟
مجد