روايه حافة المنتصف الفصل الواحد وعشرون 21 بقلم ايه

 

 روايه حافة المنتصف

 الفصل الواحد وعشرون 21

بقلم ايه

بعد تقريبًا ساعه من وقفته برا والدنيا صقع ، شاف سيارة سهم خاشه للشارع 

درس قدام حوش عمه ، نزلت سديم من السياره و خبطت الباب وماسكه شنطتها في يدها … بحتت فيه من الجنب و عيونها بيطلعن ناررررر و مشت خشت وصكرت الباب بالقوه 

جا سهم لعند بدر وبحت فيه >> كنكم انت وياها ؟

بدر >> تقهر تقهرررررر تحرق القلب هن من جوا 

سهم >> تي هوب ياراجل شن فيه 

بدر >> تعاركت معاها هضك اليوم مشت معش جت الحوش هنا بكل ومعش تلاقت مع مجد وهديل تجي بروحها وتحججلي ب ام الامتحانات

سهم ضحك >> وانت شن تبي تشوف لزولها

بدر >> سهم ازف صكر ام فمك "وبرم خنقه من عند ماليته "

وسهم واقف طالق يديه ويضحك>> عادي فش غلك عطيني بوني بالمره 

بدر >> بتزيد كلمه بنخربه لكي وجك التخبيشه لي حولت من وجك نردلك امها ب اشر منها 

سهم >> طول الطريق وهيه تسب وانت بتضرب تي شن هالعنف لي انتو فيه

بدر >> مازالت تحكي قصدك "وطلق ماليته ودفه" مازالت تعاند ! عارفيني ما نطيقش امه يحيى انا ليش ماشيتلهم ؟ تعاند عشان شنو مش عارف 

سهم >> تنفس بس ازحح خوذ نفسسس خوذ نفس 

بدر حط يده على وجه ومسح 

سهم >> ما قالت شي ، كلمتني فاصله قالت لي تعال روح بيا من حوش خالتي توا … طلعت مشيتلها طول الطريق قالبه وجهها و تقولي بدر هضا لازم يحترم نفسه 

بدر >> انا لي نحترم نفسي اه ، اقسم بالله لولا عمتي هناء را خشيت كريتها مع ام شعرها نوريها حوش خالتي هضا كيف اللي بايته عندهم 

سهم >> خلاصصصصص اسكت ازح ، خلينا نمشو للقهوه 

بدر عزقله المفتاح >> سوق كذا معنديش خلوق 

ركب سهم وهوا يقول >> لا حول ولا قوة الا بالله 

وبدر يبحت فيه ومازال فاصل

//

//

نزل من السياره مشى بخطوات سريعه شور الباب ، وماسك كيس في يده 

قرب دق الباب ، وسمع صوت واحد يعيط ويقول قووووووول 

فتح بات اسيل الباب>> هضا مؤمن جايب اصحابه يلعبو في صوني في الدار البرانيه قلب الشارع

ضحك محمد >> صوته جايب من برا 

سلم عليه عمه وبحت فيه وقاله>> اخر مره تجيني حرجانه منك ! اخر مره نسمعها زعلانه وتشكي منك، نعرفك ونعرف هلك ونعرف تربيتك ولا والله ما خليتهش عندك ثانيه 

نزل محمد راسه >> حقك عليا 

مسك كتفه >> نستاذن انا عندي كم مشوار ، خش الحوش حوشك 

.

.

خش لقاها قدامه ومازالت متردده انها ترد معاه ولا لا بحت فيها ومشى عندها وهيه قارنه حواجبها..

محمد >> اسيل عاد والله ندمت  

ربعت يديها >> اخر مره

محمد >> لو تعاودت ديري لي تبيه 

اسيل >> محمد راه المره هذي بجد مش ح نقدر نتحمل اعصاب وعياط و تخبيط ، لانه لو صار ح تكون اخر مره و مش ح نرد في كلمتي

هز براسه 

مسك يدها، وفتح الكيس طلع منه بوكس  … فتحه و طلع حديده ذهب 

ابتسمت  >> بتروح 

محمد قرن حواجبه >> بنروحو اسمها

هزت راسها  >> خليني نشوف العيال

خشت ناديه سلمت عليه 

شويه ولبست اسيل ولمت حاجتها وطلع محمد بالعيال 

ناديه>> زي ما وصيتك 

اسيل >> حاضر 

ناديه ابتسمت>> ربي يهنيك ويدوم فرحتك 

اسيل >> سلمي على بابا

طلعت وهيه مخطمة من الجنان على طلعت مؤمن بحت فيها وقال>> مروحه انتي وهرجتك يا وجه النكد

اسيل >> اسكت وانت كملتها اتناقر مع قيس تقول من عمرك

ضحك >> دروحها تراضت هيه وراجلها 

اسيل >> خش يا بارد 

مؤمن ضحك و خش ، طلعت وهيه مبتسمه و ركبت جنب محمد 

//

//

عند اللي كانو في طرابلس ، حاط تلفونه على وذنه ويحكي مع خوه 

بدر >> والله رايفنا عليك 

نبراس >> كيف حال هلك كلهم

بدر>> تمام تمام امي كل يوم نبراس ونبراس تقول غايب سنه

ضحك وهوا يقول >> بلا دوارة حس ، شن جو بنات عمك

بدر بسماطة>> كويسه هديل 

نبراس تنحنح >> باهي تمام ، را تنقصهن حاجه 

بدر>> شوري شوري 

نبراس >> وردبالك من سيسي را تقعد متعارك معاها

بدر >> تي هذي تجلط ، واخذه حقها ثالث ومثلث

نبراس ضحك >> بنت امها 

بدر >> توكل الشغلك كذا 

نبراس >> اسمع انا ٣ ايام الجايه ح يمسكو منا التلفون زي ديما تدريب علق و بعدها ح نروح 

بدر>>خلاص تمام

نبراس >> سلم عليهم كلهم 

بدر >> يوصل يوصل تم 

صكر الخط ومشى طلع عند الجماعة اللي كانو قالبين القعده دخاخين وقهوه وكارطه 

جا جنب الصالحين لقاه ماسك تلفونه 

صالحين >> ما سألتش عليها ؟

نبراس ب استعباط>> من

صالحين>> امك

 ضحك >> ارخي حواجبك بس ، كويسه كويسه مجد كلمتها مبدري 

صالحين>> باهي كويس تعرف تحكي و ترد 

نبراس >> مش شورك

صالحين >> الفاتحه بعد م انروح ب اسبوع اه

نبراس >> بجوك هيه

صالحين >> نبراس را والله عارفني انت موسعلك بالي ف ابلط 

نبراس >> يسير خير 

صالحين >> غصبا عنك

ضحك وسكت

صالحين>> شن جو عيت مكرونه ؟

 بحت فيه من جنب >> صالحين 

صالحين>> تحسابني في رابعه ابتدائي ، الي عطاتك طريقة المكرونه اللي عمرك مادرتها والي تكلم فيها و عيونك ذايبات وقلبك متمرمد في جرتها هيه نفس البنت صح لي شفناها يوم المستشفى؟ 

نبراس مسح على وجه >> انهي الكلام ، و فكر في مجد وفي فاتحتك … انت وبدر طلعوني من ام ام راسكم 

وصبا بعصبيه من جنبه، ووقتها تأكد الصالحين انه هيه نفس البنت و عصبية نبراس من خوفه عليها وعالي صاير بينهم 💔

//

//

خشت اسيل مع العيال اللي لاقتهم ليلى وهي تقول 

>> تي معقوله هكي يا عميمه تسيبوني بروحي

قيس >> كنا مع ماما

ردت لين وراه >> ماما

ضحكت مرام >> بغبغااااااء اللي تسمعها تعاودها 

رفعتها فوق و باستها وبحتت في اسيل>> ان شاء الله تقعدي ربيتيه

اسيل>> محد يغلط في راجلي 

ليلى >> طلعنا كخه نحن توا

ضحكت وهيه تقول >> هابا لولاكم😂😂

مرام >> شن اخبارك انتي ، رايحه ناقصه في هالكم يوم

اسيل >> خزي عليكي ما جيتينيش معاهم هضك اليوم 

مرام >> عارفتيني مش اصحاب انا والطلوع قعدت 🙄

اسيل >> سادك حبسسسس ، دوري شغل واطلعي وتعالي 

مرام >> كنت نفكر فيه بعدها نلغي فالفكره مش عارفه متردده نطلع ونواجه هالعالم الخارب بوضعي هضا

اسيل >> بلا سماطه بس ، بكرا قهوتي عندكم فالعشيه نحس فايتاتني اخباركم

ليلى >> اسمعي بدون اعتراض خلي العيال يباتو عندي مرايفه عليهم بكل

اسيل >> يتعبوكي

ليلى غمزتلها >> يا طروح انتي ديما يباتو عندي 

اسيل ضحك >> سامطططه 

قيس >> نبيي نقعد مع ليلى

اسيل>> اسمها عميمه ليلى يا قليل الادب

قيس دار بيده بمعنىي مش مهم

ليلى ضحكت>> حبيبي الصايع ، فوتها تعال تعال 

اسيل >> ليلى يا حيوانه خربيه باهي 

ضحكت لين لي كانت رافعتها مرام وضحكن معاها اسيل ومرام 

اسيل >> عميمه مع عمو فالمربوعه

مرام >> اه عارفتيها محامي دفاع على محمد مخزرطه بابا

اسيل ضحكت >>تصبحي على خير

مرام >> تلاقي الخير 

..

..

عند محمد لي كان فالمربوعه مع باته بعد ما خشت اسيل جوا 

قدم وباس على راس باته اللي من يوم ما تعارك مع مراته وهوا ما يحكيش معاه 

الصديق>> محمد راك مانكش عيل صغير ، عندك عيال ما تخليكش عيل 

محمد >> عيب يا باتي الدوه هذي 🙂

ضحكت حليمه عليهم وهيه تبحت فيهم 

الصديق>> لا مش عيب على عملك الاسود هضا 

محمد >> مش اول واحد يغلط 

الصديق >> و غلطه عن غلطه تفرق ، المره هذي سامحاتك المره الجايه حتى كان هيه سامحت انا معش ح نردها لكي

بحت محمد في امه>> تي هضا باتي ولا راجل امي

ضحكت حليمه وهيه تبحت فالحاج 

الصديق>> خرفي ، انت يا تقلبها عصبيه يا خفة دم 

حليمه غمزت المحمد >> خوذ خوذ مراتك واركب الحوشك ومعش تخليها تطلع زعلانه

غمزلها >> من عيوني

وطلع 

بحت فيها الصديق >> حلال نصبي نعطيه كف

حليمه >> كنت كيفه يا حاج في صغرك 

بحت فيها وضحك >> عمري زعلتك ؟

حليمه >> ما شفت معاك الا الايام الطيبه 

بحت فيها وابتسم

//

//

كانت لين في حضن ليلى ترقد فيها وتحكي مع سهم ، وقيس تفرج عالرسوم و رقد من مبدري 

سهم>> عندك جامعة بكرا صح ؟

ليلى >> اه والفرخه هذي حالفه ماترقد 

سهم ابتسم>> مرام وين

ليلى>> اكيده تصلي في قيام الليل بعد تبدا في الصلاة دورها معش تلقاها

سهم >> مشاء الله ، المهم قتلك"وتنحنح"

ليلى >> قول

لين >> قول 

ضحك سهم لما سمعها >> عنجد وجها🤣🤣

ليلى >> هذي معش ناويه ترقد راجي راجي نعطيها الماما 

ضحك سهم و ليلى خذتها ومشت الامها

ليلى >> ماما مرام تصلي و هذي حالفه ما ترقد

حليمه ضحكت>> جيبيها مازلت ساهره

ليلى >> بعد ترقد حطيها حذايا تنوض ما تلقانيش جنبها تبكي 

حليمه>> باهي 

صكرت الدار وردت دارها وحطت راسها عالمخده بنعس وردت على سهم >> ايوه شن تبي تقول 

سهم >> حرام عليكي شلتيها

ليلى ضحكت>> تو ماما شويه وتجيبها 

سهم >> ليلى بنشوفك

ليلى قرنت حواجبها وسكتت

سهم>> بكرا بنجي للجامعه

ليلى قلبها يدق>> كيف ؟ 

سهم >>ما تبيش نجي 

ليلى >> مش هكي يعني بس عليش

سهم >> نحكي معاك ليا فتره كويس وما شفتكش ، وانتي مش شايفه غير صور بلكي داير فوتوشوب يعني 

ليلى ضحكت >> لا واضح جمال طبيعي "فطنت الروحها شن قالت وسكتت"

ضحك بهدوء>> انا جاي بكرا راه ، تكملي محاضرتك تلقيني قدامك

ليلى >> مش ح يخلوك اتخش

سهم >> اصحابي كلهم 

ليلى >> الكم وحده قتلي جاي

سهم >> وحده وبنجيها بكرا

ضحكت >> انا طفيت بكل

سهم >> نتلاقو بكرا

ليلى>> نفكر قبل

سهم >> فعيونك باي 

صكر الخط و هيه على طول رقدت ،اما هو الي كان يكذب وشايف صورة لها في تلفون ادم بس لمحها لمح بس … واللمحه هذي صورتها مش قادره تفارقه لحد صبح اليوم

‏-سهيت بـ صورتك لحظة ، تمنيت العمر وياك-

//

//

عند الحبايب الي متصالحين جديد 

خشت تلم فالحوش >> محمد شن مدينة الاشباح هذي لي قاعد فيها

محمد>> ليلى بتركب تضمها قتلها ماحد يقربها 

اسيل >> لازم تلتم هذي 

محمد ابتسم >> خلي كل شي عنّك بس كلمي وحده تجيك بكرا تلمه لكي

ابتسمت >> عارفني مانحبش حد يدير حاجه في حوشي

محمد >> ناعليا حوشك 

اسيل هزت راسها وضحكت

محمد ضحك >> وحشتيني

اسيل >> بيش مره اخرى تفكر قبل " وحطت صبعها على راسه من الجنب " دماغك هضا يشتغل

محمد >> حاضر والله على قد ما نقدر ح نهدا 

اسيل >> وعد؟

ابتسم >> وعدين 

//

//

كملت قيام الليل وقلبها متريح لما كملت صلاتها ، بس عقلها مش متريح واللي تفكر فيه لما حطت عيونها على تلفونها لقاته يرن

ابتسمت بدون ما تفطن الروحها و خذت تلفونها وردت 

نبراس >> واعيه

مرام >> كيف كملت صلاة 

نبراس ابتسم >> ربي يقبل 

مرام >> منا ومنك ، كملتو تدريب وروحتو؟

نبراس >> اها من ساعه خشينا ممكن ، تالف بكل

مرام >> ليش ما رقدت

نبراس >> بدون ما نحكي معاك

سكتت و حطت يدها على حواجبها ومسحتهن

ابتسم لما عرفها توترت  >> رنيت بنقولك الثلاث ايام الجايه عندنا تدريب مكثف وبدون تلفونات

مرام بزعل >> والله ! تدريب شنو يعني

نبراس >> كل شي سل*اح و هجوم و جري وكله 

مرام >> نبراس رد بالك 

قلبه تحرك من مكانه و دق بالقوه ، وهوا ك سيادة الرائد هذي اول مره يكتشف انه عنده قلب اصلا ! 

نبراس >> حاضر ، بكرا الصبح طالع و ثالث يوم نكملو فالليل , الخميس فالصبح نروحو 

مرام >> تمام 

نبراس >> عادي نحكي معاك لحد ما ننعس لانه مش جايني نوم

مرام >> والصالحين وين غريبه مش حذاك

نبراس >> اكيده رقد مجد معذبته تعذيب 😂

ابتسمت >> باهي احكيلي شنو التدريبات 

ابتسم و بدا يحكيلها وكل مره سؤال وموضوع لحد ما وصلت المكالمه للساعه …. ساعه كلام ما حكوش فيها لا على خطبته ولا على طليقها… ساعه كانت كلام على تفاصيله وتفاصيلها … شغله وحياته وهله و خوه و علاقته بيهم … بدا يحكي بدت تبان عليها شخصيته بشويه شويه ، رغم الزعزاعه والهوايل يلي صايرات في قلبه بس مازال باينلها جديته في كلامه في ضحكته وحتى في ابتسامته الخفيفه 

عرف حياتها وقرايتها وهو لي كل يوم يكتشف فيها شي جديد 

كملت معاه كلام و نعست ورقدت مش هوا ، مش هوا اللي كان مايبيش يصكر الخط مايبيش يفوت لحظه وهوا معاها ، خايف و خايف موت من انه ح يعيش بعدين عمررر كامل بلاها ! ح يعيش بدونها كيف باهي ! صورتها في قلبه و قدام عيونه و صوتها عالق في وذنه ! حركات مراهقين يا نبراس اجمددد اهداااااااا !

‏ثُم تبدأ في ملاحظة نفسك ، من غيّر فيك كُل هذه الأشياء ؟ كيف صرتٓ شخصًا آخر ؟

~

//

//

ثاني يوم 

واللي لها كم يوم مختفيه على حوش جدتها ، ودايره سبلت الامتحانات جت بعد ما رايفت عليهم .. غصبا عنها وهيه اللي ما تبيش تشوف بدر الدين

بس مستحيل وهوا اللي كان قاعد جنب جدته وقت هيه خشت وجت عندها 

>> امي رايفة عليكي

سالمين >> الباب فالباب يا هرابه

سديم >> كان عندي امتحانات

سالمين >> جيبي كتاباتك واقري حذايا هن 

سديم ابتسمت >> حاضر 

 كان عيونه عليها وهي تسلم على حنها بحت فيها وقال >> ماكنتش معاك انا 

مدت يدها مجامله >> كنت مرايفه على امي 

مد يده وضغط على يدها >> جيتي بروحك

غمضت عيونها وقرنت حواجبها ويدها مازال في يده >> عمي الهادي فم الباب

هز راسه وطلق يدها 

بحتت في جدتها >> امي مجد وين

سالمين >> تهيالي فالمطبخ 

سديم >> ليش قاعده بروحك فالجنان عميمه جميله و عمتى نجوى واكيده ماما ح تجي 

سالمين >> لالا نحس في عظامي وصقع برا لزيتهن من حذايا

بحت في سديم وهوا يقول >> من قالك بروحها كيف مش مالي عينك

برمت وجهها و ما عدلتش عليه >> نسأل في امي انا

سالمين>> هيااااا براااا برا انت وياها لزيتهم نبي هدوء اطلعو 

برمت سديم >> تريحت هكي

بدر>> هششش و اطلعي 

طلعت قدامه بعصبيه ومشت لمجد فالمطبخ 

مجد >> تسجيل غياب لكي كم يوم 

سديم بنرفزه >> وجيت يدوبك نقول يا هادي خلا امي تلزنا من الدار 

مجد >> ياعليك قصه انت وياها

بدر >> ما درت شي هيه تنابش 

سديم >> ديما انا لي نابش وانا الي كل حاجه انت شي ؟ طيب ومسكين

رفع حاجبه>> طبعا 

على خشت سهم صبا جنب مجد وبحت فيها ، هزت بكتوفها وضحكت وهما مستمرين

سديم >> كذا بلا برود ومعش تحكي معايا ، تهدد تحاسبه صبح تخلي فيا نروح من حوش خالتي

بدر>> امالا بتباتي ؟ مافيش بيات برا الحوش كيفك كيف اختك

سديم ببرود >> وانت شن مالك ؟ نبات ولا ما نباتش ووين نبات ووين نمشي " كانت تردله في الكلمه لي قالها لها يومها "

وهوا فهم انها تعاند >> صار هكي هيه ؟ وحده بوحده 

سديم >> امالا وحده ب اثنين ، مش قتلي شن دخلك وشن مالك ومالي ؟ يبقى وانت شن دخلك و شن مالك ومالي برضو 

بدر  ب اعصاب>> وديني كان ما توطي صوتك ومعش تقولي الكلمه هذي ح نعطيك كف يا سديم  ، معش تقولي شن دخلك 

وخرت وخافت منه >> فيك يا وادييييييي 

وطلعت من جنبه ، بحت لقى مجد و سهم يبحتو ومربعين يديهم 

بدر>> ابلط انت وياها اه 

مجد >> تؤتؤتؤ ما فيش احترام للعمه بكل 

بدر قرن حواجبه على رنت تلفونه برقم من الارقام لي ديما يرنن من البنات لي يعرفهن ، صكر الخط و قفل تلفونه وطلع

بحت سهم في مجد >> ان شاء الله خير

مجد >> دابينه هضا حالهم ح يطولو بكل

سهم >> فاطنه ؟

مجد >> مش من اليوم اخرى 

سهم >> وبدر له فتره التلفون معش حقيته على وذنه

مجد >> ماحدش ح يجيبه غيرها "وضحكت"

سهم >> بس بالعناد ح تخسره

مجد >> انت فهّم من عندك وانا من عندي 

سهم >> ما تشهدريش بس عشان ما يفطنوش و يقعدو يحسبو في حساب تصرفاتهم

مجد >> محدش فاطن غيرنا وشويه نبراس 

سهم ضحك >> سيادة الرائد ديما زاقب

مجد >> نجك ليا رايفة عليه 

سهم >> يروح طيّب ، اليوم جو العمال للحوش على قصة التشطيب

مجد ابتسمت>> عقبال نفرحو ب شقتك 

سهم >> و نفرحو بيك "وغمزلها"

بحتت فيه بنص عين وطلعت بتشوف البركان سديم شن صار معاها 😂 

..

..

طلعت للجنان لقت امها وصبايا عمامها وقعمزت نزلت راسها عالتلفون 

جت مجد جنبها >> اهدي 

سديم >> هديت هديت

مجد >> يديك يرجفن

سديم >> عادي متعوده على قطافه

مجد >> مش تعاندي مره ثانيه خليه يحكي و فوتيه

سديم >> والله ونسكت له ؟ ويقولي نضربك كف على وجك قليل الادب 

مجد ضحكت>> ماه تعانديه تخسريه وبعدين على اساس ح يقدر يمد يده بيش الهادي يكسره

سديم >> ما قلتش غلط انا قالي شن دخلك بيا يوم ما جاني للجامعه ويبحت في خلق الله مش لام عيونه ، خلاص قتله وانت شن دخلك … عالاقل انا ماشيه حوش خالتي ب احترامي مش نبحت و عيوني زايغه 

مجد مسكت ضحكتها>> خلاص عاد ، اختك وين

سديم >> قاعده اتفرج على مسلسل طايحه فيه جديد 

مجد >> و ما كلمتش خطيبها؟

سديم >> تخيلي يا مجد لا ! تخيلي ما دزتش حتى رسالة من يوم طلع 

مجد >> خاطري نعرف شن تفكر 

سديم>> انا لي معاها في نفس الحوش ما فهمتش ، تبيه ولا ما تبيش … فالبدايه كانت متحمسه و ترن و تدز …. خصوصا اول اسبوع بضبط بعدها بدرت تبرد 

مجد >> هو نبراس ما عطاهش رد فعل ، بس كلنا نعرفو انه هو هكي تحاول معاه مش تعوفه بكل 

سديم شيرت على رقبتها>> هضا نششششف وانا نقوللها وتقولي لا يبيني يرن 

مجد >> ربي يهدي سرهم

سديم>> امين "غمزتلها وهيه تقول " وسيادة المقدم وين مختفي

مجد >> امس نحكي مع نبراس نسمع في صوته جنبه 

سديم >> ما رنيتيش عليه

مجد >> وهوا ما رنش ، اخر مره يوم الخطبه هكي شدينا فالكلام

سديم >> تو قاعده تنتقدي في هديل واديري كيفها

مجد خبطتها على راسها >> مازلتي فرخه وتنصحي فينا

سديم>> عقلي كبير صقع عليك وعليها 

ضحكت مجد و هيه تبحت فيها

//

//

عند اللي طلع متشيك ، مشى شور الجامعة 

ما يعرفش وين محاضرتها ، وقف قدام الكليه ورن عليها 

ليلى بتوتر >> جيت

سهم >> اه وين انتي

ليلى >> كيف طلعت من الكليه

سهم >> انا واقف قدامها باه ، فيه عرم بنات طلعن

ليلى >> وانت تبحت فيهن كلهن 

سهم ابتسم >> را تقعدي غايبه يا بنت

شافها وهيه تقرب منه ، تمشي بخطوات بطيئه بتوتر و خوف … الملامح نفسهن لي شافهن فالصوره واجمل بواجد…. العيون اللي خلنه راح وهوا حط عيونه فيهن اول ما شافها 

نزلت التلفون من يدها وهيه تقول >> خلاص هكي شفتني

سهم ابتسم >> طلعت فوتوشوب ولا شنو ؟

ليلى ابتسمت >> لا بس ع الواقع اطول "ونزلت عيونها ب ارتباك"

تعالي نمشو غادي شويه زحمه هنا 

ليلى >> وين

برم وهوا يمشي قدامها >> ما ناكلش فالبشر

بحتت فيه بنص عين ومشت وراه ، وقف وبرم عليها في مكان شوي بعيد عن زحمة الناس 

ورد شاف لعيونها وابتسم 

ليلى >> في حاجه تضحك

سهم>> طولك

ليلى قرنت حواجبها >> كنه

سهم >> قد صبعي 

ليلى >> باه ما يضحكش

كان مخلي مسافه بينهم وهيه مربعه يديها ، واتهرب من عيونه بتوتر

ابتسم وقال >> سمحه كيف ما كنتي

نزلت راسها و فركت يديها ، وهوا نزل عيونه على يديها 

مدلها كيس >> امسكي

ليلى >> شنو هذي؟

سهم >> للين مش لكي

رفعت حواجبها ، ورختهن وهيه تقول >> عليش متعب روحك 

سهم >> عطيهن لها ما تاكليش منهن 

فتحت الشكاره و بحتت في الشوكلاطات وبعدين بحتت فيه >> كلهن كلهن اللين ؟

ضحك >> خوذي اللي تبيها 

ليلى >> والله تجمل عليا انت وياها ، تنقعهن مش واخذه شي 

سهم طلع زي الكرت من جيبه ومده لها >> جبتلك حاجه اخرى انتي 

ليلى فنصت فيه>> سهم شنو هضا عاد

سهم >> شفره ، خوذي بسرعه

ليلى >> مانبيهش

سهم >> خوذيها وتو نتفاهمو بعدين 

ليلى>> قتلك تو نشري انا "وخذتها منه بعد ما قرن حواجبه"

سهم >> خلاص هي قدامي ، امشي للكليه لعند يجو هلك

ليلى>> مازلت نحكي 

سهم >> موضوع الشفره انتهى بعد تروحي اعلقيها ، هيا قدامي

بحتت فيه وبرمت مشت شور كليتها بدون ما ترد… ابتسم وهوا يشوف فيها و روح وهوا محفور تفاصيلها في ذاكرته 

//

//

في العشية ، نزلت اسيل ومعاها كيكه دايرتها 

ولقت مرام توتي في القهوه ،وريحة الحوش بخور 

مرام >> ماما عالراديو فالجنان قلت ندير قهوه نشربو حذاها بيش نهدرزو

اسيل >> ليلى وين

مرام >> روحت من الجامعه ورقدت معش ناضت

اسيل>> عليك قصة هيه والنوم 

مرام ضحكت >> خششت عليها قيس مسكين مل وهوا يواعي فيها وطلع حذا ماما

اسيل >> خليني نعزقلها لين تنتشها

ردت وهيه تحرك فالقهوه وتضحك >> خليها احسن 

رفعت اسيل لين ومشت للدار عند ليلى ، وعزقتلها لين عالسرير وطلعت تضحك

لين عالسرير تكر في شعر ليلى و ليلى تعيط

ليلى >> اسسسسسسسسيل لمي ضنوتك 

مرام تضحك واسيل معاها 

اسيل >> صبيييي هيا القهوه تبرد 

طلعن للجنان حطن سفرة القهوه جنب حليمه لي كانت تلعب في قيس 

اسيل >> هي احكيليييييي شن اخباركن

مرام >> على حطت ايدك مافيش جديد بكل

اسيل>> ولعند امتى

مرام >>لعند ما ربي يدلني عالطريق الصح

اسيل >> في حاجه 

هزت راسها وابتسمت >> لالا

سكتت ما بتش تحكي على نبراس ، خايفه تحكي عليه تخسره خايفه يلوموها … خايفه يقولولها غلط وهي عارفه انه غلط 

على طلعت لين تجري وتضحك وليلى وراها >> والله نوريك يا سوسه 

ضحكن  كلهن عليها ، وقعمزت جنبهن 

ليلى>> بردت القهوه 

مرام>> طولتي

ليلى بحتت في اسيل>> ما تقولولش حكيتو شن درتي امس انتي ومحمد بعد ركبتو 

ضحكت مرام 

واسيل ضحكت >> عيب يا بايخه

ليلى >> يعني حاجات كبار

اسيل ضحكت >> سامطططه 

مرام>> حي كان تسمعك ماما

ضحكت ليلى وشربت قهوتها ، سمعت تلفونها يرن ولين جت تجري بعد سمعت الرنه  قعدت تعيط تبي التلفون 

                الفصل الثاني وعشرون من هنا 

تعديل المقال