close

 


 روايه حافة المنتصف
 الفصل السادس وعشرون 26
بقلم ايه

 
في المستشفى 

خش يجري من الباب و هوا يدور في بدر الدين خوه …. مشى عند الطوارئ بسرعه لقاه مصبي و ماليته فيها شوية دم 

نبراس >> شن فيه من ضربه ؟

بدر >> مانعرفشششش مانعرفش … قبل ساعه جيت للمعرض لقيت سياره سودا عاليه مشت وانا خشيت لقيته طايح وفمه يصب دم ودايخ معش عرفت شن ندير كريته دغري و طلعت حتى المعرض ما صكرتش وصيت الجماعة لي جنبنا وطلعت نجري 

نبراس>> السياره من في امها بسس ما لمحتش حد 

بدر هز راسه>> لا مظلمه كانت

نبراس >> شن وضعه توا 

بدر >> ما نعرفششش بشي خششوه جوا وما كلمتش حد الا انت 

مسح نبراس على وجه و سكتو همًا الاثنين على طلعت الدكتور من جوا صبو بسرعه لعنده

الدكتور >> الحمدلله على سلامته ، مافيش ضرر كبير الحمدلله … كسر في اليد اليسار و رضوض في جسمه بس 

بدر >> الحمدلله الحمدلله ، شن حالته واعي نقدر نخش نشوفه ؟ له ساعه جوا 

الدكتور >> درنا فحوصات و صورة اشعه عشان الكسر و كله خذا وقت … حاليا واعي بس شويه و حيغفى عطيناه مسكن للالم 

نبراس >> امتى ح يطلع ؟

الدكتور >> لازم نشوفو بس لو ما فيش نزيف داخلي لعند بكرا الصبح نطمنو عليه ويطلع 

نبراس >> تمام تمام 

مشى الدكتور ، وخشو نبراس وبدر عند سهم …. اللي كان جنب فمه في جروح من الضرب و تحت عينه ازرق ويده مكسوره 

بدر >> خوفت ام امي عليك 
سهم ضحك وحط يده على صدره >> اخخخخ "وسند روحه" قلتو الامي 
نبراس >> لالا ما قلنا الحد
سهم >> لما تقولولها عطوني نكلمها عشان مش ح تصدق غير لما تكلمني 

نبراس >> خليني بس من هضا كله ، من دار فيك هكي ؟ 

سهم بحت في بدر , و بصعوبه يحكي من الالم >> فرخ الحرام ادم 

نط بدر من مكانه و هوا يسب و قرب من بآب الدار ، صباله نبراس 

نبراس بهداوه>> شوري ، خليه شوري " بحت في سهم وهوا ماسك يد بدر " عطيني عنوانه ومكان شغله واي مكان متوقع انه يكون فيه 

سهم >> تمام "وبحت في بدر " بنقعدو اضربني واضربه معش ح تفض بكل كل مره واحد جاي يرد في ضربته خلي نبراس يحلها 

بدر >> اقسم بالله نربيه فرخ الحرام .. مش جاي بروحه صح ؟ جايك بجماعة الخواف 

سهم >> جايب معاه اثنين 

نبراس >> خلاص انت وياه انهي الموضوع شوري انتهي الكلام ، خلاص خليه يتريح وخليني ندير اتصالاتي 

طلع نبراس من جنبهم ، بعد ما خذا معلومات ادم

بدر >> كان غير خليتني عليه بس
سهم >> خلي نبراس يصرّف واسكت راسي دايخ 

ضحك >> وجك كيف الخريطه
سهم >> اضحك اضحك ياتعبان 
..
..

قبل ساعتين لما كان سهم فالمعرض 

خش عليه ادم ومعاه اثنين ، وكان ناوي شر السهم 

ادم >> نصيدلك فيها ليا فتره
سهم بحت فيه>> تبي تفرد عضلاتك تعالي بروحك وريني مرجلتك 
ادم >> نجي بروحي نجي معايا جيش مش موضوعك، تجي واتهجم عليا عشانها ؟ خذيتها مني صح ! جاني خبرك انك جيتها فالجامعه وصبيت معاها ، شن علاقتك بيها

سهم >> معش تجيب سيرتها على لسانك ، اطلع واكسر الشر مش ح يسير خير

وقبل ما يكمل سهم كلامه هجمو عليه ادم وجماعته وطاحو فيه ضرب ، ووقت طلعو هما علو طول كان بدر جاي و صار لي صار بعدها 

..
..
طلع نبراس رن عالصالحين 

صالحين>> ايوا ريس
نبراس>> بالله ح ندزلك اسم توا ، و عناوينه خوذه وحطه ليا فالتوقيف علي ماجيت
صالحين >> نمشيله انا
نبراس >> لالا اتفه من انه يمشيله سيادة المقدم ، هضا حشره دزله دوريه تشلطه من وين ما قاعد 
صالحين >> خلاص كون هاني 

وعلى طول صكر الصالحين و دز دوريه للاماكن لي قاله عليه عشان يلقوه

حط نبراس على رقم لقمان و رن عليه 

نبراس>> فالحوش انت ؟
لقمان>> لا ماشي شور المعرض 
نبراس >> اسمع سهم تعب شويه وشلناه للمستشفى 
لقمان بخوف >> تعب كيف شن فيه ؟
نبراس>> مافي شي وين عمري كذبت انا كان صايره حاجه عارفني نقول … متعارك هوا وواحد وسخ واضاربو بس 
لقمان >> تمام تمام انتو في اي مستشفى ؟ ومن لي متعارك معاااه ازف 

نبراس >> اهدا بس تو نحكيلك غير اسمعني قبل امشي للمعرض صكره بدر طلع بسهم متفلوج سيبه ووصى اصحاب المعارض في جنبه عليه و عدي شور الحوش طمنهم … وبعد توصل في امك كلمنا عشان تطمن عليه صوت بيش اتريح

لقمان مازال مش مستوعب>> تم تم نكمل ونجيكم 

//
//

في الوقت هضا … فالعشية 

كانت ليلى مع اسيل فوق 

ليلى >> ماحد كلم لعند توا
بحتت اسيل فساعه>> الساعه خمسه توا وهما من ال١١ واصلين تهيالي
ليلى >> اكيده ياخذو شفرات ويعلقو نت وقصه
اسيل >> احكيلي باهي شن صار
ليلى تنهدت>> تعرفيها قصة الرائد 
اسيل >> الرائد لي كان ماسك قضيتها ؟ 

ليلى هزت براسها ، وحكتلها بدون تفاصيل انه كلمو بعضهم فتره بعدها مرام انسحبت ومعش بت تكمل 

و وقت ما هما يهدرزو جتهم مكالمة فيديو من مصر 

اسيل >> هضا محمد 

ردت وفتحت الخط جاهم وجه مرام >> ازيكوووو يا جدعان 

ضحكت ليلى >> ياحيوانه رايفة عليك 
مرام >> حتى انا
اسيل>> رايقة عاد 
مرام>> الحمدلله… الجو يجنن بكل هنا 
اسيل >> انبسطي و ردبالك را محمد تزرق عينه على شي وحده هكي ولا هكي 
ضحكت مرام >> لعند توا فالسليم 
ليلى >> امتى وصلتو ؟
مرام >> من مبدري بس توا كيف استقرينا ، المطار قريب ساعه من هنا … وحطينا دبشنا و طلعنا تغدينا والشقق الفندقيه النت متاعهم ضعيف بكل لعند محمد طلع جابلي وجاب الروحه شفره 
ليلى >>خلاص عدي تريحي تو نحكو بعدين ، محمد وين
مرام>> انا فالبلكوني خش للحمام 
ليلى >> كيف نتواصل معاك باهي وانتي مصكره كل حاجه 
مرام >> تو نفتح واتساب برقمي المصري 
اسيل >> هيا عاد عطوني راجلي نطمن عليه 

جت لين جنب الكاميرا وقعدت تضحك

مرام >> ليووووني ، خير يا عميمه 
شيرت لين ورفعت يدها ورتها المصاصه
مرام >> الوجه فضيحه من المصاصه
اسيل >> كان حقيتي دبشها الحيوانه هذي 

مرام >> هاكي محمد ، هي باي تو نكلمكم بعدين بيش تعطوني ماما 

خذت اسيل التلفون و شيرت الليلى 

ليلى ضحكت>> خوذي خوذي راحتك 

خشت اسيل للدار ، وليلى حطت على رقم سهم اللي لها ساعتين ترن عليه وهوا مختفي عليها و قلبها حاسها انه فيه حاجه 

..
..

اسيل >> رايفة عليك وهضا كله اول يوم
ضحك >> حتى انا 
اسيل >> راك تبحت هكي ولا هكي 
محمد >> مرام قاعدتلي ما تخافيش
اسيل >> يعني بدون مرام تبحت عادي
ضحك >> انرفز فيكي بس هو انا نقدر
ابتسمت >> من بكرا تبدا شغل صح
محمد >> اها يا عيوني ، ومرام تحكيلي على دورة ما دورة بلكي بتخش فيها والله ماركزت معاها تو نسألها شكله لاقيتها عالنت
اسيل>> تمام رد بالك منها 
محمد >> وانا من يرد باله مني
اسيل>> انت دير بالك من روحك لحد ما تردلي بسلامه 
ضحك >> ردبالك من العيال ينقصك شي رني عليا
اسيل>> حاضر  ، هي باي
محمد >> سلام

//
//

مشن الساعات … و لقمان دار زي ما قاله نبراس … و امه ما تريحتش ولا وقفت بكا غير لما سمعت صوته و عدوله فرج و الهادي للمستشفى 

كانو كلهم فالمستشفى.. بدر ولقمان و الهادي وفرج ونبراس … و سهم صحته كويسه 

شير سهم بعيونه لبدر … جا لعنده ونزل شوره 

وشوشله >> اسمع خليهم يهووني هضوما انا عندي مكالمه بنديرها 

ضحك بدر >> شويه ويطلعو اجمد شويه 

ضحك سهم وسكت 

نبراس كان جنب الصالحين 

صالحين >> تم الموضوع قاعد فالتوقيف وامتي ما تبي تلقاه 

نبراس >> خلاص تمام .. في اثنين كانو معاه 

صالحين >> لا مسكناه بروحه

نبراس >> تو نخليه ينطق 

بحت نبراس في لقمان وعمامه >> هيا بالله عليكم كلكم صبو وتريحو

بدر>> انا ح نقعد معاه اليوم وبكرا نروحلكم بيه 

الهادي >> الحمدلله على سلامتك 

فرج >> طول عمرك في حالك امتى قعدت متاع مشاكل وضرب

نبراس >> ياعمي والله ما هو غلطان ، انت عارفني كان غلطان را انا بروحي كلبشته وعزقته

رفع سهم يده الصاحه >> هاه القياده العليا نطقت

نبراس >> اطلعو هيا ، بيش حتى اطمنوهم غادي 

الهادي >> هي تصبحو على خير 
نبراس >> عمي هيا حتى انت
فرج >> خلاص هي ، اتبقو على خير 

طلعو الهادي وفرج ولقمان لي كان جايبهم

الصالحين >> وانا بنمشي 
نبراس >> طالع عالقسم انا
الصالحين >> نجي معاك؟
نبراس >> لالا شوري الموضوع 
الصالحين >> خلاص تم 

..
..

بعد ما طلعو كلهم ، بحت بدر في سهم 

>> عارف انها حرقت التلفون
سهم >> والله ؟ 
بدر >> تلفونك معايا من الصبح فيه ١٠ فالميه شحن كله من رنينها
سهم ابتسم >> هات جيبه 

قرب منه ومدله التلفون وهوا يضحك 

حط على رقمها ورن عليها على طول

ليلى >> هضا لي خمس دقايق ونرن عليك وشوف توا الساعه كم ، حرقت التلفون وانا نرن

بصوت تعبان>>لحظة لحظة بس يابنتي 

ليلى سكتت شويه >> صوتك كنه ؟ 
سهم >> تعبان 
ليلى بخوف >>سهم كنك ؟ افتح كاميرا انت وين 
سهم >> خوذي نفس بس 

ضحك بدر وهوا يقول >> تبقو طيبين عاد انا خلوني نهبهب ، بندخن برا 

ضحك سهم وهوا يشير بيده ، طلع وصكر الباب 

فتح سهم الكاميرا وهي مصكره عندها ، وشهقت ليلى وحطت يدها على فمها لما شافت شكله 

ليلى >> سهم كنكككك مع من متعارك ولا حادث شن صارلك انت 

سهم >> ماتشغليش بالك انا كويس والله وبكرا ح نطلع 

ليلى>> قولي مع من متعارك وشن صار "ودموعها نزلن وحست انه الموضوع شور ادم "

سهم سكت 

ليلى >> هوا صح؟ كنت عارفه "وقعدت تبكي " كله بسببي جبتلك المشاكل انا صح 

سهم >> بطلي بكا وامسحي دموعك وبلا كلام فاضي ، شن اللي بسببك والكلام هضا 

ليلى ببكا>> سهم من يوم خشيت حياتك جبتلك مشاكل اسفه والله ما قصدي 

سهم ابتسم>> فداك يا عيون سهم الاثنين، فداك كسر يدي وكسر جسمي كله وفداك روحي لو تبيها اهم شي ما تبكيش بس 

ابتسمت من وسط دموعها >> انا اسفه 

سهم >> تو عليش اتأسفي انتي الي ضربتيني

ليلى >> لا 

سهم>> خلاص معناها بلا سماطه 
ليلى >> ولعند امتى المشاكل هذينا
سهم >> خلاص نبراس نهى الموضوع 
ليلى تنهدت >> انت تحس في حاجه ؟
سهم حط يده على قلبه وهيه مازالت تشوف فيه فالكاميرا>> قلبي

ضحكت >> ياسامط ندوي جد
سهم >> خلاص بالضحكه هذي معش قعدت نحس في شي 

حكى معاها شويه لحد ما فصل الشحن ، ووعدها بكرا اول ما يشحن تلفونه يحكي معاها وهي ما وقفتش دموع وهي تشوف الشكله لحد ما طمنها شويه

//
//

قبل شويه عندهم فالحوش

سديم>> بدر ما يردششش 
مجد>> عدو كلهم وخلونا مشغولين 
هديل >> يابنات لقمان قبل ما يطلع جاب عميمه نجوى هنا وحلف انه سهم كويس 
مجد >> باهي كنهم طولو
سديم هزت بكتوفها >> رني عالصالحين اكيد قاعد مع نبراس
هديل بحتت فيها >> رني 
مجد >> تبنها عاد انتن رنتي عليه
ضحكت سديم >> عيد وقديد

خذت تلفونها وصبت وهيه تقول >> معليش مكالمة خاصه مع راجلي 

ضحكن عليها البنات وهيه ترن عليه

صالحين >> ايوا 
مجد >> كيف حالك 
صالحين >> توا كويس 
ابتسمت>> معاهم فالمستشفى ؟
صالحين>توا كيف طلعت
مجد >> طمني باه سهم شن داير ؟ محد رن علينا وخوتي معش جو
صالحين>> طلعو من شويه تو تلقيهم جايين ، وسهم كويس اطمنو سيبنا معاه بدر 
مجد >> الحمدلله امتى ح يطلع باه
صالحين >> بكرا فالصبح 
مجد >> باهي تمام ، خلاص ما نعطلش عليك
صالحين>> تعطلي شنو ، بلا هبال ، وبعدين كنت بنرن عليك اصلا 
مجد >> وليش
صالحين >> راجل وبيحكي مع مراته 

توترت >> باهي بنطلع نطمن البنات
صالحين>> طمنيهن وانا عالخط ، وتصكري نجيك راه ان شاء الله اربعه الفجر 

تنهدت و طلعت للبنات شيرتلهن بيدها انه سهم تمام وهيه حاطه التلفون على وذنها 

سديم بصوت عالي >> سلميلنا على سيادة المقدم 

مجد دارتلها بيدها تو نوريك 

ضحك الصالحين وقال >> قوليلها وصل وصل 

ردت الدارها>> هذي الحيوانه سديم بنت المرحوم جلال 

صالحين ابتسم >> يعني ما ترنيش عليا لحد ما تصير حاجه ؟ 

مجد >> مش هكي بس اهو ما نرد امتى ما ترن 

صالحين >> رني في اي وقت و في اي ساعه ودقيقه ح تلقيني فاضي عشانك 

مجد بتوتر >> روحت انت 

صالحين >> كيف خشيت للحوش

مجد >>احكيلي باهي شن صار مع سهم 

صالحين >> مش كان نحكو في حياتنا احسن ؟

مجد ابتسمت >> احكي نسمع فيك 

وقعدو يحكو شويه هكي ، ومجد بدت اتقبل الموضوع رغم خوفها اللي ما وقفشش ابدا 

//
//

وصل للمركز متأخر ، وهوا يرن عليها لليوم الثاني ويلقى في تلفونها مقفل… زاد التوتر عنده و العصبيه … حط التلفون في جيبه ونزل للتوقيف وين ما في ادم 

بحت فيه >> يا اهلا وسهلا "سحب الكرسي و قعمز مقابله" معاك الرائد نبراس 

بلع ادم ريقه وما ردش بحرف، وبسهوله قدر نبراس  يجيب اسامي الاثنين لي معاه لي ضربو سهم .. 

وقبل ما يطلع ، فش غل غله فيه بكم بوني وهضا كله مامسحش كبده ، وطلع دز دوريه يجيبو الاثنين لي كانو معاه … وحطوهم معاه فالتوقيف لحد ما بكرا ينعرضو عالنيابة

//
//

ثاني يوم طلع سهم من المستشفى على حوش جده ، والتمو كلهم يومها عالغدا 

مصبيه فالمطبخ ، ماسكه تلفونها على خشت بدر اللي له كم يوم ما شافهش … قرب منها ومد راسه للتلفون 

بدر >> مع من تحكي 

حطت يدها على قلبها >> ح يجيني السكر منك
بدر >> مع من تحكي قلت انا 
سديم >> وانت شن دخلك 
بدر >> يارا خرفييييييي على ام ام الكلمه هذي ! سديم ازف 
سديم >> باهي بلا عياط بلا عياط مش كل حاجه تعيط وتنفتر عليها 
بدر >> انتي شكلك تبي طريحه 
سديم >>لالا ساد الطريحة الي واخذها سهم 
ضحك >> كان يسمعك ، وماتغيريش الموضوع 
سديم >>قروب الدفعه يا بدررر
بدر>> من فيه قروب الدفعه لي طول يومك عليه
سديم >>فيه الجامعه كلها وينزلو فيه في كل شي على قرايتنا 
بدر >> ردبالك اه
سديم قرنت حواجبها >> بيش تشيلنا بكرا انا ومجد باهي
بدر >>وين على خير 
سديم>> كنا بنطلعو امس غير صارت قصة سهم ، و اليوم حوسة غدا لازم بكرا نطلعو 
بدر >> وشن بتشرن
سديم >> البتات يا بدوري معش في وقت للعرس
غمزلها وهوا يقول >> وامتى بتشري قفطانك

قرنت حواجبها وبرمت شور الغاز >> لم لسانك واطلع كذا 

ضحك >> مش ح تشريه غير وانا معاك

سديم >> بدر اطلع اطلع 

برم بعد ماخذا تفاحه من جنبها و طلع وهوا يضحك 

..
..

في نفس الوقت ، نادى الهادي على هديل عشان يحكي معاها 

الهادي >> حكالي نبراس على قراركم انتي وياه

نزلت راسها وشبكت يديها 

الهادي >> متفقين يعني ؟

هديل هزت براسها >> متفقين 

الهادي >> باهي ليش يابنتي تعوذو من الشيطان وحاولو تحكو

هديل بحشم>> معلش يا عمو مافيش نصيب بينا ومافيش قبول هوا ولد عمي على عيني وراسي

الهادي تنهد ومابش يكثر كلام عشان المكتوب باين  >> براحتك .. بس الموضوع مش لعبه هذا قرار نهائي صح 

هديل >> باذن الله 

بحت الهادي في يدها ولقاها اصلا فاكه الدبله ، ماحبش يضغط عليها اكثر من هكي وهي بعد سكت طلعت من جنبه

//
//

عند مرام اللي كانت ذابله في مصر ، والي كانت حرفيا جسد بدون روح … لقت دورة تنمية بشريه واليوم اوللها يوم فيها سجلت بسرعه بتستغل الوقت عشان عارفه انهم مش مطولين 

محمد من اليوم بدا شغل وطلع من الصبح وهوا يوصي فيها وكل شويه يرن عليها عشان يطمن .. الدوره كان مكانها قريب منها تقريبا خمس دقايق مشي فعشان هكي كان مطمن عليها .. و مدتها عشر ايام 

خشت للمكان و قعمزت عالكرسي وهيه تبحت فيهم ، اثنين صحبات ومجموعة اصحاب .. ناس عرم اللي يضحك واللي يفكر واللي يهدرز … حست روحها دارت خطوه كويسه وانها اختلطت بالناس.. بس رغم هضا كلها جا في بالها صورة نبراس اللي مش قادره نهائي تنساه ابدا وكل يوم لها فالبعد بدال ما اتريح اتعذب زياده 

- أجبارك لنفسك على نسيان شخص يدفع دماغك للتفكير فيه أكثر. 

- محمود درويش-

//
//

عند سيادة الرائد لي كان يتبع في قضية ادم ، وافكاره كلهن معاها وفيها ! والي لليوم المش عارف كم ما سمعش صوتها ولا حكى معاها 

سيب المركز ودار كم مكالمه من هنا وهنا بيش قدر يعرف عنوان حوشهم ، كان يعرف المنطقه بس من مرام مايعرفش العنوان كامل 

بعد ما حصل الوصف خذا سيارته ومشى لعند حوشهم ، خوفا من انه يكون صاير عندهم حاجه .. درس بعيد شويه من الحوش .. ومافش بوادر حاجه صايره الحوش ضواياه والعه ومافيش حاجه ..سأل من هنا وهنا وما حصلش خبر يفيده … فكر يرن على محمد عشان يتريح بس ما عرفش شن يقوله وخاف عليها 

قعد ساعه وهوا مدرس في منطقتهم ، اخر حاجه مسح على وجه وطلع من المنطقه 

مر اليوم هضا وسط افكار عليها هيه وياه و عذاب ووجع قلب 

//
//

ثاني يوم ، خاش منفصل عالاخير وما يحقش قدامه قريب اسبوع من يوم السبت لعند اليوم الاربعاء وهوا ما يندريش عليها بكل … لقى سهم طالع من عند جدته  … قرب من عنده و الاعصاب بيطربقن 

نبراس>> رن على ليلى واسألها مرام كنها قافله تلفونها

سهم قرن حواجبه واستغرب وبحت فيه>> مرام اخت ليلى ؟؟ 

نبراس>> سهم والله العظيم وربي الكعبه قاعد ماسك روحي بالسيف ونغلي من جوا ،رن الله يربحك بعدين تو نفهمك كل شي 

سهم اللي ماكانش فاهم شن يبي نبراس من اخت ليلى ! مسك تلفونه وتباعد شويه وحط على رقم ليلى ورن عليها 

ليلى >> الو ، شن صار معاك كويس انت 
سهم >> اسمعيني بس 
ليلى باستغراب>> نعم
سهم>> نبراس مصبي قدامي وقالي رن على ليلى قوللها كنها مرام قافله تلفونها

تنهدت ليلى >> مرام معش تبي تحكي معاه يا سهم 

بحت نبراس في سهم وما كانش يسمع في ليلى شن تقول معش قدر يراجي اكثر من هكي ، كر منه التلفون و سهم واقف مستغرب 

حط عالسبيكر>> الو ، نبراس معاك
ليلى>> مرام معش تبي تحكي معاك يا نبراس ، شوف حياتك وخطيبتك وخليها اتريح لي فيها مكفيها 
نبراس بأعصاب >> عطيها ليا توا كذا 
ليلى >> مش جنبي
نبراس >> صبي عطيها التلفون
ليلى >> مرام سافرت لمصر ، هربببت معش تبي شي … مشت مع محمد خويا من يوم الاثنين عنده شغل غادي

نبراس انصدم ، وقلبه قعد يدق بسرعه… اخر شي كان يتوقعه تعدي وتسيبه وتهرب منه 

ليلى >> تعبت واجد والله ، وبكت واجد بكل اللي مرت فيه مش شويه مرام ضميرها يعذب فيها وهيه كل يوم اتخيل انها ح تخرب حياة البنت ، كل يوم تصكر الخط منك وتبكي كل يوم مش قادر لا تبعد منك ولا تقرب 

مد نبراس السهم التلفون بدون ما يحكي حرف ، وطلع وخبط الباب

سهم راسه دخن ومش فاهم >> ليلى فهميني شن صاير 
ليلى بضيق>> نبراس ومرام يحكو مع بعضهم
سهم بصدمة>> من امتى؟ وليش انا ما عنديش علم 
ليلى>> مرام قالت لي ما تحكيش السهم مهما كان ف هديل تقعد بنت عمك واكيد مش ح ترضى فيها 

سهم>> ومن وين تعرف نبراس اصلا "ومازال مش مستوعب " 

قعدت ليلى تحكي السهم فالقصه كلها باختصار من قصة سليمان وبعدها قصة ادم ومنها لعند ما سافرت مرام

سهم خبط على راسه >> تي انا حست في قصة الوسخ هضا الي ينقاله ادم وقت جا نبراس وقالي في موضوع يهمني و صور بنت ما بنت ونسيت بكل نسألك انتي كيف تعرفي نبراس اصلا راح الموضوع من بالي بكل ونسيته

ليلى>> هضا اللي صار بعد طلاق مرام بشهرين صارت قصتي انا وهيه كانت ما تحكيش معاه من وقت ما تطلقت خلاص … ووقتها رنت على نبراس وصار اللي انت عارفه ، ومن يومها بدو يحكو مع بعضهم لحد ما "وسكتت" 

سهم >> احكي معش ادسي عليا شي ، ومفروض من زمان حكيتيلي القصه .. كنت نقدر نلقى حل انا وياك ونساعدك معش تخافي تحكيلي 

ليلى >> مرام كانت متحسسه من الموضوع ماتبيش حد ياخذ عليها فكره انها وحده حقيره وكانت خايفه حتى على نبراس من حد يقول عليه خاين بنت عمه الموضوع كان معقد بكللللل الي يشوف من برا هكي يقول وحده مطلقه تحكي مع واحد خاطب بس بعد تقرب من قريب ح تلقى انه الموضوع صعبببب 

سهم >> وليش قررت توا تسافر

ليلى بزعل>> يوم ما حكيت معايا تذكر وقتلي على حوش نبراس وانه عرسه قريب … مشيت وحكيت المرام ما نبيش اختي اتوجع مانبيهش تحكي معاه لعند ما يقرب العرس و يطيح الفاس فالراس .. الموضوع صعب توا بس ح يكون اصعب لو قرب العرس … ووقتها انهارت بكا ومحمد خويا كان بعد يومين مسافر عنده شغل… حكت مع هلي واجدتهم عشان يخلوها تسافر وربي يسسرلها عشان هلي مش بساهل يوافقو بس ربي كان عارف كيف تعذبت ولازم تبعد.. وسافرت مع محمد و صكرت كل شي عشان ما تأذيش حد 

تنهد سهم >> عليك عذاب ازح … صكري خليني نشوف نبراس وين مشى طلع فاصل بكل 

ليلى >> ما تطلعش وانت مازال جسمك يوجع فيك 

سهم ابتسم >> مش طالع بنرن على بدر ولا الصالحين اكيد مشى الحد فيهم ، وتو نعاودلك

ليلى>> مش زعلان عشان دسيت عليك 
سهم >> عاذرك عشان خايفه على اختك يا عيوني بس اخر مره 
ليلى >> حاضر
ضحك وهوا يقول >> نبراس كان يعرف انه مرام سافرت بعد قتلك انا على موعد العرس ح يدفني 

ابتسمت>> معلش كان لازم هكي يسير 

سهم >> هي نشوفه ونعاودلك

صكر منها الخط ، وسهم اساسا ما عندش العلم مازال انه هديل ونبراس فسخو خطبتهم … اليوم لي حكو فيه في موضوع فسخة الخطبه ثاني يوم كان هوا فالمستشفى وما حدش حكى قدامه شي عالموضوع … طلع من الباب وهوا ماسك تلفونه 

//
//

خشن مجد و سديم اللي كانن مروحات من السوق معاهن بدر

بدر >> قصدكن انتي وياها هكي بتقعدن لحد ما يطلع عرسك بعد شهر ؟ 

مجد >> هضا غير اول مشوار

سديم >> بدر عاد ذليتنا على هالطلعه
بدر >> بكرا بتطلعن ؟
سديم >> تو يشيلنا لقمان ، بنشري قفطان و هيه بتشوف حاجات لها 
بدر>> تو نشيل امكن انا حاجات المطبخ تقولن لي وقفاطين تكلمن لقمان 

مجد ضحكت >> نحن في شنو وانت في شنو 

سديم >> شكله بيعزم شي وحده عالعرس ويشريلها قفطان

هز بكتوفه وهوا ماسك الاكياس >> ممكن 

سديم >> خش خش حط الشكاير واطلع

بدر>> بش نشيلك بكرا ديريلي كباية نسكافيه
سديم >> من عيوني الاثنين " وشيرت على عيونها وخشت للمطبخ " 

مشى هوا ومجد جنب امه وجدته توري فيهم في الحاجات متاع المطبخ لي شرتهن اليوم 

على رنت سهم عليه وهوا يسأل فيه على نبراس 

بدر >> اكيده عند صالحين 
سهم >> خلاص طلع فاصل بكل تو نحكيلك بعدين
بدر >> خلاص تو نمشيله
سهم >> نجي معاك
بدر >> خليك في يدك المكسوره
ضحك >> تم شوفه وقولي 

صبا من جنبهم وهما لاهيين فالدبش ، قابلاته سديم.. 

>> وين ماشي ؟ 
بدر >> طالع لحوش خالتي مرايف على هنيوا 
ابتسمت>> والنسكافيه 

مد يده خذا منها >> ما تقوليش المجد اني خذيت الكبايه 

ضحكت وهيه تقول >> تو تفطنلها حي عليك

ابتسم >> تبي حاجه من برا 

سديم >> سلامتك 

طلع وهوا ماسك في يده الكبايه وهيه تبحت فيه 

خبطتها مجد على كتفها >> شيلي الشكاير معايا فالدار وين سرحانه 

هديل >> مودره لها فتره 

سديم كرت الشكاره >> حلن انتن الاثنين 

//
//

اما عند اللي طلع فاصل و مايحقش في شي قدامه.. خذا بعضه ومشى حوش الصالحين … لي فتحله الباب وبعد شاف وجه ما بش يحكي معاه شي خلاه يخش و خش وراه وهمًا الاثنين ساكتين

مقعمز عالكنبه وحاط راسه بين يديه ، و صالحين متكي على حاشية الباب 

بعد نص ساعه تقريبا من السكوت ، رن الباب وخش بدر وهوا رايق يغني " وانتظرينييي وعدّي نجوم الليل"

صالحين>> خش و غم فمك را يصبي يحط غله فيك انت ونجوم الليل 

بدر حط يده على فمه>> سكتنا وانتو الافنديه نكدكم شين 

خش بدر لقى نبراس على وضعه ، قرن حواجبه وبحت في الصالحين 

رفع راسه وبحت فيهم 

الصالحين>> بتقعد هكي لعند امتى؟ بتحكي احكي نسمعو فيك ما تبيش تحكي خلينا نحن نحكو 

نبراس >> اقسم برب الكعبه تعبت ، والله تعذبت .. مش عارف امتى بنتريح والله … قاعد نجي على نفسي و نتمرمد لدرجة كنت ماشي في حاجه وانا عارف روحي بنتعذب فيها ومش قادر نرد في كلامي عشان كلمتي طول عمري زي السيف مانوخرش فيها …. كنت تايه و ماشي في طريق مش ليا … لقيت خيط امل في حياتي لاول مره في عمري ، لاول مره هضا نحس بيه "وخبط على صدره" لاول مره نفطنله لاول مره نحس بيه … كملت وانا مش فارق معايا يقولو خاين مش فارق معايا كلمتي وخطبتي كملت وانا مش فارق معايا شي "بحت في بدر وكمل كلامه" كل شي كنت نتهزا عليه درته ! نسمع في صوتها وهيه راقده عالخط ! تحكيلي في اتفه تفاصيل يومها ، نهوجس بشكلها الي ما شفتش الا مرات ينعدن عالاصابع بس انحفرننننن في ذاكرتي … فالنهاية سافرت وعدت .. سافرت و خلتني 

نزل راسه ومسح على وجه و معش قدر يكمل كلامه 

الصالحين >> هي نفسها لي شفناها يوم المستشفى هذي ثاني مره نسألك اه ، من يومها وانا معاك وبحتت فيك و في عيونك كيف تبحت فيها انت ممكن مش فاطن الروحك بس نحن شايفين 

بدر >> في كل مره نلقاك تحكي عالتلفون ولا ادز مسج لمعة عيونك نعرفك تحكي معاها مش مع هديل ، هديل كنت تعامل فيها كيف مجد وكيف سيسي عمرك ما ميزتها ولا بحتت فيها نظرة راجل البنت يحبها … بس عيونك لما يحكن مع هذي غير 

نبراس >> هربت مني "وضحك بحزن" كل مره نحكي معاها تقولي غلط يا نبراس والله غلط .. تقولي هي بنت عمك وانا وحده غريبه حتى هلك مش ح يتقبلو الموضوع ، ما قدرتش نبعد منها ما قدرتش والله ما قدرت … انا مش من حقي نحب  مش من حقه قلبي يدق باهي مش من حقي نختار حد يكون معايا ! كل شي مصكر في وجي كل شي ماشي ضدي … حتى فسخت الخطبه ما لحقتش نقولها لها اصلا صكرت كل شي يوصلني بيها وعدت 

بدر الدين والصالحين كانو واقفين وساكتين ، ماحدش فيهم حكى شي ، كانو لاول مره من 36 سنه نبراس يحكي لي في قلبه ! لاول مره اصلا يحكي ويحكي في موضوع زي هضا … حتى الخطبه لي كانت حمل على قلبه ما حكش فيها وبعد ما فسخها برضو ما حكش فيها .. كان فاهم مرام وعارف انه حتى لو مشالها وقاللها فسخ الخطبه ح تحط اللوم عليها … كانو واقفين يبحتو فيه وهوا مخنوق و  من الحزن … الشخص لي صعب يحب لما يحب يكون حبه طالع من صميم قلب قلبه يحب حب التعلق الحب اللي يوجع 

- تذكر أن المشاعر التي لا يتم التعبير عنها لا تموت أبدًا، إنها تدفن حية ثم تطفو فيما بعد بطرق أكثر قبحًا، عليك أن تعبر عن مشاعرك وإلا فإن تلك المشاعر سوف تأكل قلبك.