روايه حافة المنتصف
مسك تلفونه و اتصل بيها
مرام >> وينك
ابتسم >> عارفه غارق فالشغل بس اذكرت الرسالة متاعك
مرام >> ربي يوفقك يارب ، بكرا طيارتك؟
نبراس >> بكرا اه ، مبدري وتيت دبشي اليوم اكيده ح نروح متأخر اصلا
مرام >> دورة شنو باهي
نبراس >> تدريبيه ، عشان المهمات لي نطلعولهن
مرام >> مهمات شنو ؟
نبراس ابتسم >> مرات تجينا مأموريه في اي مكان فالشرق ، فيه خليه شاكين فيها يبونا نهجمو ، فيه جماعة مخ*درات .. فيه ناس جايين تهريب … نمشو نحن و نصيدولهم لحد ما نهجمو
مرام >> قصدك بس*لا*ح
نبراس ضحك>> امالا ب العاب ؟
مرام >> وكيف تقعد هكي باهي ما اتوترش ما تخافش تصيرلك حاجه
نبراس >> وهضا عليش ناخذو في دورات ، كيف تحمي روحك كيف تصرّف وكيف تقدم وتوخر لما تحس بخطر
مرام>> بس مهما كان صعب الموضوع
ضحك>> تو انتي عليش خفتي ؟ انتي اللي بتهجمي ولا انا
مرام تنحنحت >> يعني نسأل بس
نبراس >> اسألي اللي بتسأليه
مرام >> خطرهااا
نبراس >> شنو؟
مرام >> نقولك حاجه بس ما تقولهش
قرن حواجبه >> شن فيه
مرام >> ارخي صوتك حاجه عاديه
نبراس >> احكي
مرام >> سهم وليلى تعاركو هضك اليوم ، ومعش رن عليها ولا هيه رنت
نبراس>> كنهم؟
مرام >> على قصة ادم ، وشكله سهم ماشي له
نبراس >> خلت ولد عمي يودر كلا انتن يا بنات الصديق
ضحكت >> حرام عليك شن دارت ، مشغوله عليه بس ما تبيش ترن
نبراس >> تو بعد نروح ندوره
مرام بصوت متقطع>> نبراس ، ما تقولش انك تحكي معايا ، يعني هكي بلكي هوا يحكيلك بروحه
نبراس تنهد >> بدون خوف يا مرام ، بدون خوف وانتي معايا كم مره نقولك كل شي انا نتحمل مسؤوليته ، بعدين سهم اصلا مش قايلي انه يحكي مع ليلى اختك ، ف انا نعرف منك بس قدامه ما نعرفش
مرام تنهدت براحه >> مهم قلت نقولك عشان ليلى تخمم شكله بدا الفاس يطيح فالراس ، خلاص مانعطلكش انا
نبراس >> لا عادي عطليني
ابتسمت >> شوف شوف شغلك يا سيادة الرائد
ابتسم بجديه >> سلام
صكر الخط وباب المكتب مفتوح ، نط الصالحين وخش عنده
نبراس نفض روحه >> فجعت امي يا قليل الربا
صالحين >> اسملله عالكسبر كلا المعدنوس يصبر
نبراس >> مخالط خالتي واجد انت ؟ كسبر ومعدنوس
صالحين ضحك>> الله غالب راس وليد واحد لازم نعيش مع هنيوا التفاصيل كلهن
ضحك >> شن تبي
صالحين حط يده على خده >> انت كنك
نبراس >> زمري انت وبدر كل ما تحقوني تقولولي كنك ؟
صالحين >> انا وبدر بذات احساسنا ديما ما يخيبش
نبراس حط كراع على كراع >> ماعندنش عمات للزواج
صالحين >> واخذها واخذها ، لو يصبي فيها باتك بروحه … وراس امك جميله ماحد زافها وجايب منها عيال غيري "وصبا"
نبراس طلق فيه الدباسه وطبت فالباب ودارت صوت عالي
صالحين بحت فيه وفع حاجبه وضحك
نبراس>> اقسم بالله المره الجايه نطلق رص*اصة مش دباسه ! اطلع من قدامي
طلع وهوا يضحك بصوت عالي بعد ما استفزه ، والشرطى اللي واقفه عالباب يضحكو عليهم
//
//
روحو ليلى وامها من عند اسيل
مرام>> هلها شن قالو باهي ؟
حليمه>> امها قالت لي عارفته مش بقصده وعارفين طبع محمد و بنتي عارفته
مرام >> كثر خيرهم ، شندايره يدها ؟
حليمه>> لا كويسه قالت محمد جابلها دوا
مرام >> يرقع
ليلى>> خوك يده غليضه
مرام >> المره هذي هلها زمطوها وسكتو نتمنى ما تكونش فيه مره ثانيه
حليمه >> قبل ما هلها يحكو حتى نحن مش ساكتين ، محمد وليدي وكبدي لكن عند الغلط ما حد بيصبي معاه
ليلى >> تي كلا انا ان شاء الله نطيح في هل دار كيفكم وين بنلقى دلع كيف هضا
حليمه>> انتي غير كان توافقي كل مره جايك حد وكل مره متحججه بالقرايا
مرام بحتت فيها >> جبتيها الروحك
ليلى >> الانسحاب طيب 😂باي
مشت الدارها ، حليمه بحتت في مرام >> ما تقعدنش اتعنطزن كيف انتي كيف اختك الي يجيها راجل كويس توافق عليه وقت توا معش حد يدور في شي غير الي اخلاقة ونيته كويسه
مرام >> ماما تحكيلي ؟
حليمه>> وكني ما نحكيلك مازلتي صغيره ، وخلاص بتخشي في الخمس شهور .. ولا عندك عيل لا عندك حاجه تربطك بيه شن ناقصك
مرام >> ناقصني نفسيتي اتريح ، الشهور هذينا ليا عدن في حرق بين المحاكم وبين عذاب نفسي وبين شهور العده لي عدن هم على قلبي
حليمه>> مرومه ، الطلاق مرحلة مش ساهله ، انتي عدا عليك هكي وهضا كله ونحن حواليك ومعاك احمدي ربي ، ما ملي مسكينه اطلقت وهلها واعرين .. قولي الحمدلله كل ما تحمديه يزيدك من فضله ونعمته
ابتسمت >> الحمدلله مليون مره عليكم ، الحمدلله انكم هلي و ما خليتونيش بروحي
حليمه >> راس بنيتين ووليد عاد لمن بنخلوكم
قربت منها وابتسمت >> بابا وين ؟ رايح يطول برا "وغمزتلها"
حليمه ضحكت>> عشرة عمري هضا عمره ما يدير لي في بالك، عازمه عمك عالعشاء
ابتسمت وهيه تدعي ربي يرزقها حب امها الباتها و عشرتهم الطيبه
مرام>> خليني نمشي نصلي ركعتين وندير الحمادي حاجه ياكلها بلكي يجي ياكل
حليمه >> الله يربحك
//
//
روح نبراس فالليل ، على تدريسة سيارة سهم
نزل من سيارته وقربله ، فتح الباب وضي السياره ولع … شاف نبراس وجه سهم
رفع حاجبه >> شن الاخبار
سهم >> الحمدلله ، قالو ماشي بكرا
نبراس >> اه طرابلس زي العاده
سهم >> تمشي وتجي بالسلامه
نبراس >> الله يسلمك ، كنه وجك
سهم >> ساهله تخبيشة قطوسه
ضحك نبراس و بحت فيه >> معاك الرائد نبراس الهادي ، اعترفو على يدي اكبر تجار واكبر شبكات وعصابات فيك يا ليبيا ، و تجي انت تقولي تخبيشة قطوسه؟
سهم بحت فيه بنص عين وبرم وجه>> داير عركه ، و احتمال يجي يشكي فيا عندك
نبراس >> اخرى الله يبارك عالقدعنه ، ومن عاد لي نازل فيه ضرب ؟
سهم >> فرخ حرام تبيله تربيه ، بيش يلم روحه
نبراس>> اهم شي مسحت كبدك ؟
سهم حط يده على صدره >> هضا برد شويه
ضحك >> براحتك بكل ، انت اشلكها وانا نلم وراك "وغمزله" مع اني متأكد انه مش ح يجي يشكي
برم نبراس لحوشهم ، وسهم بحت فيه وهوا مش فاهم مقصد كلامه عشان كان يحساب انه نبراس ما يعرفش انه يكلم في ليلى
//
//
ثاني يوم فالصبح
بدر >> هيااااااا مازلت بنتكي عالصالحين
نبراس >> عليك صداع طلعنا طلعنا
بدر >> شحوره كل مشيه لطرابس
خبطه على راسه >> اطلع وانت ساكته ديما تبربر ديما لوكلوك صبح
طلع بدر وهوا يتمتم ، لقو لقمان برا
لقمان >> صباحكم مبروك يا عيال العم
نبراس>> صباح النور
بدر >> مش مبروك بكل بوجوهكم
لقمان ضحك>> بتحطهم فالمطار وترد ؟
بدر>> اها
لقمان>> سهم مشى للمعرض ، وانا طلع عندي شغل وحطيت سيسي توا فالجامعه… وانت مروح ازرق جيبها عال ٢ تكمل
بدر بدون نقاش>> خلاص تمام تمام
لقمان رفع حاجبه>> غريبه ما ناقشتش؟
ضحك نبراس وهوا يولع في دخانه ويذكر في كلام مجد
بدر بحت فيه وبرم بحت في لقمان >>كان قلت باهي يا ووه وكان هزبت يا ووه وانتو الواحد معش عرف يرضي امكم
طبق باب السياره ، وطلعو شور الصالحين ومنها للمطار
..
..
رن تلفونه وهوا فالانتظار متاع المطار يراجو يركبو.. بحت في الصالحين اللي عطاه نظره وضحك ونزل راسه على تلفونه
صبا بعيد شويه ومشى يرد
مرام >> فالمطار ؟
نبراس >> اها شويه ونطلعو
مرام >> توصل بسلامه
نبراس >> الله يسلمك
مرام >> نطمن بس بعد توصل قولي
مسح على وجه >> تمام
مرام >> في حاجه؟
نبراس >> لالا ، بس حكيت مع سهم امس
مرام>> باهي
نبراس>> وجهه مخبش طلع ماشي ومتعارك مع ادم ، ما قاليش تفاصيل ما يندريش اني نعرف بدوته مع اختك ، قالي بس انه تعارك مع واحد و ضربه
مرام >> ياربي عليك قصة
نبراس>> ماتخافيش مافيش حاجه ح تسير كله شوري
مرام ابتسمت >> لما تقولي هكي نطمن بكل حتى لو كان الموضوع كبير ، فكرة انه كل شي شورك تريح في قلبي
بعد السماعه من وذنه وغمض عيونه >> ما تفكريش في شي و طمني ليلى بالعقل
مرام >> تمام ، توصل دزلي حتى مسج
نبراس>> هي تمام
والمكالمة كلها كانت على عيون الصالحين ، اللي كان فاطن وحاس بكل حركه يدير فيها ولد خالته !
ونبراس المكالمة على قد ماكان يبيها ، بس كانت توجع في قلبه عشان مش عارف لو ح تستمر ولا لا
//
//
مروح من شغله ، وماشي عند عياله وهوا صح بيشوفهم بس بيشوفها حتى هيه
خششه مؤمن للمربوعه ، و قيس جنبه و ماسك لين
مؤمن >> انا بنطلع اصحابي يرجو فيا عندنا قرايه
اسيل تضحك>> و اطلع ، محمد مازال راجلي مش مطلقه راه يعني محلل عليا يا باتي
بحت فيها بنص عين >> وين نندري عليه انا سريبكم هضا 😒 "وطلع "
ناديه تضحك عليه>> ديري قهوه
اسيل >> و اطلعيها انتي
ناديه >> اسيل
قرنت حواجبها وخشت للمطبخ ، ومحمد قاعد على نار كل شويه يبحت يبي يلمحها
بحت في قيس اللي كان ماسك تلفونه >> ماما وين
قيس>> مع جديده ناديه جوا
محمد >> بتروح معايا
قيس >> وماما
عاودت لين ورا قيس>> ماما
ابتسم محمد >> حتى هيه معانا
هز قيس براسه ، ولين جت جنب قيس تفك منه فالتلفون … طلع قيس يجري عشان ما تاخذش و وراه لين تجري و تعيط
على خشت اسيل >> تي بشويه كنكم
قيس يجري ولين وراه
اسيل >> ماما سكتيها وخوذي منه التلفون
وخشت للمربوعه حطت سفرة القهوه
محمد >> كيف حالك
اسيل>> بخير "وبحتت فيه"
بحت فيها وهيه تشوفله بعيونها ، وصبا قرب منها و قعمز مقابلها
محمد >> اسف مش هذي اللي بتسمعيها ! اسف والله اسف الحوش بلاكم ما نقدرش نقعد فيه … رايفت عليكي على وكالك و ضحكك و هداوتك وكل شي … مانقدرش نقعد بلاكي هنا كم يوم والله ما حسبتهن الايام بدونك يمشن بدون طعم مش عارف انتي بعيده لكي يوم يومين ثلاثه عشره والله مانحسب فيهن بس كل ثانيه تمر قلبي يتقطع وانتي بعيده ، ما عرفتكش قاسيه هكي انا
اسيل وخرت >> مش اسفه لي بنسمعها يا محمد ، انا نبي عصبيتك تخف .. تفكر قبل ما تقول الكلمه ، تهدا شويه قدام العيال ومعايا.. ماعنديش غيرك .. بس انت هكي ح تخسرني مش ديما بنسامح مش ديما يا محمد … انت لما يرقالك حتى كلامك ما تفطنلش انت كنت بطلقني من ورا عصبيتك كنت ح تحلف اني ح نحرم عليك
قاطعها >> انا غبي والله وحمار ، معش تقولي هكي معش بنسمعها الكلمه هذي ، ولو نموت ما نديرها ساعديني عشان نهدا انتي الي انا عندك نتريح و نهدا انتي اللي عندك تريح عصبيتي ، لما تقعدي بعيده عليا مش ح نهدا
صبت وجت بتطلع >> روحي معايا
اسيل بحتت فيه >> خليني اليومين هذينا بروحي بعدها ساهل
محمد >> مش واجد يومين؟
اسيل رفعت يدها >> عشان تحسب مليون حساب مره ثانيه قبل ما تحكي اي كلمه
خش قيس يجري ومازال لين تجري وراه ، طلعت اسيل ورفعت لين معاها تسكت فيها وهيه مازالت تعيط عالتلفون ، وطلع محمد
//
//
وصل خوه وولد خالته للمطار ، بحت فالساعه لقاها ١ وربع … مشى شور جامعة سديم درّس فالباركنق و نزل صبا قدام السياره وعيونه نازلات على تلفونه
على طلعت سديم شافاته واقف
سديم >> لقمان قالي انت جايني استغربت
بدر بحت فيها >> قلنا نديرو خير
سديم قرنت حواجبها ، جت بتركب فالسياره شافت بنت مصبيه فالسياره لي جنبهم وتبحت في بدر الدين
بحت فيها بدر بعفويه و ركب عادي جنب سديم
سديم >> هضا الخير لي جاي بديره؟
بدر صكر الباب وعلق المفتاح >> نعم
سديم بحتت فالسياره لي فجنبهم و هزت براسها ، طلع بشويه
بدر >> شن فيه
سديم >> مليون مره قتلك لما بدير مواضيع فيهن خلطت بنات انا طلّعني منهن تمام ؟ معش تجي للجامعه بحجت انك بتشيلني وانت جاي تبحت في بنات الناس
قرن حواجبه بعصبيه >> شن قصتك انتي ؟ شن قصتك فهميني ! شن الكلام لي تحكي فيه واي بنت لي بحتت فيها ، تي اقسم بالله ما فطنت و بعدين انتي شن مالك نبحت ولا ما نبحتش
رخت حواجبها بزعل و ميلت راسها شور القزاز >> صح ما دخلنيش بكل ، انا اسفه بس معش تجيني خلي لقمان وسهم افضل ليا ولكي
رخى يده ومسح على وجه بعصبيه وسكت !
وصلو لشارعهم نزلت و هيه لي متعوده كل م تروح تخش حوش جدها ، بس مشت شور حوشهم وخبطت الباب
//
//
ومن هاليوم ومن هالاعصاب مرن يومين
يومين مافيهنش اي جديد ، سديم معش جت حوش جدها من هضك اليوم ودايره حجت الامتحانات والقرايه
و ليلى ما حكتش مع سهم من يوم عركته مع ادم كان فاصل منها وهيه ما رنتش
وجماعة طرابلس غارقين فالتدريبات
واسيل مازالت في حوش هلها وعلى اساس اليوم بتروح مع محمد
//
//
كان يومها ما عندهمش تدريب الصبح ، طلعو جماعته وهوا قعد بروحه وكان يحكي معاها مسجات
نبراس"جاي خاطري في مكرونه وكل شي فيه بس مانعرفش نقرب شي"
مرام " غريبه مش متعلم ، ديما يقولو لي يخشو كلية شرطه وضباط يعتمدو على روحهم"
نبراس "لا انا ماكنتش نقرب في شي "
اختفت عليه شويه معش ردت
دزلها " وينك "
رن تلفونه بمكالمة فيديو استغرب ، فتح وشاف وجهها وحاطه ايشرب على راسها بشويه .. ابتسم ، بعدين وخرت من الكاميرا
مرام >> ما تسبليش بعيونك صبي للمطبخ، مش ح نوريك وجي
نبراس >> وعليش
مرام>> نعلمك ادير مكرونه ، مرات مراتك تتعب واديرلها انت غدا
نبراس قرن حواجبه وبصوت هادي >> مرام
قلبت عيونها بدون ما تبان عليه >> سكتت صبي
صبا نفس ما قالت له ما بش يزعلها ، ثبت التلفون وقعد يسمعلها شن تقول ويدير
مرام >> وريني كذا ؟
نبراس >> هاه الميه هكي تمام
مرام >> تمام ، خلاص توا غطيها وخليها لحد ما يطيب الدجاج
نبراس>> وكيف نعرفه طاب
مرام >> ياربي عليك بياره ، تو انا نقولك
ضحك ومسك التلفون بان عليها وجه مسحت على حواجبها ك عادتها لما اتوتر
غطا الطنجره و طلع وهي تبحت فيه
نبراس >> لعند امتى باهي
مرام >> ما يطولش الدجاج
نبراس يبحت فيها >> مانحكيش عالدجاج
بينت وجهها للكاميرا حطت يدها على حواجبها ومسحت عليهن
نبراس ابتسم
حولت من الكاميرا و سكرتها قعد هو اللي باين عليها بس وهي شاشه سودا
رفع حاجبه وسكت وهوا مبتسم
مرام >> امتى مروح
نبراس >> خلاص اربع ايام والخامس نروحو
مرام >> باهي تمام ، تدريب فالليل اليوم
نبراس >> اها فالليل
سمع صوت هرجتهم ، صكر الفيديو على طول
مرام >> الصالحين
ضحك >> الهرجه جت
مرام >> المكرونه راك تنساها
نبراس >> تو الصالحين يكملها يعرف
مرام ابتسمت >> خلاص تمام ، قتلك
نبراس >> قولي
مرام >> بنقولك بعد تروح من التدريب دزلي بس
نبراس >> بدون ما تقولي
صكر الخط على خشت الصالحين >> شن الطنجره لي عالنار هذي
نبراس >> مكرونه وانت لي ح تكملها
صالحين رفع حاجبه>> ومن امتى مكرونه تعرف اديرها
نبراس >> اهو عرفت "قعمز ومسح على وجه"
صالحين >> في حاجه
نبراس خبط على صدره>> تعبت
صالحين >> نقولك احكيلي نقولك كنك تقولي ما فيش شي
نبراس >> اقسم بالله خلاص والله معد فيا حيل بكل تي كني بس ، الانضباط لي كنت فيه و الجمود وين راح بس
صالحين ضغط على كتفه >> حس بقلبك شن يقولك ، فكر في روحك بدون ما تخرب الدنيا
نبراس >> فالحالتين ح تخرب ، كان علقتها ح تخرب كان سيبتها ح تخرب
صالحين >> مافيش حاجه ما لهش حل ، معش تشائم ازح
نبراس >> خليني نصلي ، شوف شوف المكرونه
طلع صالحين و هوا حاس بولد خالته و رفيق عمره اللي اول مره يشوف حالته هكي !
طرح نبراس صلايته و ختم صلاته بدعاء واحد
"يارب ريّح قلبي "
//
//
طالع قارن حواجبه ، لقى هديل خاشه من الجنان
هديل>> ارخيهن ارخيهن
بدر >> اختك فالحوش
هديل >> لا
بدر>> جت هنا ؟
هديل هزت براسها انه لا
بدر>> امالا وينهي من امس
هديل >> عند عيت خالتي
بدر زاد قرن حواجبه و ضغط على يده زين >> عند عيت يحيى صح ! ومن شالها
هديل >> اهدا بس ، امس خويله جتنا و روحت معاها فالليل
بدر>> خالتك عندها بنت فرخه فالاعدادي ! سديم شن تبي ماشيتلهم
هديل >> حوش خالتي عاد
بدر خبط الباب بيده>> خشي خشي كذااا "وطلع وهوا يتمتم"
جت مجد وراها >> تي هضا كنه ؟
هديل>> عشان سيسي فحوش خالتي
مجد >> كلا هما الاثنين مش عارفه كنهم من يومين ، هوا فاصل بكل و هيه معش جت هنا
هديل >> ما حكتليش شي وهوا طلع فاصل بكل
مجد>> شفته طالع قارنهن ربي يستر
..
..
ركب وهوا يخبط و مسك تلفونه حط على رقمها ، مرتين و ثلاثه واربع ماردتش
" اقسم بالله العلى العظيم و رحمة عمي جلال ، كان ما تردي نجيك فحوش خالتك ونسحبك من وسطهم ! و قولي بدر الدين ما قال "
دز الرسالة وهوا من العصبيه يديه يرجفن وهوا يكتب فالمسج ، وعلى طول عاود رن
سديم >> شن تبي ؟ شن فيه عليش الحلف والتقطيع هضا كله
بدر >> غمي اسسسس اسسسسس ! شن يمشي فيك حوش يحيى؟؟
سديم >> اسمه حوش خالتي ما اسمش حوش يحيى !
بدر >> وعليش ماشيتلها ، ماشيه عشان يحيى ؟ مش قادره تقعدي بعيده عليه
سديم >> بدر انت الي اسكت ! شن الالفاظ هذينا والاسلوب هضا ! احكي كويس شن ماشيه عشان يحيى هذي زي ما انت و سهم ولقمان وغيركم عيال عمي ف يحيى ولد خالتي ! شمعنى نحكي معاكم ونهدرز معاكم وهوا لا
بدر بعياط>> قتلك صكري فمك انا صح! لا وبايته اخرى لعند امتى ناويه ! بتقعدي لعند تشبعي بيه
سديم >> مازلت نقولك سقم اسلوبك ، لما نرقد في دار يحيى هذك الساعه تعال احكي ! بس الراجل محترم من جيتي امس ما قعدش فالحوش بكل عشان ناخذ راحتي !
بدر >> صكري صكري ! مازال تذكرلي في مزاياه شن رايك هيا قوليلي اخرى شن عاجبك فيه سي يحيى ! عارفه كان م تروحي معاك لعند الليل ح نجي و نقربعها معاك ، وكلمي باتي ولا اي حد يروح بيك تروحي معاه ح نطربق ام الشارع را انا معش فيا عقل اتقي شري خيرلك
صكرت سديم الخط في وجه ، وهوا عزق التلفون فالكرسي لي جنبه
//
//
بعد تفكير و بعد ماحكتلها مرام على حكاه لها نبراس ، حطت على رقمه بتردد وخايفه من ردة فعله
فتح الخط و جاه صوته هادي وهوا يقول >> ايواه
ليلى >> عارف اني المفروض ما نرنش عليك لاخر يوم فعمري بس انا غبيه
سهم >> ليلى ! را مازلت فاصل منك بكل
سكتت
جاها صوته بعد ما تنهد >> ومن قالك اني ح نخليك وما نرنش عليك ، بس كنت بنهدا
ليلى >> كم تبيلك عشان تهدا سنة
سهم >> بعد تسمعي الكلام ولما نقولك معش تردي معشششش تردي ما ترديش ! وتفهمي وتستوعبي
ليلى >> باهي بدون عياط بسس بدون عياط را مش رانه بنتعارك ، لو بتهزب بنصكر
سهم >> ليلى حاولي تفهميني
ليلى >> نحاول بس مش هكي ، تو نقدر انا نمشي نضرب شن اسمها هذي بنت جيرانكم لو مثلا رنت عليك ؟
ضحك بصوت >> ديري يلي بديريه
ليلى انحرجت>> مش قصدي هكي ، ترن ولا ما ترنش عادي يعني
سهم >> متأكده ؟
ما بتش تجاوب >> انت تمام !
سهم >> تمام لما معش تردي ، وتمام لو تحاولي تغيري ام رقمك كله اصلا … و تصكري عليه من كل مكان ح نقعد تمام .. بس هكي ح نقعد طول الوقت نفكر لو دز ولا لو رن
ليلى >> وعليش تفكر لو في حاجه ح نقولك دز ولا رن
بعصبيه>> مازلتي بتردي عليه ومازال بيدز ولا بيرن ؟ انتي تفهمي عربي ولا ب اي لغة نحكي معاك
ليلى >> فهمت قلنا فهمت ! شنو الاعصاب هذينا مش مستاهل الموضوع مش مستاهل
سهم >> تعرفي تغيري رقمك
ليلى >> تو نحاول
قعدت ليلى تحكي معاه وهوا مازال مش فاك ، لحد ما شويه شويه بدا ياخذ ويعطي فالكلام وما حكوش على موضوع ادم ابدااا او بالاصح سهم ما بش يجيب اي سيرة
//
//
كان واقف فالشارع من لما كلم سديم ، ويراجي فيها تروح وكان حالف على نهار اسودد لو شافها مروحه مع يحيى !
.
.
وصل حوش هل اسيل ، و هوا ياخذ في النفس وقلبه يدق تقول جاي يخطبها مش جاي بيرد بيها الحوشهم
نزل من السياره مشى بخطوات سريعه شور الباب ، وماسك كيس في يده
قرب دق الباب ، وسمع صوت واحد يعيط