روايه حافة المنتصف الفصل التاسع وعشرون 29 بقلم ايه

 

 روايه حافة المنتصف

 الفصل التاسع وعشرون 29

بقلم ايه

ضحكن هنا الاثنين وبحت في بعضهن

ليلى >> سهم

مرام >> نبراس

ليلى > بالله عليك قوليله تو ترني عليه بعدين ، وانا بنصبي نحكي السهم نفس الشي ونجيك 

مرام >> تمام تمام 

صبت طلعت من جنبها ومرام ردت عليه 

نبراس >> وين مختفيه

مرام >> من هدرزه مع هلي دوشت وصليت ودوبي بنهدرز مع ليلى 

نبراس >> كليتي 

مرام >> دارتلنا ماما مكرونه عشا قالت لي رايحه ناقصه معش تاكلي سندوتشات"وضحكت"

ابتسم وهوا يقول >> سمحه كيف ما انتي اهم شي صحتك كويسه مش مهم تنقصي ولا تزيدي

ابتسمت بتوتر >> انت فالشغل ؟

نبراس >> اها ، مروح متأخر 

مرام >> يبقى بنهدرز مع ليلى على ما روحت 

نبراس >> لو طولت ارقدي عارفك تعبانه من المطار

ابتسمت >> حنرجاك 

ضحك وقلبه اللي كان يضحك >> حاضر ، هي باي 

مرام >> باي 

.

.

.

ليلى>> توا كنت بنحكي معاها 

سهم >> انا قتلك اني دويت الهلي يعني ما فيش رده الخميس حل الغايه

ليلى ابتسمت>> ان شاء الله ، انت وين ؟

سهم >> بيتكي عليا بدر نمشو شور القهوة

ليلى >> امتى بتفك جبس يدك ؟

سهم >> ممكن عشر ايام اخرى 

ليلى >> وجك معش فيه شي

ابتسم >> ماتخافيش مش ح نجيك متبهدل

ليلى>> بلا سماطه نحكي عشانك انا 

سهم >> لالا معش في شي في وجي ، يدي بس 

ليلى >> كول كويس بيش بسرعه يرد عظمك

سهم >> حاضر 

ليلى>> حاضر وانت ماشي بتسحن روحك قهوة ودخان مع استاذ بدر 

ضحك >> يا واعر انت

ابتسمت >> خلاص ياسامط خليني نشوف مرام

سهم >> تم نروح نكلمك 

صكرت منه ومشت عند مرام ، لقتها متكيه عالسرير

مرام >> باهي لي جيتي بديت ننعس

ليلى>> في عينك هي احكيلي شن صار معاكي من الاول للآخر 

مرام حطت راسها عالمخده وليلى مقابلتها تسمع ب تركيز ، وبدت تحكيلها في كل شي صار من اول يوم عدت فيه والكورس و كيف كانت مضايقه وكيف جاها نبراس وكل شي وليلى حكتلها كيف كلمها سهم وكيف عرف بموضوعهم هيه ونبراس و كيف جاب منها اسم الفندق وكل التفاصيل 

مرام >> وايوه يا ستي ، على قد ما مشيت وانا حاسه انه اخر يوم في حياتي ! بس روحت كأنه اول يوم في بداية حياة جديده ليا مش عارفه كيف نوصفلك الشعور والله، ماكانيش كنت طالعه من وسط حرب نفسيه الشهور لي فاتن ، معاه نحس براحه وامان وسعاده وكل شي .. مانخافش ولا نفكر في شي 

ابتسمت ليلى لي حاطه يديها على خدودها >> قلتيله نحبك 

هزت راسها بلا >> ما قتلش ، نحس لازم هوا يقولها … نبيها تطلع منه … مانعرفش نبراس من سنين بس الفتره لي عرفته فيها قدرت نعرف انه مش الشخص لي يعبر عن مشاعره نبراس طريقة الحب عنده بالفعل 

انه يسافرلي ، انه يجيب هله انه يكون حواليا ومعايا هذي لغة الحب عنده . بس نبيه يحكي نبيه يقول الكلمة هذي بس 

ليلى ضحكت>> مش بعيده مش بعيده 

ابتسمت مرام اللي حطت يديها تحت خدها >> وانتي شن جديدك مع سهم

ليلى >> نبيك تحكيلي مع ماما بكرا عارفتيني ما نعرفش نحكي بيش هيه بمعرفتها تحكي البابا 

مرام >> تو بكرا نحكيلها 

ليلى >> سهم يبي نهاية الاسبوع هضا

مرام >> عليش متوتره، شوفي منه بس انه كم وحده بتجي وهكي … عشان بكرا نحكي الماما وبعدها نطلع يا مع بابا يا محمد نشرو حاجات الجيتهم

ليلى >> قولتك محمد ح يوافق

مرام ابتسمت>> لما يعرف انه ولد عم نبراس ح يوافق ، مش قتلك شافه في مصر وقالي انه محترم وهكي 

ليلى >> ح يقول باه وين عرفك

مرام >> قاعدين في القرن الواحد وعشرين ، تو ماما تقوله معرفة صبايا 

ليل هزت براسها >> عقبالك 

ابتسمت مرام بنعس >> اطلعي بنرقد تالفه حتى نبراس مش ح نرد عليه 

ليلى >> ارقدي شكلك ناعسه بكل 

صبت ليلى عزقت عليها البطانيه وطفت الضي ، كرت الغطا وتغطت وعلى طول رقدت 

//

//

عند اسيل ومحمد

محمد >> رقدو

اسيل جت جنبه>> قيس ما رقد لعند ما رقد الالعاب جنبه ، ولين نازله فيها تقولي باربي وباربي 

ابتسم محمد >> مرام جابتلها الباربي انا قبل بنجيبلها لعبة غبيه قالت لي مش لعمرها 

ضحكت اسيل ، وخشت للسرير 

صبا محمد مدلها كيس >> مش قيمتك ولا قدرك يا عيون محمد الاثنين 

خذاته منه ورفعت حاجبها "نظرة شن جايب" 

فتحاته لقت عطر 

اسيل ابتسمت >> هضا العطر لي تحبه 

هز براسه >> كمل من عندك صح

اسيل >> له فتره نحسابك ناسيه 

محمد>> كنت ماشي فالمول والله شميته قعدت نمشي الريحه هذي عالقه في راسي لكي بكل 

ابتسمت وهيه اطلع فالبوكس الثاني و كانت سلسلة ذهب 

ضحكت >> تكمل فالحديده لي جبتها 

هز براسه >> قلت ماتجيش تلتبس بروحها 

طلعتها من البوكس وبرمت رفعت شعرها >> لبسها ليا 

ابتسم وقرب لعندها يصكر فيها

//

//

ثاني يوم فالعشية فالحوش عند سديم

سديم تلبس في ايشربها >> الساعه وصلت بنطلع نستلمها 

هديل >> را يحقك حد يهزبك

سديم >> تي ديلفري عاد مش حفله هيه 

هديل >> مش قلتي بدر من قبل داويلك عالتوصيل 

سديم >> الهديه جايبتها له كيف بنقوله استلمها 

هديل >> فكينا من المشاكل 

سديم >> خلاصصص اسكتي 

طلعت للجنان وهيه متردده بعد كلام هديل ، و لاول مره فحياتها تفكر وما تقربعش الدنيا 

مسكت تلفونها ورنت على سهم 

سهم >> ها يا لوزا 

سديم >> سهم وينك

سهم >> انا وبدر واقفين فجنان حوش جدك بنطلعو توا 

سديم>> باهي اسمع اطلع مد راسك تلقى متاع توصيل قدام حوشنا ، تعال خوذ مني الفلوس واستلم منه 

سهم >> شن طالبه عاد 

سديم>> تعال وخوذ الفلوس بس هدية راه بلا جنتله 

سهم ضحك >> تمام تمام 

صكرت الخط و سهم يبحت فبدر

سهم >> لحظة تو نجي 

طلع مشى لعندها لقاها واقفه ورا الباب 

سديم >> خوذ هذينا

سهم>> بطليهن حركات التوصيل انتي ومجد تبن حاجه نمشو نجيبوها لكن

سديم >> اخر مره اخر مره ، شفت هاه ما طلعتش انا 

سهم >> ناقص غير تطلعي يا فرخه " خذا منها الفلوس " 

وطلع استلم الساعه ودفع حقها و رد مدها لها 

سهم >> شنو هذي وهدية المنو

سديم>> البدر وما تقولهش له ردبالك

ضحك >> وشن المناسبة

سديم >> ديما يدفع عليا درهلي كبدي

سهم>> لو يعرف انت ترديله فيها هكي ح يهزبك 

سديم >> قصدي هديه عاد 

سهم >> خشي خشي وبطلي سماطه انتي هو قريب انجلط لما سمع ديلڤري وتوصيل

سديم >> طول عمره حصله

طلع سهم وهوا يضحك لقى بدر قدام باب الحوش

بدر>> شن فيه ؟

سهم >> موصيه حاجه توصيل واستلمتها لها

عض على لسانه وهوا يقول >> يارا انعن جد الشيطان قتلها مليون الف مره تفكني من ام التوصيل الي تعطي فيهم في رقمها ازف 

سهم >> حكينالها ياراجل وقالت اخر مره بلا اعصاب بس 

بدر >> دويتلها قبلك وقالت اخر مره "وجا بيمشيلها"

سهم>> خلاص عاد "ومسكه" موصيه على هديه

بدر رفع حواجبه>> هدية المنو ؟

سهم بيحرق دمه >> ما سألتش بس اكيد حد من صحباتها فجامعه 

رخى حواجبه و هو يفكر و مش عاجبه الكلام

سهم >> بتسوق ولا شنو ؟ هيا للمعرض 

بدر >> اركب اركب سواق بوك قعدت 

//

//

في حوش الصديق 

خشت مرام جنب امها فالمطبخ ، و قعمزت على حاشية المرمره 

مرام >> ماما ، شن شعورك لو جا حد يخطب في لويلا 

حليمه تحرك فالطنجره>> شعور اي ام ح تفرح

مرام هدت هدود >> في عرب راه بيجو الليلى يوم الخميس 

حليمه بحتت فيها >> الخميس هضا ؟ وعرب من وكيف

ضحكت مرام >> اهدي يا حلومه بس ، يا ستي عرب كويسين راهم ومتاكده ح يعجبوك ، وولدهم متخرج وكبير ويشتغل في معرض سيارات .. ليلى عارفتيها اتحشم ما تعرفش تحكي قالت لي نحكيلك 

حليمه ربعت يديها >> وانتي عاد ما اتحشميش

مرام >> لا طبعا😭😂😂

حليمة>>وهيه من وين تعرفه ؟

مرام رفعت كتوفها 

حليمه>> ما تعودتنش تكذبن عليا بعدين انا ام يا امي انتي وياها ونحس بيكن ، راني واخذه بوكن بمعرفه صح مش كيف علاقات توا بس نعرف هالخبر 

ضحكت مرام >> مش ساهل صدوقه يفهم فالخبر والحب 

حليمه تضحك >> آه تحاسبن غير جيلكن يحب 

مرام >>عارفه ليش نحبك؟ عشانك ام فاهمه انتمنى بعد نكبر نكون مع عيالي هكي ، على قد ما بابا نتحشمو منه على قد ما انتي ناخذو معاك في راحتنا بس برضو نخافو منك ب احترام 

حليمه ابتسمت >> ان شاء الله نفرح بيك وبعويلتك 

مرام >> ها شن قلتي على ليلى

حليمه>> رغم انك ما جاوبتينيش ، بس خلاص الخميس تمام … و تو نقول الباتك معرفة صبايا دلوهم علينا هو ومحمد 

مرام ضحكت>> ايوه تفهمي 😂

ضربتها بالكشيك على كراعها >> اطلعي نزلي الدبش من المنشر

مرام نزلت من المرمره>> هي هي 

نزلت الدبش ومشت تخبر في ليلى شن صار 

//

//

والايام يمشن ومافيش اسرع منهن لما تقعد توتي في حاجه ، مشن بسرعه على مجد اللي ناسيه خوفها وتوتي في روحها و في حاجة بتاتها لي خلاص مفروض تكملها عشان مازال اسبوع والاسبوع لي بعده يبدن مراسم العرس ومن يوم ماجاها صالحين وهيه مريضه معش شافاته وتحكي معاه كل ما تطلع وتخش وهكي بس مش كلام عميق 

ومشن بسرعه على ليلى اللي مش قادره تستوعب السرعه لي خش بيها سهم حياتها ❤️ ، وانه اليوم جايب هله 

الوحيده لي يمشي عليها بطيء مرام عشان كانت تراجي … وشن اصعب من المراجاه 💔

//

//

يوم جيت هل سهم فالعشية 

ليلى >> شكلي كويس ؟

اسيل >> قمر والله 

ليلى بحتت في مرام >> وانتي حطي حاجه في وجك 

مرام مقعمزه عالمرايا تسقم في وجهها>> مازال ما كملت بعدين جايين يخطبو فيك مش فيا

ليلى>> نفسهم الي جوني ح يجوك بعد فتره

ضحكت اسيل ، ومرام توترت وقلبها دق >> ما قالكش من ومن جايين؟

ليلى >> قالي جايه امي و عمته مجد ، جدتهم قالي مش ح تقدر تمشي مايبيش يتعبوها عشان كرعيها ف جايه ام نبراس معاهم كونها الكنه الكبيره يعني بس 

مرام قلبها دق و حطت روج هادي >> اها نبراس ما قاليش امه جايه

ليلى غمزت الاسيل وضحكن

مرام>> بنات ما توترنيش عاد 

ليلى >> خلاص سكتنا بلكي نبراس ما يندريش من ماشي ومن لا

مرام >> ممكن صح هو لعند الفجر فالشغل امس

على صوت رنت الجرس 

ليلى >> اطلعن حي عليا مع ماما افتحن انا فالمطبخ 

طلعت اسيل ومرام بحتت في ليلى >> شكلي كويس ؟

ابتسمت >> سمحه اطلعي اطلعي 

طلعت حليمه فتحت الباب و وراها اسيل ومرام خشن نجوى و جميله ، مدن الحاجات لي جايبيهن وسلمن واخر وحده خشت مجد سلمن على بعضهن و اسيل ومرام مش غريب عليهن وجه مجد وهيه كذلك 

قعمزت اسيل ماسكه لين هيه وعمتها معاهم وبدت الهدرزه 

خشت مرام على ليلى>> قلبي طاح بكل ، امه عسل بس تحسيها هاديه

ليلى >> ام سهم

مرام>> تي ام نبراس نبراس 

ليلى >> مرام غمي فمك اليوم مش يوم نبراس خطيني

ضحكت مرام على توتر ليلى >> ولعى عالقهوه 

كملت ليلى القهوة وهي ترجف ، خشت  ومعاها مرام يمدن فالحلو و القهوة على عيون نجوى و جميله 

ومجد كانت حاطه لين في كترها ولين تهدرزلها كلمة تفهمها وعشره لا و تضحك عليها  

قعمزت مرام جنب اسيل ، وليلى جت في نهاية الصالون و قعمزت قدامهم وهنا عاد يبحتن فيها و يهدرزن بيش ما يوترنهش وليلى ساكته وشابكه يديها في بعضهن من الخوف و تلفونها فالدار ما حكتش يومها مع سهم الا قبل ما يجو هله بشويه 

اسيل >> تذكري يا مرام وين شفناها؟

مرام بحتت في مجد>> انا شايفتها بس مش عارفه وين

اسيل >> يوم ما مشيت راه لعياة النساء لقيناها خشت بعدك

مرام اذكرتها واذكرت يومها محمد لما قاللها  نبراس كان جايب هله … هزت براسها وبحتت فيها

مرام >> اذكرتت اذكرتت صح "وابتسمت" ان شاء الله لاباس عليكي

مجد >> الله يسلمك ما تشوفي باس ، بس بدون فضايح عشان ما كنتش قايلتلهم اني فالمستشفى ما بيتش نشغلهم مشيت انا ونبراس ولد خويا بس 

ابتسمت مرام على سيرته وسكتت ، وكانن يحكن جنب بعضهن و نجوى وحليمه و جميلة يهدرزن وما يسمعنش فيهن 

اسيل >> لين تعالي نمسحلك يديك عيب الشوكلاطه لبزتي بيها الدنيا

مجد ابتسمت >> خليها 

لين شيرت الامها بيديها >> خليها يا ماما قالت

ضحكن كلهن على لين ، و ليلى شويه وصبت بعد ما العيون كلهن كانن عليها ونجوى عطت الجميلة نظرة رضى بمعنى اطلبيها رسمي 

و حكت عاد جميله الحليمه وقالت لها نبو كل شي رسمي ، وحكتلها على شغل سهم وعمره و حوشه وكل تفاصيل الي مفروض تعرفهن 

نجوى >> هوا جايبنا وشاري يعني سائل عليكم وبوه موافق الدور عندكم اسألو علينا و ردولنا عاد

حليمه ابتسمت >> ان شاء الله ان شاء لله 

مجد وشوشت الاسيل ومرام >> شكله الزيتون خلط عالجبنه رسمي 

ضحكت مرام>> شكله

مجد >> كلا سهم طايح بوجه بيش تقولوها للعروس "وضحكت" ولد خويا ونعرفه 

اسيل >> حتى اللي عندنا راه 

ضحكن كلهن 

مجد >> دابينه عاد هضا هوا الكلام ف انا عرسي قريب راه ، قعدنا عيله عاد تو نخلي سهم يجيبلكم كروت

اسيل >> ربي يتمملك على خير مشاء الله

مجد ابتسمت>> الله يسلمك

صبت مرام من جنبهن ومشت تشوف في ليلى ، وشوية وقدمو ضيافتهم كلها وجاهن سهم وطلعن وهنا راضيات و نجوى مبسوطه بكل بالعيله و ب ليلى اللي عجبتها بهدوئها وبشكلها اللطيف 

.

.

.

اول ما طلعو خشت ليلى على طول غيرت دبشها ومسكت باقة الورد وابتسمت وهيه تصور فيها 

مرام مصبية عند الباب >> مبروك

ليلى >> الله يبارك فيكي ، وين اسيل

مرام >> لين غرقت روحها شوكلاطة الحيوانه ركبت تدوشلها ، قبل ما يجي محمد وقيس 

ليلى >> ماتخيليش كيف كنت شايله هم اليوم هضا

قعمزت جنبها >> امك عجبوها العرب بكل وحتى جيبهم سمح مشاء الله

ليلى >> شفتي باقة الورد

مرام >> شفت شفت "وضحكت"

صبت من جنبها تصلي ، و ليلى دزت صورة الورد ل سهم … على طول اول ما كمل مع هله رن عليها 

سهم >> حرقت ام التلفون وانتي ما ترديش

ليلى >> عارف اني بنموت خوف كنت

سهم>> وانتي خايفه امي مروحه تشكر فيك 

ليلى ابتسمت 

سهم >> قالت لي طالعه حلوه وهاديه بكل 

ليلى >> ما قدرتش نحكي حرف

سهم >> عليا انا بس اللسان يطلع 

ضحكت >> كيف قدرت تسوق بيد وحده بيش جبتهم وروحتهم

سهم >> فجنبي بدر بس ما قدرتش ما نجيش معاه 

ليلى >> دزيتلك حاجات معاهم راه 

سهم >> قالولي ياعيوني اه ، ماتبيش توريني شن كنتي لابسه 

ليلى >> مش صورتها لكي امس 

سهم >> بنشوفها وهيه عليكي 

ليلى >> اول حاجه غيرت دبشي اصلا ، ثاني حاجه ما يلتبسش عليها حجاب بيش تشوفها 

ابتسم >> باه حطي حاجه على شعرك السمح و افتحي كاميرا بنقولك حاجه 

ليلى حطت طاقية البجامة وفتحتها باستغراب, ابتسم لما شاف وجها و كان وجه مش باين واجد عشان فاتح ضي السياره 

وخرت من الكاميرا لما توترت من نظراته وقعد باين شوي منها 

ابتسم وهوا يشوفلها ومن غير تفكير قال >> انحبك 

//

//

فحوش العيله ، كانن البنات مع جدتهن هنا وامهن

على خشت الخطاب … اللي كانو يهدرزو على تفاصيل اليوم .. شن حطولهم وشن قالو وشن لابسه ليلى وكيف شكلها ومن فيه ومن ما فيه 

نجوى >> والله ياعمتي عرب كويسين والحوش اتريحي فيه 

سالمين >> مشاء الله يستاهل سهم

سديم بفضول >> سمحه باهي ؟

ابتسمت مجد>> هي واختها احلى من بعضهن

جميلة>> عارفه اختها صغيره مسكينة مطلقه 

مجد باستغراب >> والله جد ؟ حرام بنيه تهبل و هدرزت معاها دمها خفيف و تهدرز 

جميلة >> امها قالت راجلها عليه قضية ما قضية قعدت معاه اقل من سنة وما جابتش منه عويله

سالمين >> افتكت منه ، خير ما تقعد مع واحد غضيب كيف هضا على كيفها تطلق وتو يجيها نصيب تقوليش 

هديل >> والله باهي اللي اطلقت واجدات يخافن من الطلاق خصوصا لي تقعد فترة بسيطه 

مجد >> بس هضا مسكوه في قضية نقه كان بتقعد معاه 

وماكانوش يعرفو انه اللي يحكو عليها هذي ولدهم غارق فيها ، و ناويها بالحلال و قاعد عقله معاها وتفكيره عندها في كل ثانيه 

خشو بدر وسهم عليهم 

بدر بسماطه>> باهي عاد شن عندهم من بنات عرب سهم 

سهم بحت فيه >> على اساس ما تعرفش 

وشوشله بدر>> خساره اخت وحده ولنبراس كان هضا داعكتك

ضحك سهم>> كان يسمعك يدفنك 

سديم >> انت هضا فيش فالح 

بدر >> مش شورك انتي 

سديم >> ننننن "وصبت من جنبه" 

صبت مجد >> مبروك يا حبيبي وعقبال النسراف لي حذاك

بدر لحقها >> انقنه عقبالي 

سهم >> الله يبارك فيكي 

وطلعو كلهم من الدار وقعدن الكبار يهدرزن 

سهم وقف مجد يسأل فيها >> شن رايك

مجد ضحكت >> عسل بكلللللللل عرفت تختار 

ابتسم>> ماحكتش معاك 

مجد >> امك و مرات عمك المسكينه كلنها وهنا يبحتن فيها تحشمت منا بكل وما قالتش كلمتين على بعضهن ، حكيت مع مرات خوها اكثر شي 

سهم ابتسم

مجد >> و شكلها الاخت حتى هيه طايحه بوجهها "وغمزتله" خليني نخش نغير دبشي 

مسح على راسه من لاوره وطلع وهوا مبتسم ويرن عليها 

خطم عالجنان شاف لقمان يهدرز مع هديل ، فاتهم وطلع يكلم في ليلى 

لقمان >> باهي دورتي ؟

هديل >> دورت بس مش عارفه

لقمان>> خلي يمر عرس مجد وساهل لو مصره عالشغل 

هديل >> مش قصة اصرار بس نبي حاجه اطلعني من الروتين مليت بكللللل 

لقمان >> خلاص تمام 

هديل >> لو اشتغلت هتشيلني وتجيبني راه

لقمان ابتسم >> هو فيه غيري

ضحكت >> ما نستغنوش 

بحت فيها وحك على راسه من لاوره >> متريحه انتي

ربعت يديها>> لو قصدك على نبراس ف قصته انتهت خلاص هوا ولد عمي وبس زيه زيكم 

ابتسم مجاملة >> لو مشى وخطب ح تزعلي يعني ؟ 

"كإن يسأل فضول منه انه هل فيه مشاعر له او لا"

هديل >> مش ح نزعل عادي لانه حقه زي ما هوا حقي ، اكيد حتى انا ح ننخطب … بعدين ما تنسش اني انا لي جيت وحكيتله على فسخت الخطبه يعني هضا قراري قبل ما يكون قراره … كنت حاسه انه نبراس مش متريح في الخطبه هذي ، ولا انا 

لقمان >> هكي احسنلك ، نقولك حاجه ما تزعليش ؟

هديل هزت براسها انه قول 

لقمان >> من اول اسبوع كنت عارف انه الخطبه هذي مش هطول ، حسيت طبعك وطبع نبراس مش واحد 

هديل >> مكتوب من ربي ممكن ، عشان كل واحد فينا يعرف هوا شن يبي … نحس في نبراس حدد موقفه و قدر يعرف مشاعره شنو عشان فالجديد يتعلم من الاول يحكي مش يقسى على روحه و يخلي الموضوع يمشي هكي وخلاص 

لقمان ابتسم >> اول مره نعرف انه عقلك كبير 

" وضربها بصبعه على راسها "

قدمت ايشربها وهيه تقول >> ماحدش فيكم عارف قيمتي بس "وضحكت" 

ابتسم وهيه برمت وخشت 

.

.

.

عند سديم لما طلعت من الدار قعمزت عالكنبه في الصاله ، جا عندها بدر واتكى عالساس

بدر >> الهديه الي استلمها سهم المنو 

سديم >> مش شورك انت 

بدر بعصبيه >> سديم شن قايلك على ام الكلمة هذي 

سديم >> من خمس ثواني قلتها ليا ، لما تقعد ما تبيش تسمع حاجه ما تقولهش الغيرك 

بدر قرن حواجبه وزفر بعصبيه >> الهديه المن 

صبت من جنبه وفتحت درج المكتبه وطلعت منها الكيس ، كانت جايبتها معاها على اساس تبي تعطيها له كل ما تبي تعطيها ترتبك واتوتر

قربت من عنده و مدتله الكيس رفع حاجبه ونزل يديه لي كان مربعهن

سديم خبطت الكيس على صدره >> امسك امسك لكي الهديه يا بدر الدين ، لكي يا حيط 

رخى حواجبه و مسك الكيس ، وهي وخرت يدها وعيونها دمعن من الاستفزاز 

برمت وهيه تقول >> مش هدية راه، بس عشان دفعت عليا القفطان وحاجات غيرهن ف هذي من باب رد الجميل بس 

مسحت على عيونها وهيه بارمه ، مسك يدها من عند المرفق يبي يبرمها رن تلفونه قبل ما يحكي 

سديم فلتت يده >> رد يابدر على تلفونك رد 

فكت يدها بالقوه وطلعت طلع التلفون من جيبه وفصل الخط ، 

وهي طالعه بعصبيه قابلت هديل لي خاشه من عند الباب 

هديل >> كنك

سديم >> شي شي عطيني المفتاح بنروح لحوشنا

مدتلها المفتاح >> سيسي شن فيه

سديم >> شي قلت 

هديل >> تعالي لقمان فالجنان تو يصبيلنا بنجي معاك

سديم >> بنقعد بروحي تو نقوله يوصلني 

ما فهمتش هديل شن فيه ، وخذت منها سديم المفتاح و مشت الحوشهم لقت لقمان قدام الباب سلمت عليه وخشت 

طبقت باب الحوش و نزلن دموعها >> غبييييه غبيه مش من حقك تبكي مش من حقك تزعلي من كلامه ومعاملته كيف تبيه يعاملك يعني كيف تبيه يعاملك يا غبيه 

مسحت دموعها و عزقت المفتاح عالطاوله بعصبيه ما قدرتش تسيطر عليها ، خوفها كله من مشاعرها يطلعن وهيه ما تبيهنش يطلعن عشان عارفه روحها ح تتعب وخصوصا مع بدر الدين اللي اخر حد اتمنى تسلمه قلبها ! 

"من المؤذي جدا أن تكتشف بغتة أنّك هشّ أكثر من اللازم تجاه شيء ما،

أو شخصٍ ما."

~

.

.

.

خشت غيرت دبشها و مسكت تلفونها بحتت فالتاريخ ، ايام يا مجد وتكوني معاه في حوش واحد 

حطت على رقمه ولها كم يوم ما حكتش معاه كويس ، بعد شويه تردد رنت عليه .. ثواني وجاها صوته لي خلا قلبها يدق 

صالحين >> غالطه ولا شنو 

مجد >> بلا سماطه عاد

صالحين ابتسم >> كيف حالك 

مجد >> بخير وانت

صالحين>> الحمدلله 

مجد >> مش فالقسم صح

صالحين>> لالا من ساعه روحت 

مجد >> اممم 

صالحين >> رانه تبي حاجه ؟ ولا بتقوليلي بنطلع بكرا ولا رايفتي عليا 

مجد>> غلط كلهن 

ضحك>> يعني ما فيش امل ترايفي بكل 

مجد >> نصكر راه 

صالحين بضحكه>> نجيك  عادي جدا 

مجد>> عارفتك اديرها 

صالحين >> انتي قولي تبي تشوفيني وتلقيني عندك توا 

مجد ابتسمت >> خليك في مكانك صقع برا 

صالحين>> مش موضوع صقع تلج ، شوفتك بالدنيا 

مجد بتوتر >> رنيت نسأل بس ، امس حكيت معايا فالصبح وبعدها اختفيت

صالحين >> عارفتيني مخليك على راحتك ، لو عليا كل ثانيه نرن

بعفويه ردت >> عادي رن "وسكتت ثواني" قصدي يعني عادي 

ابتسم وماحبش يوترها بزياده>> شن صار اليوم في خطبت سهم

مجد حطت راسها عالمخده >> مشت تمام الحمدلله وسهم مبسوط بكل 

صالحين>> شكلهم ناس كويسين 

مجد>> بكللللللل ، عارف الناس اللي اتريح معاهم من اول مره

صالحين>> زيك هكي 

مجد >> وبعدها تقولي ليش ما ترنيش صح ؟ عارفني مانعرفش نرد 

ابتسم >> اسمعي بس مش ضروري تردي 

مجد >> نبراس شكله جا ، خليني نشوفه بلكي يبي ياكل ونجي حرام اكيد جميله رقدت 

صالحين >> عليك قصة نبراس هضا

مجد>> نشوفه ونجي 

صالحين>> انا مش مصكر ، صبي شوفيه و تعالي 

مجد ضحكت>> من جدك

صالحين >> والله نعست ومش وقت نبراس بكل 

ابتسمت >> خلاص خليك عالخط نحط التلفون ونشوفه ونجي

صالحين >> تمام 

حطت التلفون ، وطلعت لقت نبراس في نص الدورج

مجد >> وين مختفي اليوم

نبراس >> فالشغل والله ، تبي حاجه

مجد >> بنشوفك لو بتاكل

نبراس >> لا تعشيت بنركب نرقد

مجد>> تمام تريح شكلك تعبان بكل 

نبراس >> من مبدري روحت مسكني سهم برا يحكيلي على خطبته تقول ما خطب غيره 

ضحكت وهي تقول>> خطرها تعرف يوم مشيت للمستشفى اخر مره

نبراس >> اها لها فترة طويلة كم شهر ، معش مشينا

مجد بضيق >> مش هضا موضوعي ، المهم يعني يومها المره هذي شفت بنت طالعه من عند الدكتوره وتبكي كانت تخيل طلعت اخت ليلى خطيبة سهم "وابتسمت"

نبراس >> يوم ما خربت السياره صح ؟ "نبراس باستعباط" كان في وحده لابسه اسود طلعت يومها شفتها 

مجد باستغراب عشان نبراس عمره ما ركز على حاجات هكي >> خلاص هذي هيه لي كانت عند الدكتوره حتى نذكر وقتها مديتلها اميه و هيه طلعت على طول وانا خشيت 

هز راسه بدون ما يرد وركب لداره ، وردت مجد الدارها مسكت تلفونها 

مجد >> الو 

صالحين بنعس >> طلع متعشي الافندي

مجد >> اها جاي من مبدري بس كان مع العيال برا ، انت نعست

صالحين>> بكل 

مجد>> خلاص ارقد 

صالحين >> شويه بس وتو تصكري 

كملت مجد معاه كلام وهوا اصلا كان نعسان دقيقتين و رقد 

//

//

عند ليلى ، بعد مافجعها سهم بالاعتراف كان رد فعلها تصكر الخط في وجه وتمشي عند مرام تجري 

مرام صكرت القرآن وبحتت فيها >> صدق الله العظيم ، كنه وجك اصفر 

ليلى >> سهم 

مرام انفجعت>> تي كنه ؟

ليلى>> قالي انحبك متخيله

ضحكت بعلو صوتها 

ليلى >> مش وقت نوبة ضحك يابارده

مرام >> ليلى شن متوقعه يعني يقولك ؟ جاي جايب هله من شويه و مشقي روحه لا معقب عصير لا قاتو لا شوكلاطه لا ورد ، شن تبيه يقولك انتي كيف اختي 

ليلى>> مش عارفه " وقعمزت جنبها " قلبي كان ح يوقففف كأني اول مره نسمعها 

ابتسمت >> معناها حتى انتي تحبيه 

ليلى >> صكرت في وجه الخط 

مرام بضحكه>> نحس فيه طيب بكل ، ويستاهل انك تحبيه 

ليلى >> سهم هضا ما فيش كيفه "ابتسمت " حنون بشكل ما تخيليش بكل ، ديما مبتسم وديما نطمن وانا معاه ونحس انه قلبي هكي يطير من الفرحه كل ما نسمع صوته ولا يرن ولا نشوف مسج منه

مرام ابتسمت>> معناها صبي يامتخلفه رني عليه 

ليلى عزقت فيها المخده متاع الصالون >> كملي صلاتك وادعيلي 

مرام >> تقول ماشيه تحاربي عدي عدي😂 

.

.

.

خشت للدار خذت نفس وعاودت رنت جاها صوته وهوا يضحك

ليلى>> بلا سماطه عاد را نصكر

سهم>> قصدك كل ما نقولها لكي ه تقعدي تصكري في وجي 

ليلى>> مش هكي بس فيديو يعني ما عرفتش شن ندير

ضحك >> خوذي وقتك لعند نسمعها فيديو وصوت وصورة وكتيبه وكل شي

ابتسمت >> كيف عرفت اني نحب الورد الابيض

سهم >> ما عرفتش بس حسيت هكي ذوقك

ليلى>> شكرا على كل شي

سهم >> في حد يقول انحبك الحد ويقوله شكرا

دق قلبها >> ماه سهم عاد

ضحك>> خلاص سكتت سكتت

//

//

عند بدر الدين … كان في داره ، فاتح العلبه لي فيها الساعه و ماسكها في يده يبحت فيها … تنهد ومسك تلفونه حط على رقمها بس ما قدرش يرن 

وفي نفس اللحظه رن رقم على تلفونه ، بعصبيه رد 

بدر >> مش صكرت الخط مره ومرتين وثلاثه ؟ معش ترني عالرقم هضا خلاص عاد مش كل شويه نعاود ونزيد نقولك 

البنت >> اهدا اهدا لكي فترة طويله مختفي قلت نطمن بس 

بدر >> معش تطمني ، مافيش داعي ومعش ترني خلاص مش كل مره بنفصل الخط في وجك ! 

صكر الخط و عزق التلفون عالسرير بقوته ، هضا اللي يدير سريب الروحه ، من كثر ما يعرف بنات وموزع رقمه لدرجة لا يعرف اساميهن ولا يذكر حتى من هذي وكيف عطاها الرقم حتى … بس الفترة الاخيرة حاس انه خلاص معش يبي يحكي مع حد ومش طايق يسمع صوت بنت … بس ليش ؟ مش فاهم ولا عارف 

//

//

ركب الداره بعد كلام مجد الي قالاته له ، حط على رقمها و رن عليها 

مرام >> الو ، كنت نحسابك روحت رقدت

وبدون مقدمات قال>> مرام نبيك تحكيلي كل شي بصراحه 

ب استغراب>> صراحة شنو و لشنو 

نبراس >> سليمان 

                   الفصل الثلاثون من هنا 

تعديل المقال