close

 


 روايه حافة المنتصف

 الفصل الثامن وعشرون 28
بقلم ايه



فتحت الباب وكان محمد دوبه مروح

مرام >> ربي يعطيك الصحة 
محمد >> الله يسلمك 
مرام >> شن صار معاك
محمد ابتسم>> خلاص بكرا اخر يوم للشغل 
مرام >> والله جد 
محمد >> اها ما توقعتش يكمل بسرعه هكي 
مرام >> يعني ح نروحو
محمد >> انتي الدوره متاعك مازال فيها خمس ايام صح ؟ 
مرام >> اها
محمد>> ميه الميه ،بكرا نكمل انا شغلي كله وبعدها تقعدي فالصبح تمشي الدوره والليل نطلعو ندهورك ما طلعتيش بكل انتي 
مرام ابتسمت >> خلاص اتفقنا
محمد >> ومنها نشري شوية حاجات للعيال ، لين كل ما نحكي معاها تقولي العاب والعاب 
ضحكت >> رايفة عليها البطه هذي 
محمد ابتسم >> تنزلي اتغدي ولا شنو ؟ 
مرام>> لالا نضت بدري و تعبانه بكل ، فطرت متأخر اصلا تو بنتريح بعد انوض ناكل في مطعم الفندق
محمد >> خلاص تمام معناها تو نطلب اكلي عالغرفه ، ونرقد احتمال نعلقها نوم لعند الليل
مرام >> تريح 

قبل ما يطلع التفت عليها >> كويسه انتي ؟ نحس فيك كنتي تبكي ؟

مرام هزت براسها >> لالا بس كيف ما قتلك واعيه بدري وتعبانه

هز براسه وطلع ، قعدت تبحت فيه لعند ما صكر الباب ، محمد العصبي اللي يولع بسرعه اللي ما توقعتش بكل انه يهدا شويه ، كل ما يكبر كل ما يهدا ويعقل وجود اسيل جنبه مريح اعصابه ، كل ما نشوفه نندم ، نندم اني ما جيتش وشكيتله من سليمان من اول شهور ، نندم اني تحملت عشر شهور ، نندم على كل شي مر بس الحمدلله 

صبيت غسلت وجي ، وتوضيت و مسكت الصلاية عشان ربي يخفف عليا التفكير الي انا فيه ، ماكانش في غير دعاء واحد على لساني 

"ربي لا ترهقني بالتفكير، وانت ولي التدبير" 

(الدعاء هضا ديما خلوه على لسانكم يخفف عليكم حمل التفكير )

//
//

صكرت ليلى من مرام وهيه تفكر فيها ، صبت من سريرها وما جاهش نوم … حطت على رقم سهم ورنت عليه 

سهم >> الو 
ليلى >> ايوا ، كيف حالك
سهم >> اجمل كيف حالك وايوا نسمعهن
ليلى ابتسمت>> ح نتعود هكي راه لكي كم يوم انظر كنك 
سهم >> شكلها الضربه اثرت عليا 
ضحكت>> والله يعني مش كلامك هضا 
ابتسم>>كلامي ونص يا عيون سهم 
ليلى >> ايوه هكي اطمنت 😂
سهم>> كيف صار ما لكش ساعه دزيتيلي بنرقد
ليلى>> رنت عليا مرام
سهم >> وقالت لك انه نبراس وصل عندها؟
ليلى >> ليش ما قتلي انه ماشي وليش ما قتلي على فسخت الخطبه

سهم >> اقسم بالله فسخت الخطبه ما سمعتهش الا امس ونحن ملتمين عالغدا في حوش جدي حكو فالموضوع ، انا مانندري على شي بكل ،،، وسفرة نبراس انقنه حلفني ما نقول خاف نقولك وتقوليلها و مرام تهرب منه وهوا ما صدق بيوصل فيها 

ليلى >> وفسخت خطبته هذي شن خطرها توا ؟ 

سهم >> ليلى ، والله انا مانعرف نبراس شن يحس ، ولد عمي ديما غامض وواخذ جنب ، بس اللي نعرفه انه هديل هي اللي حكت معاه على موضوع فسخة الخطبه ، هما الاثنين اصلا مش متريحين كانو وبذات نبراس ، وهديل معش تريحت معاه واتفقو ، حتى الدبله حولوها و الخبر خلاص انتشر فالعيله كلها 

ليلى >> مرام تحط فاللوم عليها 

سهم >> لو في حاجه زي هكي كنت ح نقولك والله بس ما فيش

ليلى >> ربي يهدي سرهم هما الاثنين ويريح قلوبهم

سهم >> امين ،المهم توا اسمعي عرس مجد بعد شهر ، واول ما يخش شهر العرس تبدا القوبعه عندنا 

ليلى >> باهي ؟

سهم >> ح نجي نخطب لما تروح اختك من مصر على طول 

ليلى سكتت وتوترت >> س ه م 

سهم >>ليلى انا جدّي بكل وعارف انا شن نبي بكل و معش عندي جهد نوخر ، وحوشي فوق حوش هلي واتي ، لو مش موافقه هضا شي ثاني 

ليلى ابتسمت>> موافقه موافقه 

ضحك سهم والفرحه كانت في صوته >> اليومين هذينا ح نحكي مع هلي

ليلى>> خلي مرام لما تجي تحكي مع ماما انا مانعرفش نحكي بكل 

سهم >> خلاص تمام 

ليلى >> توا بنرقد خلاص ، طيرتو نومي انت ومرام

ضحك>> ساعه ونواعيك خلي تلفونك جنبك 
ليلى >> تمام

//
//

مقعمزه جنب اختها و عمتها واليوم كانن فالحوش ما طلعنش للسوق 

سديم>> حجزت فيها الساعه لي قتلكن عليها
هديل>> ساعة شنو
سديم ببراده>> الساعة السعيده😒 ماقتلك نبي نشري ساعه البدر
هديل>> مازلتي مصكره راسك
سديم >> عيب لازم نجيبها له عشان مانحسش انه دفع عليا واجد
هديل>> دراما 

سديم بحتت فيها وبرمت بحتت المجد>> كنك اليوم 
مجد>> من اول امس متعاركه مع الصالحين 
سديم>> ومن الغلطان 
مجد>> مش عارفه
هديل>> معناها اكيد انتي
مجد >> دايرلي موضوع على كل طلعه معروف يعني العرس مازال عليه شهر بس ونجيب في بتات طبيعي بنطلع كل يوم، زعل عشان روحت وما قتلش نسيت يعني 

سديم>> مجد الرجاله كلهم هكي ، وهضا راجلك يعني دينيا تعطيه العلم 

مجد>> عطيته العلم ، هو قصده بعد نروح نرن عليه وانا نسيت

سديم>> برضو مافيهش باس كنتي ادزي حتى مسج، بيني له انك مهتمه عارفتك مازال ما فيش اي حب ولا شي بينكم بس شويه وح يصكر عليكم باب على الاقل خلو في استلطاف بينكم 

ضحكت هديل>> والله يا فرخه تنصحي ويسير منك 

سديم>> اسمعن كلامي تعيشن 

مجد>> انا راسي مصدع بكل، ورقبتي شكله بداية احتقان .. ف مش طايقة روحي بيش يزعل وهني 

هديل>>من مبدري بنقولك صوتك بادي يتغير 

مجد>> بكل و حاسه جسمي متكسر 

هديل>> انقذي روحك قبل ما تتعبي 
سديم>> عشم الصالحين فيك

ضحكت مجد>> تو ندزله رساله اسكتي بس 

مسكت تلفونها ودزتله

" مازال زعلان مني ؟"

//
//

عند مرام الي صلت كم ركعه ودعت من قلبها ، طلبت وكال للغرفه وكلت .. و شافت للساعه كانت 10 الليل  ماحستش بالوقت بكل … خشت السريرها 

رن تلفونها عرفاته هوا ، قلبها دق وصوته ينسمع برا بس ردت عشان مرايفه عليه ، ردت عشان صوته الي ماراحش من بالها ردت عشان حنيته الي تبيها ، ردت عشان قلبها الي مهما منعاته مافيش فايده

مرام >> الو 
تنهد تنهيده طويله قبل ما يقول >> مرايف عليها الالو هذي 

مرام بخوف >> نبراس انت فاطن مبدري شن قتلي ؟ قتلي فسخت خطبتك و جيت عشاني ! 

نبراس >> ونعاود ونقولها بدال المره الف ، وخطبتي انفسخت بتراضي بيني وبينها 

مرام >> باهي ليش توا ، ليش لما انا طلعت في حياتك يعني  قررت تسيبها ، مانبيش حد يعشم فيا انا ما نبيش ناخذ ذنب حد 

نبراس >> البنت ما تعرفكش اقسم بالله ما تعرفك ، اهدي و اسمعيني وخليني نفهمك ونحكيلك اللي بتفهميه … الليل كله معاك تفهمي كل شي …بس ما تخافيش ولا تبكي 

مرام تنفست >> احكيلي باهي كل حاجه 

ابتسم وهوا مرايف يحكيلها ومرايف يقوللها تفاصيله وحياته >> انا قتلك انه عمي توفى و باتي بعدها جا وحكى معايا في موضوع الخطبه صح 

مرام>> تمام

وبدا يحكيلها في قصة هديل كلها ، من اول الخطبة لحد ما حكت معاه على فسخت الخطبه وشعوره اتجاهها و ضميره لما كان يحاول انه يكون خطيبها بس يفشل في كل مره .. كيف كان تايه كيف كان قلبه يوجع فيه كيف كل شي صار معاه … حكى وحكى وحكى لمدة ساعه حكى وهيه تسمع و ساكته ، حكى وهوا يجنب يقول اسم هديل عشان يراعي شعورها ، طلعن مشاعره وطلع يفهم في الحب اكثر من اي حد ! 

مرام >> يعني لو ماكانتش هيه ح تفسخ الخطبه ، كنت انت كملت فيها ؟

نبراس >> اللي كنت نعرفه حاجه وحده بس ، اني كنت ح ناخذك ح ناخذك ، بالرضى ولا بالغصب ح ناخذك ، شن ما صار يصير ح ناخذك 

مرام >> نبراس ما نبيش نتعلق انا و بعدها كل شي يريح مني اقسم بالله سادني اللي شفته 

نبراس>> انا جيتك لعندك وسافرتلك بلاد عشان كنت ح نموت بدونك ، مش ح نقدر نسيبك ولا نخليك تمشي الغيري ، كل يوم انوض الشهور لي فاتن نحمد في ربي انك مازلتي قاعده مازال ماحد شافك وخذاك مني

ابتسمت بخوف>> في حاجه بنقولها لكي ، بس خليني نروح بنغازي قبل عشان تشوفها ب عيونك ، كنت متردده لو نقولها لكي ولا لا … بس انت اكثر حد يستاهل يعرفها 

نبراس >> شنو 

مرام>> اصبر لحد ما نروح بس 

نبراس >> باهي ماتبيش تقولي من اللي شفته معاك اليوم ؟ عشان ماعنديش صبر في هذي 

ضحكت>> خو خديجه صاحبتي ، بنيه تعرفت عليها في الدوره لي سجلت فيها ، اه صح ما قتلكش خشيت دورة تنمية بشرية من اول ما جيت ، وخلاص تعرفت عليها فيها 

نبراس بعصبيه>> باهي ، وخوها انا شن دخلني بيه يجي معاك لقدام الفندق ب اي صفة؟ 

مرام >> نبراس ، صغير راه اصغر مني بخمس السنين غير شكله كبير بس … وبعدين عشان المركز متاع الكورس قريب مني  وهي في نفس المنطقه ف نروح على كرعيا وهيه معايا حوشها بعد الفندق بشارعين 

نبراس >> باه معش في مشي معاهم اصغر منك اكبر منك مش موضوعي 

مرام >> خلاص بكرا محمد ح يكمل شغل و بعد بكرا ح يقعد هوا يوصل فيا 

نبراس >>بكرا ح نصبيلك انا

مرام>> نبراس محمد خويا يعرفك 

نبراس >> خليه يشوفني ، عادي نشرب قهوه انا وياه

مرام >> من جدك انت 

نبراس >> من جدي ، سيوري شاربها معاه القهوه سوا توا ولا بعدين 

مرام >> ما تبيش ترقد انت ؟ 

ضحك >> مانبيش نصكر ، نحس في روحي غايب سنين مش كم يوم

ابتسمت >> امتى ح تروح

نبراس >> مش ح نقدر نطول ، عشان شغلي … بما اني اطمنت عليكي فيه طيارة بعد بكرا نروح فيها الاثنين ، وانتي ؟

مرام >> السبت الجاي قال محمد 

نبراس >> مرام ، بالله عليكي معش تصكري تلفونك احكي معايا ولو واصله بينا للسما بس معش تهربي 

مرام >> انت عارف ليش درت هكي 

تنهد >> كله ح يمشي والله 

مرام >> ان شاء الله 

شويه وصكرت الخط وحطت التلفون جنبها وهيه مازالت مش مستوعبه اللي صاير ، ولا هوا كان مصدق انه قاعد في مصر عشانها 

- ‏ليس حقيقيًا أن الإنسان يمضي دون اكتراث، إننا دائمًا ما نكترث وتستوقفنا المشاعر لكنها طريقتك في أن تقبِض على هذا القلب أو تدعهُ ينجرف.✨

//
//
عند الصالحين ، لي شاف مسج مجد في زحمة شغله بما انه ماسك شغله وشغل نبراس .. ماقدرش يرد عليها فوقتها .. بعد روح للحوش رن وخش داره

مجد بتعب>> الو
صالحين >> كنك
مجد >> على قول سيسي شكلك عشمت فيا
صالحين >> مريضه ولا شنو
مجد>> برد واحتقان ، مبدري عندي البنات وانا نقوللهن شكلي بنمرض ساعه ولقيت روحي خلاص 
صالحين >> صوتك باين عليه 
مجد >> اها 
صالحين>> خذيتي دوا باهي ؟
مجد >>مافيش بنادول ، درت ليمون وخشيت بنرقد
صالحين>> خلاص تريحي ارقدي 

استغربت مجد بس ما حبتش تسأل كنه وصكرت وماكانش جايها نوم

..
..
 بعد نص ساعه تقريبا 

بدر >> ايوا ولد خالتي
صالحين>> افتحلي الباب برا انا
بدر>> عليك خلطه 
صالحين >> افتح وصكر فمك 

صكر الخط وطلع وهوا يضحك ، فتح الباب

بدر>> ها ها ؟ شن في
صالحين>> نبي مراتي 
بدر قرن حواجبه >> روح روح "وجا بيصكر الباب"

مسك الباب بكراعه وخش >> فضيلي الطريق وكلمها ليا

بدر>> عليك موال جاينا الساعه ١٠ ازف 

وبرم خش وهوا يتمتم >> خش تعال الصالون تعرفه مافيش حد 

خش بدر يكلم فيها وهوا مشى شور الصالون 

دق على باب دارها ، اتكت عالسرير >> خش منو 

بدر فتح الباب >> راجلك برا

مجد >> الصالحين ؟؟
بدر >> امالا جعفر 
مجد >> تبصر "وصبت من السرير " 
بدر >> اطلعي قاعد فالصالون مثقل دمك ودمه 😒

برم بدر وهيه ردت باب الدار ، بحتت في لبستها .. غيرتها عالسريع و قلبها يدق ومش فاهمه عليش جاي 

..
..

 خشت للصالون ، قربت منه وسلمت عليه 

صالحين >> مازلتي تعبانه
هزت براسها>> وانت مازلت زعلان
صالحين >> مش مهم 

 رفعت راسها وبحتت فيه >> مش قصدي راه يعني لهيت بس مع البنات لما روحنا وما ركزتش

فتح الكيس >> هضا تاخذيه توا وبكرا وبعد بكرا في نفس الموعد .. مضاد لمدة ثلاث ايام يعني عشان الاحتقان وغيره… وهضا بنادول عشان الصداع… "ومدلها الكيس" والباقي لكي 

مسكت الكيس منه>> الصالحين قتلك مش بقصدي عاد 

صالحين >> نعرف مش بقصدك ، ونسيتي بس نسيتي عشان مش حاطتني في بالك يا مجد مش معتبرتيني حد مهم في حياتك 

مجد>> مش هكي بس خليني نتعود عليك بس ، انت فاهمني وانا حكيتلك وفاهم كل شي .. ليا فتره بروحي مفيش حد في حياتي مش متعوده بس 

صالحين >>تمام تمام خوذي دواك بس " وصبا وهيه صبت "

جا بيطلع وكان مازال زعلان ، مسكت يده بدون ما تفطن وبحتت فيه

مجد>> خلاص عاد،  اسفه " وطلقت يده لما فطنت الروحها  وجت بتطلع"

ابتسم ورد مسك يدها وقربها منه>> وين هاربه

بتوتر>> بعد را تمرض مني

باس راسها>> عادي 

مجد بعدت وهي متوتره>> صالحين عاد

ضحك>>طالع خوذي دواك بس

هزت براسها ، وطلع 

حطت يدها على قلبها ولمست وجهها لي كان احمر ، ابتسمت وهي تشوف للشكاير من غير الدوا جايب عصير وحاجات لها

طلعت وهي ماسكتهن لقت بدر خاش من الجنان

بدر>> مافيش حشم
مجد>>بلا سماطه جايبلي دوا
ضحك>> من امتى الحن هضا ماعمره عبرني بطرف حلوه
ضحكت >> انا مجد يابابا "ورفعت الكيس" تبي عصير؟
بدر >> ما تجملوش عليا انتي وياه حلّي 
مجد >> وين طالع
بدر>> مازال بدري ماشي بنكسد مع سهم ولقمان 
مجد >> خوذ المفتاح مش تجيني عالفجر تقعد ترن تقولي افتحي
بدر >> الصالحين نصبوله نجرو لكن انا لا 
مجد >> اطلع اطلع يابايخ 

طلع وهوا يضحك ، وهيه خذت شكايرها وخشت للدار خذت الدوا و خشت سريرها على رنته 

حكى معاها شويه و الدوا خذا مفعوله ورقدت على طول

//
//

صباح يوم جديد في مصر ، ناض محمد وطلع للشغل وكان اخر يوم له في شغله و مرام كان عندها دوره طلعت فالصبح بدري نزلت للريسبشن ورنت على نبراس ماردش عليها عرفاته راقد 

دزتله مسج " صباح الخير انا طلعت اليوم عندي بدري وحنكمل عالساعه 1 لو حاب تجي يعني حندزلك اللوكيشن متاع الكورس واتساب" 

حطت تلفونها في جيبها وطلعت وهيه مبتسمه ومبسوطه ، خذت قهوة ومشت شور الكورس وقلبها طاير مجرد بس ما تذكر انه معاها في نفس المكان تسرح و تنبسط 
.
.
.

ناض من نومه و دوّش ، فتح تلفونه و لقى منها مسج قراه وهوا مبتسم 

غير دبشه وحط تلفونه عالطاوله سبيكر وهوا يرن عالصالحين 

الصالحين>> تي صباح الخير يلي خذيت وجك من اول ما وصلت ما كلمتش حد بكل 

ضحك وهوا يسقم في كم البلوزه>> الله غالب شفتها ونسيتكم كلكم

ابتسم >> امورك تمام 

نبراس يلبس فالساعه >> ان شاء الله تمام مازالت خايفه ومش مستوعبه 

الصالحين >> وانت 

نبراس >> وانا نازل بنفطر و نطلع نشوفها
الصالحين >> مانحكيش على هكي انا 

مسك التلفون صكر السبيكر وحطه على وذنه >> انا اول مره نكون متريح هكي 

الصالحين >> واخيرا حسيت على روحك شويه 

نبراس >> مروح بكرا انا راه ، حجزت من عندي شوفو من بيجيني انت ولا بدر

الصالحين>> مش موضوع ساهل صبح ولا ليل ؟

نبراس >> ليل 

الصالحين >> تمام تمام 

نبراس >> خلاص طالع انا تشاو 

الصالحين >> سلام

حط التلفون في جيبه و خذا كرت الغرفه ونزل ، طلب قهوه و خذاها معاه و مشى لمكان الكورس قبل موعد طلعتها بساعه و صبا قدامه 

.
.
.

خديجة >> شنو هيا نطلعو ؟
مرام >> لالا ح يجيني محمد 
خديجة >> خلاص تمام 

طلعت خديجة و صفوان كان يستنى فيها و نبراس عيونه عليه ، برم وجه لما خديجه مشت ومرام طلعت ابتسم 

مرام >> خليتني نكذب عالبنت ونقوللها محمد جاي
ابتسم وهوا يشوفلها >> معش فيه مرواحه معاهم لحد ما يكمل الكورس 
مرام >> اساسا محمد ح يكمل شغل اليوم خلاص ويفضالي
نبراس >> شن عندك توا ؟
مرام >> ولا حاجه 
نبراس >> نعزمك على حلو ولا مالح ؟ 
مرام >> نبراس مانقدرش
نبراس >> ماتخافيش مش انا معاك ، والله ما ح تصير حاجه 
ابتسمت >> نشرب نسكافيه 

مد يده ، رفعت حاجبها و بحتت فيه 

ضحك بجديه>> نقطعو الطريق بس ، الكافي مقابل 

ترددت شويه و شبكت يديها في بعضهن ، قرب يده وسحب الكم متاع الجاكه و مشو للطريق و هيه مش فاهمه شن الي قاعد يسير معاهم ولا عارفه نهايته

//
//

فحوش العيله ، يومها سهم حس انه خلاص لازم يحكي الهله عالموضوع … كانت امه فالعشية في حوش العيله طبعا … مقعمزين فالدار الكبير وسهم خذا امه علي جنب

سهم >> امي نبيك في موضوع 
نجوى باستغراب>> موضوع شنو؟
سهم بسرعه>> بنخطب
نجوى بعد حساته متوتر اذكرت زهره >> سهم ! لو نفس الحوش ونفس البنت لا ! لا 

سهم >> اهدي اهدي ، مش هيه ومعش تجيبي ام سيرتها لانها لو تقعد اخر وحده مش واخذها 

نجوى براحه >> منو باهي 

سهم >> الاسبوع الجاي تمشو

نجوى >> قصدك تبي توا! راجي نكملو حوسة عرس مجد خلاص اقل من شهر عليه 

سهم >> لالا نبي مجد تمشي معاكم اصلا تو تجوز وتاخد وجهها 

مجد برمت >> سمعت اسمي

نجوى بصوت مسموع>> سهم بيخطب ويبيك تمشي معانا قبل عرسك

بحتو فيه كلهم و الابتسامة على وجوهم ، وانهلن الاسأله منو وكيف و امتى ومن وين تعرفها وشن اسمها 

سهم >> الاسبوع الجاي وتو ارواحكم تو تحقوها وتعرفو من وشن اسمها" ورفع يده المكسوره بشوية" طالع انا 

طلع سهم و مجد بحتت في نجوى >> كبرو العيال 

نجوى >> ربي يفرحنا بيكم كلكم وتطلع بنت حلال 

مجد >> ان شاء الله ان شاء لله 

//
//

مسكت كباية النسكافيه ، وطلعو يتمشو هيه وياه 

مرام >> مروح بكرا اكيد ؟
نبراس >> حجزت اها 
مرام >> عارف خايفه يطلع اللي انا فيه حلم 
نبراس وقف وجا مقابلها>> مش ح يتغير اي شي 
مرام >> وعد 

ابتسم  >> وعد 

رد جنبها ومشو لحد م وصلو للفندق

نبراس >> خشي انتى مرات محمد يقعد فالريسبشن 

هزت براسها وابتسمت >> شكرا عالنسكافيه

رفع حاجبه>> خشي بلا سماطه 

ضحكت وخشت ، وفعلا لقت محمد دوبه خاش 

مرام >> بدري اليوم 
محمد >> كيف كملتي ولا شنو
مرام رفعت الكبايه>> تكيت جبت نسكافيه 
محمد >> الساعه اربعه توا خلينا نتغدو هنا ، ونتريح شويه وبعدها نطلعو شن رايك 
مرام >> تمام بندوش ونصلي 

وهما يحكو خش نبراس ، ومشى بشويه منهم … مرام كانت عاطيه بظهرها .. محمد رفع راسه وقعد يبحت فيه 

بعد ما قرب قال >> الرائد نبراس صح ؟

مرام قلبها دق من غير ما تبرم 

مد يده وسلم عليه 

نبراس >> كيف حالك وشن اخبارك
محمد >> الله يسلمك ، لكي فتره هنا 
نبراس >> لا والله ماليش يومين وبكرا مروح 
محمد >> توصل بسلامه ، ماتوصي على شي
نبراس >> لا انت تبي اي حاجه دورني كان مازلت مطول 
محمد >> لا خلاص اربع ايام ، اليوم الرابع مروحين فالليل كان عندي شوية شغل 

كانت مرام متباعده كم خطوه وتبحت فيه وهوا يحكي مع محمد وماحطش عيونه فيها بكل ، كان كل حركه يديرها يثبتلها انه جدي بكل ! ويطمن فيها انه وهوا معاها مستحيل شي يخوفها 

كمل محمد كلام مع نبراس وجا لعندها ، ونبراس ركب من دون ما يبحت فيها 

محمد >> عرفتيه من 
مرام بغباء>> تهيالي لي كان ماسك قضية سليمان
محمد >> اه ، راجل محترم بكل 

ابتسمت مرام و ركبت لغرفتها ورنت على ليلى على طول عشان تحكيلها شن صار 
.
.
.

مر اليوم و طلعو للسوق شرو حاجات للعيال و شرت كم حاجه لها ولليلى ومحمد يبرم ومحتار شن ياخذ الاسيل

تكو على مطعم تعشو ، ونبراس كل شويه يدزلها في مسجات و طلع يومها تلاقى مع واحد صاحبه يعرفه تعشا هوا وياه 

ثاني يوم مشت للكورس متاعها و روح بيها محمد و لما خشو لقت نبراس فالريسبشن ، ابتسم لما شافها و قرب محمد منه حكى معاه شويه وقاله انه اليوم بيروح وهكي 

.
.
.

قبل ما يمشي للمطار ، لم شنطته و خذا حاجته وطلع من الغرفه وهوا يرن عليها 

مرام >> الو 
نبراس>> اطلعي انا قدام الغرفه 
مرام بتوتر>> محمد 
نبراس >> حقيته طلع 
مرام >> لحظه بس 

صبت حطت على راسها وشافت الشكلها  فالمرايه ، وفتحت باب الغرفه شافاته منزل راسه و متكي على يد الشنطه 

نبراس>> بنشوفك قبل ما نمشي للمطار
ربعت يديها واتكت عالباب >> توصل بسلامه

نبراس >> بعد ما نروح وانتي تروحي ، نبيك تعطيني شوية وقت … بالكثير شهر شهرين بس عشان نرتب وضعي بعدها نجي رسمي 

هزت براسها >> عادي ما تضغطش على روحك عارفه اكيد هلك صعب عليهم تخطب وانت دوبك فاسخ وخصوصا بوضعي هضا يعني

نبراس >> لو عليا انا ماندورش في حد ، ناخذ توا ونقرا فيك فاتحه بدون ما نقول الحد عادي بكل بس عليك انتي ، مانبيش حد يطق فيك نبيك تجي بقدرك و ماحد يقدر يحكي عليك حرف 

رفعت عيونها وبحتت فيه>> حتكون هكي معايا ديما صح ؟

نبراس >> لو بتحكي كلام كيف هضا را حنزعل وزعلتي ما تفضش انا بكل ، تعوذي من الشيطان و ماتفكريش في شي غيري انا وياك بس "وخبطها بطرف الشنطه على يدها بشويه"

وخرت و حطت يديها في بعضهن وابتسمت >> سامط 

نبراس >> هيا ماتبي شي؟؟

وخرت وردت باب الدار >> نبراس امشي للمطار امشي 

ضحك ووخر >> هي صكري الباب 

برمت وهوا سحب شنطته ومشى صكرت باب الدار وحطت يدها على قلبها ! وقاعده تفكر معقوله هضا هوا العوض ؟ معقوله خلاص ح تفرح ، معقوله الحنان هضا كله في شخص يبان من برا جامددددد بكل وكيف قادر يكون معاها هكي !  

العوض من ربي له اشكال واجد ، و العوض جاها على هيئة نبراس ! اللي لحد اللحظه هذي مش متخيله انه حيكون لها 

//
//

روح نبراس من مصر ، وخذاه على طول الصالحين من المطار و ما بش يروح للحوش مشى شور القسم على طول 

اول ما خش قابله الافندي خالد >> بسم الله الرحمن الرحيم مش كنت في مصر انت 

صالحين >> هضا ما يفوتش فرصة 

نبراس خبطه على كتفه >> انت وين مختفي 

خالد ضحك >> انا توا راجل عندي حوش مش كيفكم مافيش من يلمكم

نبراس >> لكي ست شهور متجوز يا راجل قطعتنا 

خالد >> ست شهور ست سنين ، المهم الواحد يروح لحوشه متريح

صالحين بحت في نبراس >> انقنه صدق راه

نبراس فتح باب مكتبه >> شغلك انت وياه بلا دواوي 

ضحك خالد >> مروح انا شوفو شغلكم بروحكم 

صالحين >> عقبال ترويحتي

عيطله نبراس من جوا بحزم >> صالحييييييين 

بحت في خالد >> هضا خطبنا عمته دايرلنا موضوع ازح 

خالد ضحك >> عدي مكتبك را يطلع يفصل 

برم صالحين و طلع خالد وهوا يضحك، وخالد هضا كان من ضمن الافنديه في فالمركز مع الصالحين و نبراس و قريب منهم هما الاثنين 

//
//

يوم ترويحت مرام من مصر 

كانت مروحه وحاسه انها انسانه جديده ، مش كيف اللي مشت كيف اللي جت … وحتى محمد كان حاس انه نفسيتها تغيرت بكل ومحدش كان عارف انه السبب هوا ، هو بس الشخص الوحيد لي يزعلها ويراضيها اللي تزعل عليه ومنه وكل شي 

 نزلو للمطار و استقبلهم الصديق ، جرت مرام لعند باتها و سلمت عليه 

محمد >> تقول لكي سنة ما شفتيه 

مرام غمزتله بصوت واطي>> تو نشوفو شن ادير فالحوش

ضحك وخبطها على راسها >> بطلي سماطه 

طلعو من المطار ومشو شور الحوش 

.
.
.
والي كانو يراجو فيهم فالحوش ، على طول طلعو لعيال يجرو الباتهم اول ما سمعو صوته خش 

قرب نزل لعندهم 

قيس >> جبتلي لعبه 
محمد >> قول الحمدلله على السلامة قبل رايح مصلحجي 
مرام حضناته>> جبنالكم حاجات عرممم بكل 

طلعت ليلى وحليمه والصديق ينزل في الشناطي 

ليلى تسلم علي  مرام >> اول مره نشوف ضحكتك هذي من بعد سنين ضحكت مرام ايام الجامعة لما كانت بنت شباب 

مرام >> اسكتي عشان ح يسمعونا يا فضايح انتي "وضحكت" 

وخرت منها ومشت تجري الحضن امها 

حليمه >> الحوش بلاك مكسسسد بكل ربي ما يغيبكم 

ليلى >> ومن كان يديرلك في سفرة قهوة كل عشية ياحلومه تو نوريك 

ضحكت مرام هيه وامها 

في الجهة الاخرى قرب محمد اسيل وسلم عليها و ماقدرش يقرب اكثر متحشم من هله و باته 

محمد >> وحشتيني 
اسيل ابتسمت >> وانت اكثر
محمد >> مانبيش حركات نخشو جوا و تركبي طول فوق تو بعدين تهدرزي معاها مرام 

بحتت فيه ووخرت من عنده و ابتسمت، برم عالشناطي خذاهن وقعد يخشش فيهن جوا 

.
.
.

بعد شوية 

خشت مرام غسلت وصلت و ركب محمد فوق عشان يتريح و ركبت معاه اسيل و العيال اللي على طول خذو العابهم و حاسو فيهن 

كرها من يدها وحضنها اول ما خشو 

محمد >> ايوه هكي الواحد يسلم كويس
ابتسمت >> وحشتني بكل اخر مره تمشي و تسيبني هكي 
محمد >> المره الجايه معايا 
هزت براسها >> رايح ناقص 
محمد >> ناكل وجبه وحده وعارفتيها مرام انتي ما تشجعش الواحد ياكل 
اسيل >> وكال عصافير انت وياها مش وكالين 
محمد وخرها  >> انحبك 

رفعت حاجبها وقربت من عنده >> شن جبتلي ؟ ولا اذكرت عيالك بس

محمد >> قولي نحبك 

اسيل >> مش قايله 

محمد >> معناها مافيش هديه 

وخرت ومشت شور الدار >> دور معناها وين ترقد 

ضحك ولحقها >> غير تعالي بس ، خليني نتريح وبعدين نفضي الشناطي

اسيل >> الساعه تسعه توا ترقد يخرب نومك
محمد >> لالا مش راقد بندوش بس ونجي نريح جنبك 

اسيل >> انحبك باه 

ابتسم>> انموت فيك 

//
//

كملت كل حاجه وخذت تلفونها دزت النبراس انها وصلت 

خشت عليها ليلى >> ما صدقت ماما سيباتك 
مرام ابتسمت >> مرايفه عليها بكل 
ليلى >> نايضه بدري توا تراجي في فقرة الشاهي مع بابا بيش ترقد 
مرام >> مستحيل يغيرو عوايدهم 
ليلى >> احكيلي باهي "وحطت يديها على خدها " شن سر السعادة هضا 
مرام >> انحبه ، ومش شويه واجددددددد …. انحبه كأني ما حبيتش قبله ولا ح نحب بعده ! 

وهي تحكي رن تلفونها و في نفس اللحظه رن تلفون ليلى