روايه حافة المنتصف
الفصل الثالث وعشرون 23
بقلم ايه
والهرجة لي خشن عليها كانت صوت بدر العالي وهوا يقول مبروك مبروك ويضحك وجنبه سديم تصفق
سالمين >> العكوز وينه بسسسس اسكت انت وياها
ضحك فرج وبحت في نبراس >> مش مازال بدري عالفاتحه نقرو فيها اسبوع العرس نحن
نبراس>> يا سيدي فرج ، راه هما متفقين عالعرس بعد شهرين ومن يوم الدفع لتوا عدا منهن اسبوعين ، يعني لو تبيها بالارقام مازال شهر و 16 يوم بالضبط على ما مر اسبوع وجت الفاتحه يبقى شهر وكم يوم وهضك هو عاد
بحت فيه الهادي >> انا شايف انه مناسب
بدر >> الصالحين بالعربي بيخش ويطلع براحته غير نبراس مؤدب شويه
فنصت فيه مجد وباته طلق فيه الطفايه لي كانت قدامه ، طبت في كراعه ضحك وهوا يتوجع
صبا جا ورا امه لي كانت عند الباب وقال>> تي والله الله نبراس دروحه شايف انه مناسب ما مناسب ويحكي بأدب تي الراجل حوش خالته والقطعيه هذي ما خلت له مخش "وبحت في مجد لي تنفص فيه "
طلع يجري وباته يسب فيه
هزت سالمين براسها وضحكت>> غضيب
الهادي>> وديني نربيه والله
سديم ميته ضحك بحتت فيها سالمين >> صبي الحقيه بلا ضحك
هزت بكتوفها و مرت من جنب مجد لي مازالت متنحه خبطتها و طلعت
و قعدن الاحاديث يطلعن ، و كلهم موافقين انه الجمعة الجايه فاتحه … ومجد سكتت سكتت وطلعت من جنبهم … وشويه شويه بدا كل حد يطلع الشغله واللي بيدير حاجته
..
..
طلعو كلهم من الدار و هوا مصبي فم الباب ، قربت منه وقالت >> الحمدلله على السلامة
نبراس>>الله يسلمك
هديل >> من امس ما طقيتش فيك ، جيت فالليل قالولي راقد
نبراس >> رقمي عندك
نزلت راسها وردت رفعت عيونها >> ما حبيتش نزعجك
نبراس>> دورت رقمك لما فتحت تلفوني نحسابك رانه
ربعت يديها >> وليش ما رنيت
نبراس تنهد >> نفس الشي لي منعك ما ترنيش
نزل يده من حاشيه الباب ، بحتت فيه ومرت من جنبه ومشت للدار لي فيها مجد بدون ما ترد عليه
..
..
بعد ما لزتهم حنهم من الدار ، مشت للجنان لقاته يدخن … نزل دخانه لما شافها وبحت فيها
>> التزيتي حتى انتي
سديم >> قريب جتني طفايه حتى انا
بدر ضحك>> جاب الله انها بلاستك بس
سديم>> وراسك عمو الهادي حتى كان حديد كان ح يطلقها فيك
بدر >> عارفه 😂 شنجو امتحاناتك؟
سديم >> هذينا الجزئي مشن ، علاقل نحضر فاتحة مجد وانا متريحة
سمعو صوت سهم وراهم >> دايرين هدنه
ضحكت >> حاجه كيف هكي
بدر >> الي ما يعاندش ياخذ عيوني
سديم >> وانت عيونك مش عارف المن بتعطيهن
بدر>> اقعدي كويسه و خوذيهن لكي بروحك
قرنت حواجبها وهزت براسها ، وخشت
ضحك سهم >> وترتها يا بايخ ب اسلوب الشوراع هضا
بدر نفخ الدخان وعزقه>> هي اللي مرعوشه بس
سهم >> اسمها محترمه ومش متعوده عالقطاف
بدر بحت فيه >> مش ح ناكلها
ضحك وغمزله >> عارفك عارفك
..
..
هديل >> شن ح اديري ؟
مجد >> مش عارفه بس ما انصدمتش لاني كنت حاسه والله
هديل >> كيف حسيتي
مجد >> اصراره عليا من يوم شافني و الخطبه لي جت بسرعه ، وبعدها سيبني هكي بسهوله حسيت في شي غلط لما جاني نبراس بقرار الفاتحه تقدري تقولي اطمنت شويه
هديل ابتسمت>> اطمنتي انه ما رخاكش وبالعكس متمسك بيك
مجد حطت يديها على وجهها وبكت >> خايفه يا هديل والله خايفه بكل ، ما حدش فاهم لي انا فيه
حضنتها هديل >> حاسه بيك حاسه انه فيه حاجه مش قادره تحكيها لنا بس صدقيني ، مهما كان لي تفكري فيه شنو خلي ايمانك بربي كبير
مسحت دموعها وهيه تقول >> الحمدلله
خشت سيسي ادربك عالباب ، وفطنت للدراما لي صايره
سديم >> هضا جوكم انتو ؟ فرحانين تبكو زعلانين تبكو
مجد ضحكت>> انتي يا سوسه قريب ضربتك انتي وبدر تضحكو فالدار مبدري
ضحكت سديم وقربت منهن >> فرحانين بيك عاد
مجد >> عقبالكم
بحتت فيها هديل وسيسي رفعت حاجبها
مجد >> قصدي عقبالهم كل حد يجيه نصيبه
توترت سديم و جت قعمزت مقابلتها >> فوتي توا وقوليلي ، عرسك بعد اقل من دقيقة واحده ، شن وتيتي
مجد >>شوفت عينكم ما طلعتش للسوق ، وصيت على كم طلبيه اونلاين … حاجة الدبش و حاجة المكياج والعطور و هكي الاسبوع الجاي كل مره ح تبدا توصل طلبية
سديم >> اسمعي خلينا نوتو حاجة الفاتحه بعدها نبدو ولو قعدنا نطلعو مقسمين انا نمشي مكان وانتي مكان بيش نكملو دبشك
مجد>> مش دايره هرجه واجد فالفاتحة ، نبي عشا للعيله هكي و الناس القريبه بكل وصحباتي لي كانن معايا فالشغل قبل ما نسيب بعد عزا جلال مسكينات مازالن يتواصلن معايا
سديم >> يبقى تمام ، ح نوتي انا حاجة الطاوله .. نطلعو يوم تجيبي الجلابيه ولا القفطان لي بتلبسيه و يوم حتى نطلع بروحي نجيب حاجة الطاولة
هديل >> انا ح نطلع معاها يوم القفطان"ورفعت يدها"
سديم>> وانا يوم نجيبو الحاجات
مجد ضحكت>> ربي يفرحني بيكن
//
//
ونفس لمة الجمعة هذي ، كانت نفسها في حوش الصديق
الاحفاد يلعبو جنب الصديق وحليمه و قاعدين على سفرة القهوه عالعصر ، و يهدرزو كلهم
على نزلت محمد لي كان مقيل من فوق ، خش جرت لعنده لين تجري مسكت في كراعه طبس رفعها و مشى عندهم قعمز جنب باته
الصديق >> شن امور شغلك
محمد >> والله تمام عندي سفرة المصر الفتره الجايه
الصديق >> والله شور شنو
محمد >> في صفقه غادي لو صار ح يطلعلي منها مبلغ كويس
الصديق >> كم ح تقعد ؟
محمد >> والله كان تيسرن الامور اسبوعين بالكثير ممكن
الصديق >> وهلك باهي
محمد >> ح يتبهدلو معايا وانا ماشي سفرة شغل ، قتلها اسيل قالت لا
الصديق >> تمشي وتجي طيب ، امتى مسافر
محمد >> اليوم شنو في ايام الله "مسح على وجهه" اه الجمعه خلاص يا سيدي الاثنين هضا لا الاثنين لي بعده
الصديق >> باهي فيها خيره فيها خيره
بحت فيهن وهنا يهدرزن >> ماحسبتونيش فالقهوه
ليلى >> نحسابوك مطول وانت راقد
محمد >> انا دوبي غفيت رنو جماعة المكتب حاصلين في شغل قعدت نحكي معاهم طار النوم
اسيل >> تو نصبي نديرلك
ابتسملها ، ومشت للمطبخ
محمد >> قيس اهمد
ليلى >> خليييه بيني وبينه
بحت فيه وطلع لسانه
محمد ضحك >> تو نوريك
ليلى اضبطت قيس >> مش شورك ب وليدي
لين شافت قيس ماسكته ليلى مشت تجري لباتها وانعزقت عنده ، ضحكت مرام
محمد باسها >> اهي بنيت باتها
نزلها من حضنه ، وصبا لحق اسيل للمطبخ
..
..
كانت عاطيه بظهرها و مصبيه عالغاز تحرك فالقهوه
اسيل >> كنك صبيت
محمد>> رايفة عليك بلكي
اسيل برمت عليه >> الي يرايف ما يسافرش 😏
محمد >> والله ما مطول وشغل ، قتلك هيا معايا بس عارفك ح تملي بروحك انا ح نقعد صبح ليل فالشغل وانتي لعيال يتعبوك في غربه
اسيل >> اكثر من عشرين يوم ح تلقاني فحوش هلي
محمد ابتسم >> مش ح نقدر انا اصلا ، وبعدين الشغل ح يطلعلي منه فلوس كويسات ونجيبلك لي تبيها.. الراجل ليبي عنده عقار في مصر يبيني انا نصبيله عليه و نقدر السعر و كل مازاد السعر كل ما نسبتي اعلى دازين عليا من هنا بالاسم
ميلت راسها >> اضحك عليا بكلمتين زي ديما
ضحك وهوا يشوف للقهوه تفوج حط يده و طفى الغاز
برمت عالبكرج>> اطلع نجيبلك قهوتك ، ساد
ضحك وطلع رد قعمز حذا باته ، وليلى ماسكه تلفونها جاها مسج منه
"جمعة مباركه ، حبيبة سحم عندكم ولا لا"
ابتسمت و هيه تشوف في المسج ، بعيون يلمعن … مسكت التلفون و صورة قيس وهوا في حضنها وهيه لابسه الطاقيه متاع البجامه وباين شوي من ضحكتها
ودزتله " قاعدين ، بس انا اليوم قاعد عندي صاحب ليلى 😝"
حطت التلفون وهيه مبتسمه ، بحتت في مرام لقتها تبحت فيها
مرام>> راك تسيحي علينا
ليلى>> زيدي علي صوتك خلي محمد يسمع "قالتها بصوت مسموع"
برم محمد لي كان يلعب في لين >> نعم كلمتوني
بحتت في جهة المطبخ لقت اسيل طالعه
مرام >> لا قتلها اهي جت قهوة محمد
ضحكت مرام و ليلى وجهها الوان
//
//
في الليل عالساعه ١٠ ، دوبه خش للمركز وسط تحيات الافنديه بعد ما خذا راحته فالنوم من امس
قبل ما يخش مكتبه خش مكتب سيادة المقدم
نبراس >> امتى نقعد مقدم ويقعد عندي مكتب كبر مكتبك
صالحين>> هانت هانت دورك السنة الجايه
ضحك وشبك يديه >> المهم نحسابك مش جاي اليوم
صالحين >> هم ما يلتم ياراجل جابوني على اذان العصر حتى صلاة صليتها هنا
نبراس >> الجمعة الجايه تصليه حاضر فالجامع " وغمزله"
صالحين قرن حواجبه>> قول والله ؟
نبراس >> دويتلهم اليوم ما حد اعترض
تنحنح وقال >> وهيه ؟
نبراس >> ما قالتش شي ، دويتلها قبل ما نفقشها قدامهم … ما حكتش كانت اهدا من عملتك يوم الخطبه
بحت فيه بنص عين >> صبي صبي شوف شغلك
ضحك وصبا >> خالتك من وقت عرفت وهيه حي عليا كيف ندير نسيب هنيه بروحها يوم الفاتحه ولا نقعد مع مجد و الدنيا شالت ركب فيهم وعد الله
ضحك و هوا يهز في راسه >> امي و خالتي ولايل على حرق الدم
شيرله بيده "بمعنى قالك" و طلع مشى شور مكتبه و هوا ماسك تلفونه ويرن عليها
مرام >> سيادة الرائد
ابتسم >> ايواه
مرام >> وين مختفي
نبراس >> من غدا العيله ولمتهم للشغل
مرام >> والله قصدك كيف جيت
نبراس خش مكتبه وصكر >> اها صبّاحي اليوم، شن كنتي اديري
مرام >> كنت ندور في شغل
قرن حواجبه >> شغل شنو ؟
مرام >>عندكم فالقسم 😒 شنو يعني شغل في اي مكان في مدرسه في مكتب اي شي
نبراس >> ضروري يعني؟
مرام >> لالا ، بس نبي نطلع نواجه العالم
نبراس >> خليك فالحوش تو انا نواجهه
ضحكت>> انت انقذ العالم بس
نبراس>> لا تو نديرهن الاثنين
مرام >> نبراس شوف شوف شغلك
ضحك بشويه و صكر الخط
مسح على لحيته ، و تنهد ! تبي تشتغل يعني بتختلط بالناس يعني ح يحقوها كلهم …. بنت صغيره و سمحه و مازالت في عمر صغير ، كيف ما لفتاته ح تلفتهم … كيف ما خشت قلبه ح تخش قلوبهم … بس الفرق بينك وبين اي حد انه كلهم احرار الا انت مقيد ! مقيد بكلمه زي السيف عندك مش قادر ترد فيها
ح تطلع يا نبراس و اتعرف على ناس و متأكد ح توتخذ منك ح تمشي من قدام عيونك وانت مش قادر ادير شي
مسح على وجه ، حط سل*احه في جنبه و طلع يكمل في باقي شغله بضيق العالم اللي فيه
- لستُ على مايرام، كل شيء ضائع حتى روحي، حالة من الانطفاء الغريب، أريد البقاء، أريد الرحيل، أنا على بعد ثلاثة محيطات من روحي✨.
//
//
بدن الاستعدادات لمراسم فاتحة مجد
ومن ثاني يوم قررن يطلعن هيه وهديل عشان يشوفن قفطان تلبسه يوم الفاتحه
فالعشية ، نازل من حوشهم بعد ما فصل من شغله عالفجر يلبس في كندرته ناداه لقمان
لقمان>> يا القياده قتلك
نبراس مطبس يربط في الكندره>> ايوا
لقمان>> السياره ما بتش تولع و هديل ومجد ساكنات من امس شيلنا شيلنا يبن السوق
نبراس ضحك ، طلع مفتاح سيارته من جيبه عزقه له >> شيلهن ياخذن اللي يبنه
لقمان >> اصلي " ولقط المفتاح "
طلع من الحوش ، ونبراس برم خش وطلع تلفونه ورن ع الصالحين
الصالحين>> هاها عالفجر كيف افتكيت من وجي شن تبي ران
نبراس >> بنموت غير على وجك ، تكي تكي عليا خذو سيارتي
الصالحين>> كيف صار
نبراس>> سريب ام الفاتحه لي درته ليا ، بيطلع لقمان بمجد للسوق
قرن حواجبه >> تم مسافة الطريق ونجيك
صكر الخط و قعد ينادي على مجد
مجد>> ايوا ايوا طلعت
نبراس >> لقمان برا
مجد>> هي هديل طلعت حتى هيه
نبراس>> تبي حاجه ؟ معاك فلوس
مجد>> معايا
طلع فلوس من جيبه ومدهن لها
مجد>> تي قلنا معايا
نبراس >> لو هديل تبي حاجه اشريلها
مجد ابتسمت وخذتهن منه ، وبرمت طلعت شور الباب و اختفت ابتسامتها وهيه تقرا في المسج من الصالحين
" خمس ايام وتنقرا الفاتحه ، وتو نوريك الطلوع والخشوش لي من غير مشاوره هضا شن شكله يا مجد حنخليك بتطلعي للجنان ترني تقولي بنطلع"
قرنت حواجبها وهيه تسب من جوا ، ركبت فالسياره لقت هديل لاوره
لقمان >> هيا تبو مكان معين؟
هديل >> اه شيلنا محلات لي قريب من معرضكم عرفتهن
لقمان>> اه عليك قصة اصحابي كلهم
بحتت بنص عين>> مش ح ناكلوهم راه
لقمان ضحك >> ديما نقول عكس سديم اهو طلعتي نفسها فطول اللسان
ابتسمت >> يخرجون اسوء ما فيك ثم يقولون هذا انت
ضحكت مجد وضحك معاها
مجد>> حطلنا اغاني
هديل>> عطيني نعلق بالله
لقمان >> افتحي بلوتوث واعلقي
علقت و قعدت تختار في اغاني ، وكل مره تحط اغنية لحد ما وصلو صفة المحلات
نزلن ونزل معاهن لقمان عشان محلات اصحابه دروحه عاد محرم🌚😂
قعدت مجد تقيس وتختار ولقمان واقف جنب هديل و كل شويه توري فيهم حاجه شكل اغلب قفاطين المحل كانن جلابيات فاتحه وطوال فكان لقمان يشوف معاهن
لقمان>> هيا عاد والله سمح
هديل>> حتى انا عجبني والله
مجد>> خلاص تمام تو نمشي نحاسب عليه ، وانتي كان تبي حاجه نبراس عطاني فلوس راه وانا طالعه
ابتسمت مجامله>> لالا انا وسيسي طلبنا امس لقينا محل سمح دزينا عليهن اونلاين بكرا يوصلن ، نبي الشنطه هذي
بحت فيهن لقمان>> مصح والله وجك ووجها ووجه نبراس اللي يعطي فيكن فلوس وانا مطلعكن امشن اركبن للسياره ندفع ونجي
هديل >> هضا كنه انفصل
مجد ضحكت>>غير اسمع بس انا ندفع قفطاني وانت ادفع الشنطه متاع هديل
هديل>> كيف ادفع الهديل 😒😒 وبعدين معايا فلوسي حتى نبراس منبيش منه
مدلها المفتاح >> انهي الكلام واطلعن مجد ما ديما ناخذ منك ايام ما كنت فقري 😂 اعتبريه رد دين ومعش حندفع مره ثانيه تفلسو بيا
"بحت في هديل" ح نزعل لو خاطرك في حاجه ما شريتيهش
ابتسمت>> لو القفطان لي موصيه عليه جا مش سمح تو نقولك
ابتسم و خذت منه مفتاح السياره وطلعن وهوا حاسب و لحقهن
//
//
مرام >> في مكتب طالبين سكرتيره
ليلى>> مكتب شنو؟
مرام >> مش مكتب هوا زي المكان يدير في دورات وهكي يبو سكرتيره
ليلى >> حلو باه
مرام >> تو نرن بكرا نسأل عالوقت وهكي بيش نشوف لو يناسب او لا
ليلى>> ان شاء الله محمد ما يديرش قصه
مرام>> هذي لي خايفه منها انا
ليلى >> شوفي انتي بكرا قبل لو طلع مناسب احكي البابا على طول
مرام >> هضا يلي نبي نديره، انتي قرايتك شن جوها
ليلى >> سنة ثالثه هذي خلاصصصص ما فيش نفس بكل
مرام>> و غير القرايا ؟
ليلى >> افقشي وقولي شن جو سهم
ضحكت >> نحسابك بتهزبي
ليلى >> قاعدين نحكو مرحلة الاستعباط الي كل شي واضح فيها بس ما حد ح يقول الفقش
مرام >> ياعيني عالعيون وهنا يحكن
ليلى >> ما تخلينيش نحكي عالعيون اه
بحتت فيها بنص عين>> صبي صبي نديرو حليب وشاهي ونقعمزو جنب ماما و بابا
ليلى >> ايوه اهربي زي ديما ، سمعتك راه وانتي تحكي معاه … تي بتذوبي ذوب
مرام صبت >> غمي فمك و امشي حطي الشاهي عنار عطك طمحار
طلعت من الدار مشت جنب امها وليلى خشت للمطبخ وهيه تضحك عليها
//
//
وهكي يمشن الايام في نفس الروتين ، مع توتايهم لفاتحة مجد كلهم
قبل الفاتحه بيومين تقريبا … كان فيه نواقص لطاولة الفاتحه لي سديم ماسكتها وحجزت كل شي فيها عشان ادير ل مجد جو ، واتفقت تطلع هيه وياها مع بدر
خشت لحوش جدها ومشت ادور عليها لقتها في دارها
سديم >> هييييي تي هيا بدر برااااا
مجد >> وراس امك تمشي معاه انا نحس فجسمي متكسر اليومين لي فاتن طلعات في جرة بعضهن صبح وليل و ديلفريات البتات بنتريح
سديم >> را تمرضي حي عليك فاتحتك بعد بكرا
مجد >> ماه خلوني نرقد بس
سديم>> باهي توصي على حاجه غير لي بنجيبه؟
مجد>> حاجة الطاوله شورك" وغطت وجها"
طفت عليها سيسي الضي و طلعت ، خذت نفس وهيه ما تبيشششش تمشي مع بدر بروحها
خطمت من جنب الدار لي كانو ملتمين فيها ويهدرزو>> يا جماعة بنطلع نجيب حاجات ناقصه مع بدر تبو شي ؟
هناء>> ردبالكم
جميله>> سلامتك يا امي قولي البدر يسوق بشويه
سديم >> ح يدير فيا بعناد عارفتيه ولدك
ضحكت جميله >> ربي يهديه
طلعت لقاته فالسياه أميل راسه عالتلفون
ركبت بان عليها صوته وهوا يقول >> خلاص النبي بلطهن يا محمود اليومين هذينا عندنا مناسبه مش وقت شغل في معرض … خلاص تم تم اوكي
صكر الخط عزق التلفون جنبه>> وين عمتك
سديم>> مش جايه قالت تعبانه
بحت فيها وعلق السياره وطلع>> شن اللبسه هذي
سديم >> اخر وحده تحكولها عاللبس انا البلوزه طويله والسروال واسع وشعري كله جوا
بدر >> مع انه يعني فيه اطول من هكي
سديم>> تحت الركبه يا بدر الدين
بدر >> واللي في وجك
سديم >> شوية كونسيلر و ماسكرا ومادرتش روج عشان عارفتك ح تهزب مع انه خاطري ندير
بدر >> بيش نقطعلك شواربك
سديم >> الالفاظ ياساتر
بدر >> وحتى مانسيلر هضا لا شن اسمه معش اديريه
تنهدت وضحكت علي كلمته >> خلاص عاد يا بدوري ساد
ضحك علي نرفزتها وقال>> تبي محل شنو ؟
سديم>> نبي اللي مشيناله يوم الدفع خذينا منه مستلزمات راه
بدر>> تمام
سديم >> ونبي محل حلو ، نبي ناخذ ماكرون
بدر >> خبركن هضا واعر
ضحكت>> تو في فاتحتك نديرلك خبر ما صارش
رفع حاجبه وبحت فيها >> انتي بعد ما انروحو ديريلي نسكافيه ح يكون م فيش منك
ضحكت >> تمام
وصلو عند المحل ونزلو هيه وياه ، و على مناقره كل ما تاخذ حاجه يقوللها شينه لحد ما لمت اللي تبيهن … طلعو بعدها مشى لمحل الحلويات حجزت فيهن وطلعو للسياره
سديم>> الوصل معاك اه ما تنسششش ح يجيبوهن ديلفري يوم الجمعه عطيتهم رقمك
بدر >> لا والحلوه بتعطيهم رقمها
سديم>> انا ح نكون فاطنه اصلا انتو ح تنذهب شيرتكم بالفاتحه
بدر>> رقمك تعطيه الحد نقص راسك
سديم>> لما نطلب حاجه اونلاين نحط رقمي هديل مخطوبه عاد عشان تجنب مشاكل السيد نبراس ما تعطيش في رقمها انا نحط فيه
خبطها على راسها >> شن تحسابي روحك انتي بزبط ، رقمك نلقاك عاطيتيه نوريك وبعدين حطي رقمي تو نستلم انا ان شاء الله نقعد في الصين
سديم>> ايوه وتقعد تشوف في دبشي
بدر >> مش ح نشوف شي مش يجي في كيس مصكر هوا اكيد مش ح نقعمز نتفرج عليه
ضحكت>> اديرها
بدر >> نوسعلك في بالي ماه ، المهم فالجديد رقمي حطيه
سديم >> نشفت ريقي ، حاضر حاضر
درس قدام الحوش و نزل وراها وهو يشيل معاها فالشكاير وقال
>> سيسي عالمطبخ اه نبي نسكافيه
سديم>> تمام هي
جا جنبها ومدلها كيس >> امسكي
سديم>> شنو هذي ؟
بدر > شوكلاطه
خذتها منه وهيه تضحك >> امتى جبتها
بدر>> لما زرقت نجيب في دخان
ابتسمت بتوتر و مدت يدها خذتها منه وقلبها يدق لما لمست يده ووخرت بسرعه و خشت تجري ، رفع يده وهوا ماسك باقي الاكياس مسح على عيونه وخش وهوا يقول >> سلامممم يلي هنا حطو على روسكم
//
//
كلمت مرام الشغل ، وللاسف كان وقته مش مناسب بكل لها … و كانت تحكي مع نبراس وتقوله اول ب اول شن صار معاها ، وفرح لما عرف انه الشغل لي تبيه ما صارش منه بس مازالت ادور
محمد يوتي في روحه السفرة مصر لي بعد كم يوم ، واسيل زعلانة عشان ح تقعد بدونه اسبوعين
سهم و ليلى كل يوم يحكو ، لدرجة ليلى حتى في الامتحانات وقت لي كانت تقاطع فيه في ادم بكل كانت تكلم فيه وتحكي معاه وكل ما يختفو يدزو مسجات البعضهم
هديل مبرده بكل في موضوع نبراس ، وقاعده تفكر لها فتره بينها وبين روحها في حاجات واجججححد ناحيته
//
//
يوم الفاتحة 🤍
عكس يوم الدفع لي كان عائلي و قاعدات فيه بدبشهن العادي ، اليوم غير والمعازيم اكثر من صحبات مجد ومن جيران و من العيله لي كانت ملتمه كلها رغم انه مجد اصرت تكون فاتحة بسيطه
قبل العصر ، لابسه قفطان لتحت الركبه بشوي عشان تقدر تحوس بيه ، ورافعه نص شعرها
كان الباب الجواني مفتوح ، اطلع في صناديق العصير من جوا الفم الباب الداخلي عشان ياخذوهن معاهم ويوزعوهم بعد قراية الفاتحه
خاش من برا الباب مردود ع الاخر لابس و العطر سابقه حاط نظاراته على جبهته وقف في بداية الجنان وهي في نهايته ، و قرب شويه شافها وهيه منزله راسها … اول مره يشوفها هكي ! شكلها وشعرها و طولها و كل شي فيها … وحي عليه كان تفطن له وهوا يشوفلها هكي 😂
وخرت شعرها و حطت اخر باكو ، وصبت ميلت راسها و قعدت تعد فيهن ، وهوا متنّح فيها على نفس الوقفه
ما فطّنش الا لما ضربه نبراس من راسه >> في شن تشوف امتنح هكي
برم عليه بدر و سديم سمعت صوتهم وخرت بسرعه تحسابهم ما شافوهش وخشت تجري
بدر>> قصدك رفعت عيونك انت وشفت ؟
نبراس ضحك >> ارخي روحك شفتك متنح انا واكيده مش ح تكون متنح في امي سالمين
ضحك بدر وحط يده مكان ضربة نبراس >> يدك حديد
نبراس>> عشان اتعلم مره اخرى تغض البصر
بدر بحت فيه بنص عين >> النظره الاولى حلال
نبراس>> انت خليت فيها اولى استغفر الله ، ختمت النظرات كلهن
ضحك وهوا يقول >> خش خش طلع معايا الصناديق
مشو شور الصناديق لي كانت عندهن سيسي وطلعوهن برا ، ضبح بدر من برا >> مافيش حاجه اخرى
جاه صوت امه وهيه تقول >> لا خلاص هذينا بس
طلع مسك تلفونه ودزلها مسج
"نلقاك برا نقصلك كرعيك ، اهمدي جوا ماتطلعيشششش "
.
.
كانت في المطبخ توتي في السفر و فناجين القهوه ، وقت ما جاها المسج … رفعت تلفونها وهزت براسها وهيه تقرا فيه وقلبها يدق من انه يكون شافها !
ودزتله رساله
" شفتني يا قليل الادب "
على طول جاها رده
" لمي لسانك اللي اطول من قفطانك و اسكتي "
عرفت انه شافها وهنا زادت تنرفزت منه اكثر ، عزقت تلفونها جنبها و قعدت تكمل في باقي التوتاي
..
..
خشو كلهم التمو في الجنان ، قبل ما يمشو شور الجامع لي كان قريب منهم
واقفين يضحكو ويبصرو لابسين و كل وواتين بيش يطلعو
وكبارية العيله من فرج والهادي بينهم ، وقاعدين يكلمو في معتز فيديو يورو فيه فالاجواء
على رنت تلفون نبراس ، انقطع الفيديو بينا وبين معتز ونزل يده عشان يرد