روايه حافة المنتصف الفصل الثاني وعشرون 22 بقلم ايه

 

 روايه حافة المنتصف

 الفصل الثاني وعشرون 22

بقلم ايه

مسكت لين وهيه تعيط رفعتها ، وخشت بيها للدار وردت 

سهم>> ليش ما علقتيش ام الشفره لي جبتها لكي

ليلى >> ياساتر بشويه

سهم >> ليلى !

ليلى >> يا سهم عاد ما خليني قبل نقوللهم اني جبت شفره ثانيه ، تو نقوللهم اني مضايقه من قروب الجامعه قعد رقمي عندهم كلهم ف بنغير شفرتي 

سهم >> تمام تمام ، بكرا تعلقيها اه

ليلى >> حاضر بدون تهزيب

سهم يسمع في لين تعيط >> كنها لين 

ليلى>> عشان التلفون دايره مناحه

ابتسم>> عطيتيها الشوكلاطه

خبطت على راسها >>روحت رقدت نسيتها بكل

سهم >> نسيتيها ولا بتاخذيها الروحك

ليلى >> نننن اشبعو ببعضكم انت وياها 

ضحك سهم ولين مازالت تبكي

صبت ليلى بيها وخذت الشكاره ، وقعمزتها مقابلتها و طرطشتلها الحاجات عالسرير ، ضحكت وليلى ابتسمت وقالت >> واجد جايب

سهم >> انتي وياها ماه و مرام 

ابتسمت  >> شكرا "وقربت السماعه من لين" قولي شكرا عمو سهم

لين  ما لقطتش الا اخر كلمه >> س ح م 

ضحك وهوا يسمع فيها وضحكت معاه لما سمعاته

ليلى >> ياسلام عالضحك انت وياها " قولي سين"

لين >> س 

ليلى>> هاء 

لين >> حاء 

ليلى >> هاء يا بنتي هاء 

لين >> حاء 

سهم ضحك >> نقعدلها سحم مافيش مشكله عادي 😂 

ليلى>> عليك غلا

سهم ابتسم >> خلاص نكلمك بعدين انا فالمعرض 

ليلى>> تمام ، ماشي 

صكرت الخط ، وصورتله لين وهيه حايسه فالشوكلاطات ودزتله الصوره جنبها قلب 

..

..

ردت جنب مرام و اسيل وقعمزت

اسيل>> حتى انتي زي مرام بتقوليلي ما فيش حاجه

ليلى ضحكت>> لا انا نوعيتي فقش عارفتيني 

مرام>> بما اني عارفه القصه خليني نصبي نلم سفرة القهوه على ما كملتن

اسيل >> شكله موضوع يحمس احكي احكي 

خشت مرام بالسفرة ، و ليلى قابلت اسيل وبدت تحكيلها في قصتها مع سهم 

ليلى >> وبس يا ستي راك تسمعي بنتك تقول سحم قدام محمد استرينا

ضحكت >> بعدك بغبغاء الي تسمعها تقولها 

ليلى >> عارفتها البطه 

اسيل حطت يدها على خدها >> عيونك يلمعن يا بنت

ليلى>> مافيش حاجه يعني مازلنا فالبداية

اسيل >> تستاهلي كل شي كويس ، تستاهلي قلبك يتريح بعد الي شفتيه

ليلى >> انا خايفه من حاجه بس ، بعد ادم على طول خش فحياتي سهم ما نكذبش عليك … اللي عشته مع ادم مش ساهل بكل انهلكت عشان نتخطاه ومش عارفه لو تخطيته ولا لا … مش فاهمه شن نبي 

لنا فتره نحكو صح مش طويلة واجد بس فتره تكفي اني نحس براحه معاه . ربي حطا في طريقي عشان ننسى بيه ادم ممكن مش عارفه والله

اسيل ابتسمت >> اللخبطه هذي بروحها تكفي والله ، تكفي تحسسك انه هوا يعنيلك … صدقيني مهما صار مش ح يكون اسوء من اللي مريتي بيه ، وبعدين ما تفكريش فالوقت الحب يختلف يا ليلى ، انا محمد جا بخطبة هل مش انا جبته وحبيته بعدها في فترة الخطبه و بالاصح بعدها في الزواج قعدت نموت بدونه، فيه اللي يحب في يوم فيه لي في شهر فيه لي في سنه … كل حد و قلبه امتى يقرر يدق معش تحسبيها 

ليلى >> مانبيش نظلمه معايا نحس فيه راجل معايا ، قعدت نلوم في روحي ليش ما كانش هوا اول من يخش حياتي 

اسيل >> نحس قريب ح نفرحو فالحوش هضا 

ليلى ضحكت >> قوليلي باهي شن صار امس مع محمد 

اسيل >> ياربيييي منك 😂

//

//

في المعرض 

لما وصلاته صورة لين ، بحت فيها وابتسم عليها وهوا يشوف للشبه بينها وبين لين 

خش بدر >> هوباااا دازتلك صورتها ولا شنو

سهم >> ماتبيش تلم خاربك

بدر >> ملموم 

صكر التلفون وبحت فيه >> شن امورك بعد فصلتك مبدري 

بدر>> ماصار شي وين الجديد ديما هكي انا وياها

سهم >> لا مش ديما هكي من قبل كانت مناقره ببصاره توا عركه مش مناقره 

بدر >> هي تحرق الدم

سهم يستفز فيه عشان يحكي >> ما قالتش حاجه غلط البنت بايته في حوش خالتها

بدر >> سهم را نمد يدي كذا اسكت

مسك ضحكته >> جايات سيارات بكرا فالمينا ، بنمشي انا وياك لازم  نوقعو 

بدر>> فاضي ما عنديش شي ، ولقمان باهي ؟

سهم >> لقمان انا وياه بنفس التوكيل نوقع انا يوقع هوا عادي ، يقعد يشيل سديم للجامعه وانا معاك للمينا 

بدر >> تمام تمام ، مافيش جديد عندك انت

سهم >> في شنو 

بدر >> في قلبك 

سهم ضحك >> تحكيلي نحكيلك 

قبل ما يحكي رن تلفون بدر صكر الخط و حطه صامت

سهم >> غريبه لكي كم يوم معش نحق فالتلفون على وذنك

بدر>> معش عندي راس لوجيجهن

سهم رفع حاجبه وهز راسه>> وتقوله شن فيه يقولك شي 

خش زبون للمعرض صباله وخلا بدر مقعمز وهوا يبحت فيه قارن حواجبه بعد ما استفزه

//

//

عند جماعة طرابلس

مر اليوم هضا عليهم في تدريب مكثثثف و بدون تلفون 

الصالحين اللي تحت ضغط التدريب يفكر فيها ويفكر في روحه ، يبي يسمع صوتها و يشوف شكلها بس يعاند فيها فوق عنادها ، حاس انها تفكر فيه بس مش عارف لو يصدق احساسه او يكذبه … مازال شعوره مذبذب ناحيتها مابين عاجبته ك شكل و ك بنت يشوف فيها من وهيه طفله …. و ك وحده توا فيها من الزعل اللي يكفيها قصة الحادث فسخة خطبتها يبي يحكي معاها ويفهم منها بس مايبيش يضغط عليها ! يبيها تحكي بروحها وتحبه كيف ما سبحان ربي الي حط حبها في قلبه ب اسرع وقت .

وعنده هوا سيادة الرائد اللي من برا يبان قطعة ثلج ، بس من جوا شن صاير فيه ! 

اول يوم بلا تلفون قلبه يعصر فيه عشان يسمع صوتها بس ، صوتها اللي في فتره قعد له حاجه تهدي الاعصاب … اللي يدير فيه غلط ولا صح مش فارق معاه ، مش فارق شي غير تكون حواليه بس ، شن ح يسير بعدين مش عارف بس كل اللي في باله انه شن ما صار يسير يا نموت معاها يا نموت بلاها مالهنش حل ثالث

//

//

فالجنان ، كانن البنات قاعدات يهدرزن … خشو بدر وسهم مع بعضهم في جرتهم لقمان 

مجد>> كنتو مع بعضكم

سهم >> اه اليوم شغل واجد بكل فالمعرض ، كملنا انا وبدر ولحق علينا لقمان بعدين 

مجد >> اوووب بدر معاكم

ضحك>> اه معش في بصاره

مجد غمزتله >> على شن ناوي 

سديم >> ناوي يجلط عمي الهادي ويخربله الشغل

بدر >> متعاركين نحن صح

سديم >> اصلا انا كنت بنخش  

وصبت من جنبهم خشت ، بحت فيهم و غمض عيونه ولحقها

سهم >> بشوووويه اه 

شيرله بيده نظام اسكت ومشالها

لقمان >>كنهم هضوما الاثنين

بحتت فيه هديل >> مش فاهمه بس سيسي فترة الامتحانات تقعد مش طايقه روحها 

لقمان ضحك وبحت فيها >> عكس الاطباع انتي وياها

ابتسمت وبحتت في سهم اختفت ابتسامتها وبتوتر قالت >> ما رنش عليكم نبراس 

سهم ابتسم >> خشو تدريب مكثف ما فيش تلفونات

هزت براسها و سكتت ولقمان حول عيونه من عليها وبحت في مجد لي كانت تحكي

مجد >> لعند بعد بكرا صح ؟

سهم>> اه يروح خميس 

مجد >> رايفنا عليه بكل حبيبي 

لقمان >> واخذ الغلا كله " ورد بحت في هديل لي كانت مربعه يديها وتبحت فيهم وساكته"

مجد >> مغير تسلمو كلكم

سهم >> ما تبو شي ؟ انا تالف وبكرا عندي شغل مينا

مجد >> عدي حبيبي تريح 

لقمان بحت في هديل >> قولي لسيسي توتي روحها الساعه ١٠ ونص ناخذها بيش ما نطولش عالشغل 

هديل >> خلاص تمام تو نقوللها . وهيه ديما مشحورتكم

ابتسم >> خوت نحن 

طلع سهم و لقمان بحت فيهن>> خلاص خشن حزن عاللي جوا صقع هنا

مجد ضحكت>> قاعدتلهم امي جوا تو نصبيلهم بالعكوز

ابتسمت هديل ضحك لقمان وطلع 

مجد >> حبيبي لقمان اهدا واحد في عيال خويا 

هديل >> بكل ما تسمعيلش حس ، في حاله 

مجد >> ربي يحفطهم ويفرحنا بيهم كلهم 

..

..

عند المتقاطعين جوا ، بعد ما سيبتهم وخشت مشى خش وراها خشت للمطبخ صبت كباية اميه ، واتكت بيدها عالمرمره

خش بحت فيها وصكر باب المطبخ 

حطت كباية الميه>> حول واطلع 

بدر >> مش طالع من هنا الا وانا فاهم شن فيه

سديم>> مافيش حاجه شن ح يكون فيه 

اتكى عالباب وربع يديه >> مافيش طلعه معناها

برمت من عند المطبخ وجت لعنده >> بدر الدين ما فيش شي 

بدر >> واخرى بدر الدين حلو الكلام

رفعت حاجبها وبحتت فيه >> مافيش حاجه انا مضغوطه من القرايا بس وانت مستفز

بدر >> انا مش مستفز بس ما نحبش العناد 

سديم >> وانا ما عاندتش مادرتش حاجه غلط 

بدر >> وانا ما درتش حاجه غلط ، يوم جيتك للجامعة كنت جاي نروح بيك لا كنت بنشوف حد ولا عندي فيه جو التخليط لي فالجامعه مانيش فرخ انا 

سديم >> وانا لما مشيت حوش خالتي مشيت عشان نقري بنت خويله عشان عندها امتحان وبتت عندهم يوم واساس يوم اللي كلمتني كنت مروحه يومها فالليل مفروض تكون عارف اني ما نباتش بعيد عن ماما 

بدر >> وليش ما قلتي هكي من الاول 

سديم >> عشان انت قتلي شن مالك ومالي ! معناها حتى انت نفس الشي 

بدر ابتسم ونزل يديه >> اوكي تمام ، بس رديت عليكي هكي عشان ما حاولتيش تفهمي ركبتي فيا على طول 

توترت و ما بتش تبين >> انت تحرق الدم اصلا 

بدر >> بس هضا ما يمنعش انه اخر مره تباتي فحوش عيت يحيى و خطيه يا سديم خطيه وما تخليش حواليك عشان ما تشوفيش الفصله الحقيقيه 

سديم رفعت حاجبها >> اسمه حوش خالتي ، و بعدين مخاطيته انت اللي مش عارفه كنك يعني ، زيك زي سهم ولقمان ومعتز ونبراس زي يحيى 

ابتسم ومن تحت سنونه قال >> لما نقصرو معاك في حاجه كلميه بس دابينك حوالينا خلاص ف كل شي تبيه انتي ولا هديل شورنا

ما بتش تكثر كلام من كثر التوتر ، و انه هيه وياه بروحهم في نفس المكان ، انضغطت و قلبها يدق وتحاول تبين العكس تمامااااا 

سديم >> خلاص خليني نطلع 

بدر>> نبي نسكافيه

سديم >> الساعه قريب ١٢

بدر>> لكي كم يوم حاقده وناويه شر ما درتيش ليا

ضحكت >> تو نديرلك 

بدر>> في داري انا

سديم >> قصدك نجيبه لكي في دارك

بدر >> قالولك اكل لحوم بشر ؟ 

برم فتح الباب و طلع ، تنهدت براحه بعد ما طلع و مشت طلعت الحاجات واديرله 

- كيف يستطيع المرء التماسك بعد أن يفقد قلبه، بعد أن يهدر جميع اجزائه بالحب لأجل أحدهم ، حينما يشعر أن النجاة شخص والعالم بأسرة غرق.

//

//

مقعمزه في سريرها جنب اختها

تفكر فيه ، هضا اليوم الاول عدا بدون تلفون وبدون صوته بعد ما تعودت عليه …. سارحه و تفكر فيه 

تفكر شن ح يسير بعدين 

كيف ح اتأقلم بعد ما خلاص يجوز وتقعد بنت عمه مراته ! ماهو مش اكيده ح تحكي معاه اكثر من هكي تحاول تمنع نفسها بس ما قدرتش ، كل ما تبعد تضيع وكل ما تقرب تغرق ، لا عارفه تسكت ضميرها ولا قادره تمنع قلبها !

اي قلب هضا اللي بيتحمل هضا كله ، اي قلب اللي بيتحمل وهم كانت عايشه فيه قبله وقسى وفراق واذيه ، وين ما بدا يتريح وياخذ نفسه شويه … جاه وجع بس بطريقه اخرى يخش حياتها و يقلب كيانها بس فالنهايه مش ح يكون لها !

تنهدت ومسكت تلفونها ودزتله 

"اليوم عدا يارب يكملن اليومين الي جايات بسرعه" 

دزتها ، وخذت محرمة الصلاة والصلايه ومشت طلعت للمربوعه لي برا تصلي عشان اتريح وتهدّي افكارها 

//

//

خش لحوشهم بعد يوم طويل وشغل ، دوش و صلى صلاته و خش مسك تلفونه وهوا ينشف في شعره 

ردت عليه بصوت ناعس >> طولت 

سهم >> كملت شغل وتكيت على حوش جدي وكيف روحت للحوش قاعد انشف في شعري 

ليلى >> نعيما 

سهم >> الله يسلمك ، لين مش معاك

ليلى ضحكت >> ركبت مع امها 

سهم >> عارفه انها تشبهلك بكل 

ليلى ابتسمت >> اه كلهم يقولو

سهم >> معناها عرفت عليش غلاوتها كبيره في قلبي 

توترت وغيرت الموضوع>> مبدري دويت قدام هلي على موضوع الشفره قتلهم بنصكرها و نشري جديده وعلى اساس صاحبتي ح تجيبلي وحده.. الله يسامحك خليتني نكذب 

سهم ضحك>> معلش كذبه بيضا

ليلى >> خلاص بكرا ح نعلقها بعد نروح من الجامعه عشان تصدق الكذبه

سهم >> رني عليا طول 

ليلى >> على اساس ماعندكش الرقم

سهم ضحك >> عندي عندي ، ليلى الشفره هذكي كسريها اه انسيها … غيري رقم الواتساب واي حاجه دايرتيها برقمك

ليلى >> سهم ممكن معش تفكر فالموضوع ؟ 

سهم تنهد >> مش عليك عليه مانبيش يوصل فيك ب اي طريقه 

ليلى >> معش تفكر … والله كيفه كيف الساس سبحان ربي اللي طلعه من قلبي زي الشعره من العجين

سهم نفخ >> خلاص غيري ام السيره

مش عارفه ليش ابتسمت على عصبيته >> خلاص خلاص ، احكيلي شن درت اليوم

سهم>> مش حاكي 

ليلى >> يبقى خليك عالخط لعند نرقد 

سهم >> والله

ليلى >> امالا بتسكر ؟ يا تحكي يا تقعد عالخط 

سهم >> رايحه واعره 

ليلى ابتسمت >>مافيش اطيب من قلبي احكي بس

ابتسم وهوا بدون ما يفكر قعد يحكيلها في تفاصيل يومه 

سهم >> وبس يا ستي بكرا عندي شغل فالمينا انا وبدر الدين من الصبح

ليلى >> هوا الشغل مشترك بينكم ؟

سهم >> ياستي انا وبدر ولقمان ، صياع ضيّاع ما لقينش من يلمنا "وضحك " باتي وعمي الهادي  بدو شغل المعرض وبعد كبرو فالعمر سلموه لنا.. اغلب الشغل فيه انا بروحي بدر زي ما ديما نحكيلك مش حاط موال الشغل في راسه بكل والفلوس لي يمسكن يبعزقهن يمين و يسار بطلوع الروح و زن امه عليه بيش كمل حوشه ، ولقمان الحق يمسك معايا اغلب الوقت يمسك فالليل بس عنده بزنس ثاني يشتغل في سريب الدبش ويجيب من محلات من برا وهكي 

ليلى >> يعني اغلب الشغل على راسك

ضحك>> بدر بادي الفتره هذي معايا شاد شكله فطن انه الوقت يجري

ليلى ابتسمت>> وبلكي لقى وحده تخليه يفكر في مستقبله

سهم >> ممكن برضو 

و  استمر يحكيلها لحد ما مسكين من التعب والشغل رقد بدون ما يفطن في عز الكلام❤️

//

//

واللي كانت ادير في نسكافيه فالمطبخ وتفكر وسارحه 

خشت عليها مجد >> شنصار ولعت ولا شنو ؟ ما سمعنش حسكم

برمت وهيه تصب فالحليب >> لالا مابيتش نكثر معاه عشان معنديش راس

ضحكت وبحتت فالكبايه>> له؟

سديم >> ذل امي على مشيتي حوش خالتي 

ابتسمت>> هديل تراجي فيك برا بتروح ترقد قالت

سديم >>هي تو نعطيه النسكافيه ونقوله يصبيلنا بالمره

مجد >> تصبحو على خير انا تالفه بنرقد 

سديم >> وانتي من اهله " وغمزتلها "

هزت براسها على سماطتها وخشت دارها

طلعت سديم من المطبخ ماسكه الكبايه ، خذت نفس و دقت على باب الدار 

جاها صوته وهوا يقول >> خشي

فتحت الباب و خششت راسها >> صبي بيش توصلنا انا وهديل 

كان راقد على سريره و شبه ناعس >> هي 

سديم >> انت بتشرب النسكافيه ونعسان تو يطير نومك

بدر >> ما يأثرنش فيا ناخذه ونرقد عادي

صبا بشويه ومسح على عيونه 

سديم>> تريح تو نطلعو بروحنا "ومدتله الكبايه"

خذاها منها وحطها على حاشية الطاوله ، ضربها بصبعه على خشمها بشويه >> متسبله عالطلعه بروحك 

سديم قرنت حواجبها >> الحق عليا نبيك اتريح

بدر >> لما نوصلك نتريح 

طلعت قدامه وهيه تبلع في ريقها وهو وراها ، وصلو للجنان كانت هديل قدام الباب تراجي فيهم

هديل >> بنموت نعس طولنا انا ومجد فالهدرزه

سديم طلعت >> حتى انا وبكرا جامعه 

طلعو من الباب مشو خطوتين ، فتحت هديل الباب وخشت

صبت سيسي وبحتت في بدر >> شفت هاه وصلنا بسرعه تعبت روحك 

بدر بعيون ناعسه >> فداك

ابتسمت وهيه تبحت في عيونه ، هزت راسها عشان تصحصح >> تصبح على خير 

ابتسم >> وانتي بخير ، هي ابرمي صكري الباب 

خشت وصكرت الباب ، مسح على عيونه بتعب ورد حوشهم 

//

//

واليوم الجديد اللي صبح عليهم كلهم مر مرور الكرام بدون احداث تذكر  

من شغل بدر و سهم في المينا من الساعه ٩ الصبح ، بين اوراق وتوقيعات وشغل 

بدر>> انا بنروح ندوش ونزرق شور المعرض 

سهم >> مازالي شويه نطمن عالسيارات بس 

بدر >> تم ، لقمان يوصل سيسي و يجي يفصل عليا انا خليك تم امور المينا بس 

سهم >> اربح تمام

طلع بدر و سيب سهم يشوف باقي الشغل على صوت مسج وصله شافه وابتسم 

.

.

.

ليلى روحت من الجامعة و طلعت الشفرة القديمه كسرتها و علقت شفرة سهم 

اول ما فتحتها دزت السهم مسج

"هكي تمام ؟ ان شاء الله ما يكونش عندك اوامر ثانيه" 

دزت المسج وطلعت تعطي في رقمها الجديد الهلها و بعدها قعمزت وقعدت تغير في رقم الواتساب وكل شي عليه رقمها وهيه تحس براحه عشان قاعده تبتعد عن كل شي يربطها بالماضي ولو كان شوية رقم 

.

.

روح محمد من شغله وهوا مبسوط لما خش و سمع حس العيال فالحوش ، وريحة اكل امهم 

قرب للمطبخ لقاها مش فيه ، لين اول ما شافاته مشتله تجري و قيس يتفرج عالرسوم ومش معدل 

رفع لين فوق ومشى عند قيس مسح على راسه وباسه

>> وين ماما 

قيس شير عالدار وعيونه عالرسوم

محمد ضحك >> ذاهب شيرتك هالتلفزون والايباد 

باس لين ونزلها جنب خوها 

قرب من الدار على طلعت اسيل بخطوات سريعه، بحتت فيه وابتسمت >> انت جيت

محمد >> كنك تجري

اسيل >> حطيتلهم رسوم وخشيت بسرعه ندوش في خمس دقايق نجري جري عارفني مانتريحش وهما مش قدام عيوني 

ابتسم وحول جاكته

اسيل >> نحطلك اتغدا 

محمد انعزق عالسرير>> خليني شويه

اسيل >> لو نخليك هكي تقعد لبكرا 

محمد >> هو انا ح نقول لا 

عزقت عليه المنشف لي كان على راسها >> بلاش سماطه ، خليني نحط الغدا حتى نحن جيعانين 

ابتسم ووخر >> مبلول نعنجد راسك ، هي نصلي بس 

مشت من جنبه وهيه تضحك >> ربي يقبل

//

//

الخميس فالصبح ، طلعو جماعة التدريب اللي مهلوكين تعبببببببب بعد تدريبات يهدن جبل …. خذو دبشهم وتلفوناتهم و مشو على طول للمطار 

بحت صالحين في نبراس >> تقول طالعين من كهف ازف بحت لحيتك

ضحك نبراس >> لا وكله مسقمه لا رقده مسقمه 

صالحين >> هضا عليش نكره امهن الدورات هذينا 

نبراس >> رنيت على بدر؟ انا استلمت تلفوني طافي مافيش شحن ما لحقتش نشحن

صالحين>> شحنته فالسياره ونحن جايين للمطار ، كلمته اه قالي خمسه تلقوني قدامكم

بحت نبراس في ساعته >> هضكي هوا 

صالحين >> نبراس راك تنسى اه ، الجمعة الجايه

نبراس>> غير قول خير وخليني نحكيلها ونقول الباتي وقول الامك را تنفجع

صالحين >> عارفني مش مدور راي حد ، الجمعة الفاتحه الله يفتحها عليك

نبراس >> ان شاء الله خير " ونزل راسه وبحت تلفونه الطافي وهوا يفكر فيها " 

بحت فيه الصالحين و ابتسم 

..

..

طلعو من المطار ، لقو بدر الدين قدامهم … 

بدر >> اوووو القيادة العليا ، الحمدلله عالسلامه 

اضبطه نبراس >> الله يسلمك

صالحين >> تي وين رايح رايق

بدر >> وجوهكم تقول جايين من معركه عليك اشكال هيا اركبو اركبو

ركب فالسياره وهوا يقول >> ما قلتش الحد اني جاي اه بالله عليك ماعندي راس والله اسبوع مش راقد بكل 

بدر >> لالا كلهم يحسابوك جاي ليل ، يس ناويين لك على غدا بكرا " وبحت في صالحين" وخالتك عازمتك

صالحين اللي كان لاوره وعيون نبراس عليه فالمرايه ، غمز وهوا يقول >> ليش لا منها عيد ومنها قديد

ضحك نبراس وبدر رفع حاجبه>> شن دايرين من خويط

نبراس >> بكرا تفهم

بدر >> يستر الله منكم انتو الاثنين 

وصل صالحين لحوشهم 

بدر >> سلم على هنيوا بنخش نسلم غير الاسد ناعس وجيعان

صالحين ضحك>> وقلبه يوجع فيه وكله

نبراس >> بلا مفلمه انتو الاثنين كذا

صالحين مسك ضحكته >> اربح اربح تو نسلملك عليها خالتك

غمزله وضحك و كمل طريقه شور حوشهم 

..

..

 اقل من ربع ساعه مابين حوش الصالحين وحوشهم ، خشو للشارع

بدر >> الحمدلله على السلامة

نبراس >> الله يسلمك ، ان شاء الله معقبينلي غدا

بدر >> تي جميله كان ما عقبتلك من بتعقب

ضحك و بحت يساره شاف العمال قدام حوشه 

بدر >> خلاص هانت راه ، قريب يكمل موضوعه حوشك 

بحت فيه نبراس و ابتسم مجامله ، نزل و فتح الباب الوراني خذا شنطته و خش … على عيون بدر اللي تنهد على حال خوه درس وطفى السياره ولحقه

خش لقى امه تضبط فيه ومجد 

بدر >> تي تقول غايب له سنه

جميله>> وليدي يوم ما نقدر بلاه

بدر >> تو يدير حوش وينساك ما يقعدلك غير انا

جميله >> انت هو اللي عقلك مش معاك مذهوبه شيرتك 

بحتت فيه مجد >> له فتره مهدي يا جموله

نبراس ضحك وبحت في مجد فهم عليها 

جميله >> ان شاء الله يتأدب 

بدر >> خلوكم خلوكم في سيادة الرائد

نبراس>> بالله عليكم اسبوع مش راقد ، حطولي ما ناكل و بنخش نسلم على امي ونقعد حذاها شويه و نركب اندوش ونرقد ما حد يواعيني

مجد>> تريحي تو نحطله انا خليك حذاه اشبعي منه"وضحكت"

مشو شور دار حنه باس راسها وقعمز يهدرز معاها هوا و امه وبدر على خشت باته ، سلم عليهم وتغدا واستاذن منهم ركب 

..

حط تلفونه فالشحن ، وخش يدوش 

على طلعته ينشف في شعره ولابس سروال التوته وحاط ماليته على كتوفه، لقى تلفونه مفتوح وفيه عرم مسجات 

اغلبهن مسجات مكالمات فائته من هله واصحابه وخوه ومكالمة وحده منها هيه ، ومسجات منها 

ابتسم وقت قعد يقرا فيهن 

"اليوم عدا يارب يكملن اليومين الي جايات بسرعه"

" ان شاء الله تكون بخير وتاكل كويس وترقد كويس"

" اليوم ثاني يوم ، نحس فيه اسبوع مر مش يومين"

"ليش تلفونك مقفل مش قتلي الخميس تطلع "

قراهن مش مره وحده ؟ مرتين و ثلاثه واربعه وخمسه يقرا فيهن ويتخيل فيها … راحت ابتسامته وقت هكي ضميره تحرك .. دور وقلبج بين الرسائل والمكالمات مالقش شي من هديل ، ما يلومش عليها كيف ما هيه مش مدوره ف هوا مش مدور برضو 

رد على مسجات مرام ، قراهن مره اخرى وقلبه يدق …خذا نفس و سيطر على روحه و رن عليها 

//

//

كانت ماسكه تلفونها فالليل متأخر وليلى راقده ميته من التعب في الجامعه …. حاطه على الفيس بوك و ادور في شغل .. تبي شغل كويس و خفيف بلكي تبدا فيه و تطلع وتخش وتشوف الناس… خمس شهور وهيه محبوسه و خايفه تواجه العالم واجد بكل معش تقدر مازال الي صار فيها مأثر عليها مش مخليها تواجه حد ولا قادره تقول كلمة مطلقه 

وهيه سارحه مابين تفكيرها فالشغل وحياتها ، رن وطلع اسمه ، الاسم لي على قد ما تراجي فيه بس خايفه من قربها منه 

ردت وهيه تقول >> الو "بصوت متقطع " 

نبراس >> عارفه انه ليا ثلاث ايام نفكر فيها الالو هذي

ابتسمت >>ياسلام 

نبراس>> والله ، ما عندي عليش بنكذب 

سرحت ثواني وهيه تفكر في خطيبته ، اكيد استقبلاته وممكن حضناته واكيد كلماته اول ما وصل … مش عارفه التفاصيل ولا فاهمه شي تعرف انه هيه مش من حقها ولا حاجه، مش من حقها يرايف عليها مش من حقها تحكي معاه مش من حقها شي 

تنهد وهوا يسمع في صوت نفسها وسكوتها وقاللها وهوا فاهم شنو تفكر >> طلعنا من التدريب تلفوني طافي ومشينا للمطار على طول ، ما لحقتش ندير شي بكل وصلت حصلت في هلي و ركبت وانا ندور في رقمك عشان نرن عليك

ابتسمت بحزن كيف يطمن فيها وكيف حاس بيها >> الحمدلله على سلامتك

نبراس >> الله يسلمك "لبس ماليته وخش سريره" 

مرام>> وصلتو متأخر مش قبل صبح 

نبراس>> اه طولنا في مطار طرابلس شويه 

مرام >> نخليك ترقد بعدها تحكيلي شن درت

نبراس>> انا ح نعلق نوم لعند بكرا ، ميت نعاس … احكيلي بنسمع صوتك على ما غفن عيوني 

ابتسمت و قعدت تحكيله في عشوائيات ، حتى عركة محمد واسيل حكتها له وهوا مبتسم و يقاوم فالنوم عشان يسمع صوتها اكبر وقت ممكن ❤️

//

//

يوم الجمعة 

سفرة الشاهي بعد الغدا ، وهدرزة الرجالة المعتاده حذا امهم يحكو عالشغل و ع الحال والاحوال وجنبهم مجد و الشباب والبنات 

و الصبايا فالدار لخرا مع هناء ويهدرزن على نفس سفرة الشاهي 

و لقمان ماسك التلفون يكلم في معتز خوه فيديو وفرج ولده و التلفون يبرم من واحد الواحد وهوا ياخذ منهم فالاخبار ويسلم عليهم كلهم 

وفالدوج و الهرجه هذي ، بحت نبراس في مجد لي حساته بيحكي حاجه 

قربت منه وجت لعنده >> حاستك من امس وانت في كلام بتقوله 

بهدوء قال >> تعرفي اني مستحيل ندير شي مش في صالحك صح

هزت براسها>> نعرف يا عيوني

نبراس >> معناها تسمعي لي بنقوله وماتعترضيش عشان سيوره طالع 

سكتت مجد وغمضت عيونها

نبراس>> كان جاي عالغدا اليوم امي عزماته بس كلمت خالتي قالت راقد بالنوم من التعب 

ابتسمت وفركت ايديها 

بحت نبراس في باته وقاله >> يا حاج بنحكي في موضوع دابينكم ملتمين كلكم 

الهادي >> قول 

نبراس >> ونحن في طرابلس حكى معايا الصالحين في موضوع الفاتحه متاعه هوا ومجد و يبيها الجمعة الجايه 

بحتت فيه وهيه كانت متوقعه الكلام قلبها كان حاس ، و الصبايا اللي فالدار الاخرى جن يجرن بعد ما سمعن صوت هرجه

              الفصل الثالث عشر من هنا 

تعديل المقال